Belgili oligarh Bolat Ötemwratov. Foto: «Vernıy kapital» kompaniyası

Amerikalıq The Wall Street Journal basılımı Wlıbritaniya sotı BTA bankiniñ şağımı negizinde qazaqstandıq iri käsipker Bolat Ötemwratov pen şetelde twratın Mwhtar Äblyazov jäne İliyas Hrpanuovtıñ aktivterin bwğattağanın habarladı.

Bwğat «BTA bank» isi boyınşa qoyılğan. Ötemwratov turalı derek segiz jıldan astam uaqıtqa sozılğan istegi jaña fakti boluımen köptiñ nazarın küşeytti.

Bwğattalğan aktivtiñ biri jäne oligarhtıñ ieligindegi «Vernıy kapital» kompaniyası düysenbi küni «jalğan qwjattarğa negizinde ayıptalıp otırğanın» mälimdegen. Biznesmenniñ zañgerleri onıñ Äblyazovtıñ paydasına qarjı jımqıruğa qatısı joqtığın däleldeuge nietti.

WSJ gazetiniñ deregine qarağanda, ağılşın azamattıq sotı 13 qaraşa küni Ötemwratovqa tiesili  birneşe europalıq qarjı bankterindegi qarajattı, jartılay ielik etetin Ritz-Carlton qonaqüyleriniñ üş qaladağı (Mäskeu, Vena jäne Qazaqstan astanası) kompaniyaların, sonday-aq wlı ekeui qojalıq etetin Burger King fastfud meyramhanalar jelisiniñ qazaqstandıq franşizasın bwğattauğa şeşim şığarğan.

Qazir memleket ıqpalındağı «BTA bank» AQ-nıñ şağımı boyınşa (banktiñ bügingi jetekşisi Şurtabaeva Aqmaral Tulaevna – QT) britan sotında köpten beri qaralıp jatqan iste eks-basşı Mwhtar Äblyazov pen onıñ küyeu balası İliyas Hrapunovpen qosa oligarh Bolat Ötemwratov ta jauapker retinde şaqırtılğan. Jüye özin «№1 jau» sanaydı dep esepteytin Äblyazov bwl ayıptaudı «fantastikağa» balaydı.

«BTA-nıñ» Ötemwratovqa bet bwruı – Qazaqstannıñ iskerlik jäne sayasi ortasındağı ıqpaldı oyınşılar qatısıp jatqan istegi jaña özgeris» dep jazadı bwl jöninde WSJ.

Ötemwratov 2006-2008 jıldarı sol kezdegi prezident Nazarbaevtıñ is basqaruşısı qızmetin atqarğan, keyin onıñ ştattan tıs keñesşisi mindetin atqarğan.

Qazaqstandıq Forbes-tiñ eñ soñğı reytinginde Bolat Ötemwratovtıñ jiğan-tergeni men mülki $2,8 mlrd köleminde bağalanğan. Amerikalıq basılımnıñ mälimeti boyınşa, qazir 62 jastağı Ötemwratov 2,9 milliard dollar baylığımen älemniñ eñ auqattı adamdarınıñ qatarında 764-orında twr. Degenmen biznesmenniñ ökili Äbdirahmanova onıñ kapitalınıñ şınayı qwnı 3,2 milliard dollar ekenin ayttı dep jazadı WSJ.

Oligarhtıñ tau-ken metallurgiya, mwnay-gaz jäne telekommunikaciya salalarındağı, sonımen qosa qarjılıq qızmetter, jıljımaytın mülik, media sektorda aktivteri bar.

"The Qazaq Times"