اقش ۆەنەسۋەلا پرەزيدەنتى نيكولاس مادۋرونىڭ دەموكراتيانى جانىشتاۋ ارەكەتتەرىنە قولداۋ كورسەتتى دەگەن ايىپپەن قىتايلىق China Electronics يمپورت جانە ەكسپورت كورپوراتسياسىنا سانكتسيا سالدى. اقش قارجى مينيسترلىگى سالعان سانكتسيا 30 قاراشا، دۇيسەنبى كۇنى رەسمي كۇشىنە ەندى.

اقش قارجى مينيسترلىگى جاساعان مالىمدەمەدە اتالعان قىتايلىق كومپانيا مادۋرونىڭ رەجيمىنە «ينتەرنەت قىزمەتىن شەكتەۋ، ساندىق باقىلاۋ جۇرگىزۋ جانە ساياسي قارسىلاستارىنا قارسى كيبەر وپەراتسيالاردى جۇرگىزۋگە» قولداۋ كورسەتكەن. سونداي-اق، مالىمدەمەدە: «امەريكا قۇراما شتاتتارى ۆەنەسۋەلا عانا ەمەس، بۇكىل الەمدەگى ادامداردىڭ دەموكراتيالىق ەرىك-جىگەرىن باسۋعا كومەكتەسەتىندەرگە قارسى شارا قولدانۋعا دايىن»، – دەلىنگەن.

دەگەنمەن، كەشە قىتاي ءسىم تارابى اقش-تىڭ بۇل ارەكەتىنە قاتاڭ جاۋابى دايىن ەكەنىن كورسەتتى. قحر ءسىم وكىلى حۋا ءچۇنيڭ مالىمدەمەسىندە: «ۆەنەسۋەلا ۇكىمەتىنىڭ رەسميلىگىن كەز-كەلگەن ءۇشىنشى تاراپ انىقتاۋعا ءتيىستى ەمەس. ۆەنەسۋەلا ۇكىمەتى مەن حالقىنىڭ ءوز پروبلەمالارىن شەشۋگە ءوز مۇمكىندىكتەرى مەن پاراساتتارى جەتەدى. ءبىز ۆەنەسۋەلا حالقىنىڭ دامۋ جولىن وزگەرتۋ ءۇشىن بىرجاقتى سانكتسيالاردى پايدالانۋعا ءۇزىلدى-كەسىلدى قارسىمىز»، – دەگەن.

قىتايعا قوسا ۆەنەسۋەلا ءسىم تارابى دا اقش سانكتسياسىن ايىپتاپ مالىمدەمە جاسادى. «اقش سانكتسياسى زاڭسىز. ولاردىڭ ماقساتى ۆەنەسۋەلانى وقشاۋلاۋ جانە ۆەنەسۋەلالىقتارعا قيىندىق تۋدىرۋ»، – دەلىنگەن ۆەنەسۋەلا سىرتقى ىستەر مينيسترلىگىنىڭ مالىمدەمەسىندە.

قازىرشە، China Electronics يمپورت جانە ەكسپورت كورپوراتسياسى سانكتسياعا بايلانىستى ەشقانداي تۇسىنىكتەمە بەرگەن جوق. بىراق، قىتاي سىرتقى ىستەر مينيسترلىگى وتاندىق كومپانيالاردىڭ قۇقىعىن قورعاۋ ءۇشىن بارلىق شارالاردى جاسايتىنىن ايتقان.

ۆەنەسۋەلا ازاماتتارى بۇعان دەيىن ەلدەگى كەيبىر وپپوزيتسيالىق كوزقاراستاعى باسىلىمداردىڭ، ارنالاردىڭ سايتتارىنا كىرە المايتىندارىن، جەلىلەردىڭ ءجيى بۇعاتتالاتىنىن ايتىپ كەلگەن بولاتىن.

 

“The Qazaq Times”