Foto: kursiv.kz

Qazaqstan Aziya damu bankinen şamamen 908,6 mln euro jäne Aziya infraqwrılımdıq investiciyalar bankinen tağı 661,8 mln euro qarız almaq. Mäjilis tiisti zañ jobaların jalpı otırıs kezinde maqwldadı.

Qarjı ministri Erwlan Jamaubaev: «Prezidenttiñ Jarlığına säykes Qazaqstan men Aziya damu banki arasında 908,59 mln.euro somasındağı qarız turalı kelisimge qol qoyıldı. Qarız 2021 jılğı byudjet tapşılığın qarjılandıruğa bağıttalatın boladı. Qarız qarajatı Qazaqstan Ükimetiniñ COVID-19 pandemiyasınıñ saldarımen küres jäne ekonomikanı qalpına keltiru jönindegi şaraların qoldauğa mümkindik beredi», – deydi.

Öteu merzimderine qatıstı Aziya damu bankiniñ qarızı eki bölikke bölingen: 454,29 mln. euro jeñildikti kezeñniñ üş jılın qosa alğanda, 10 jıldıq merzimge beriledi. Qarızdıñ qalğan böligi -454,29 mln.euro sıyaqı mölşerlemesi +0,50%  bolatın jeñildikti kezeñniñ üş jılın qosa alğanda, 5 jıldıq merzimge beriledi.

«Qazaqstan men Aziya infraqwrılımdıq investiciyalar banki arasındağı Qarız turalı kelisimdi ratifikaciyalau turalı» zañ jobası boyınşa 661,8 mln. euro somasında qarız almaq. Jamaubaevtıñ aytuınşa, bwl soma pandemiyamen küres jäne 2021 jılğı byudjetti retteuge bağıttalğan.

Üşjıldıq byudjet jobasındağı qarjı tapşılığı 2021 jılı 2,6 trln teñgeni nemese JİÖ-niñ 3,4%-ın qwrauı tiis.

Qazaqstan byudjeti qañtar-qırküyek aralığında koronavirus pandemiyası men onı taratpau maqsatında engizilgen şekteu şaralarınıñ saldarınan şamamen 1,1 trln teñge qarjıdan qağılğan. Käsipkerlik salasındağı salıq alımına baylanıstı naqtı şığın 300 mlrd teñgege jetken.

"The Qazaq Times"