فوتو: kursiv.kz

قازاقستان ازيا دامۋ بانكىنەن شامامەن 908,6 ملن ەۋرو جانە ازيا ينفراقۇرىلىمدىق ينۆەستيتسيالار بانكىنەن تاعى 661,8 ملن ەۋرو قارىز الماق. ءماجىلىس ءتيىستى زاڭ جوبالارىن جالپى وتىرىس كەزىندە ماقۇلدادى.

قارجى ءمينيسترى ەرۇلان جاماۋباەۆ: «پرەزيدەنتتىڭ جارلىعىنا سايكەس قازاقستان مەن ازيا دامۋ بانكى اراسىندا 908,59 ملن.ەۋرو سوماسىنداعى قارىز تۋرالى كەلىسىمگە قول قويىلدى. قارىز 2021 جىلعى بيۋدجەت تاپشىلىعىن قارجىلاندىرۋعا باعىتتالاتىن بولادى. قارىز قاراجاتى قازاقستان ۇكىمەتىنىڭ COVID-19 پاندەمياسىنىڭ سالدارىمەن كۇرەس جانە ەكونوميكانى قالپىنا كەلتىرۋ جونىندەگى شارالارىن قولداۋعا مۇمكىندىك بەرەدى»، – دەيدى.

وتەۋ مەرزىمدەرىنە قاتىستى ازيا دامۋ بانكىنىڭ قارىزى ەكى بولىككە بولىنگەن: 454,29 ملن. ەۋرو جەڭىلدىكتى كەزەڭنىڭ ءۇش جىلىن قوسا العاندا، 10 جىلدىق مەرزىمگە بەرىلەدى. قارىزدىڭ قالعان بولىگى -454,29 ملن.ەۋرو سىياقى مولشەرلەمەسى +0,50%  بولاتىن جەڭىلدىكتى كەزەڭنىڭ ءۇش جىلىن قوسا العاندا، 5 جىلدىق مەرزىمگە بەرىلەدى.

«قازاقستان مەن ازيا ينفراقۇرىلىمدىق ينۆەستيتسيالار بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى بويىنشا 661,8 ملن. ەۋرو سوماسىندا قارىز الماق. جاماۋباەۆتىڭ ايتۋىنشا، بۇل سوما پاندەميامەن كۇرەس جانە 2021 جىلعى بيۋدجەتتى رەتتەۋگە باعىتتالعان.

ۇشجىلدىق بيۋدجەت جوباسىنداعى قارجى تاپشىلىعى 2021 جىلى 2,6 ترلن تەڭگەنى نەمەسە ءجىو-ءنىڭ 3,4%-ىن قۇراۋى ءتيىس.

قازاقستان بيۋدجەتى قاڭتار-قىركۇيەك ارالىعىندا كوروناۆيرۋس پاندەمياسى مەن ونى تاراتپاۋ ماقساتىندا ەنگىزىلگەن شەكتەۋ شارالارىنىڭ سالدارىنان شامامەن 1,1 ترلن تەڭگە قارجىدان قاعىلعان. كاسىپكەرلىك سالاسىنداعى سالىق الىمىنا بايلانىستى ناقتى شىعىن 300 ملرد تەڭگەگە جەتكەن.

"The Qazaq Times"