ŞQO-dağı indet jağdayı örşip twr. Fotokollaj: aşıq derekköz

Resmi derek boyınşa, Qazaqstanda 16 qaraşa 602 adamnan koronavirus, al jeksenbide 23 adamnan koronavirus pnevmoniyası anıqtaldı. Jaña oqu jılı bastalğalı beri mıñnan astam oquşıdan koronavirus tabılğan. Emdelip jatqan 19,5 mıñ qazaqstandıqtıñ häli qalay? 

#Koronavirus Keşe, qaraşanıñ 16-sı koronavirus jwqtırğan 438 adam ayığıp şıqsa, 7 adam ömirden ötken. Jañadan tirkelgen nauqastardıñ eñ köbi –  ŞQO (221) jäne SQO (61), Qostanay (57), Pavlodar oblısı (50), Almatı qalası (36), astana men Aqmola oblısında (ärqaysında 33-ten). Mañğıstau oblısında  eşqanday nauqas anıqtalmağan.

Bir ayğa juıq nauqastar sanı boyınşa alda kele jatqan Şığıs Qazaqstan oblısındağı epidemiyalıq ahual uşığıp, öñir tolıqtay oqşaulanğan. Degenmen memlekettik bas sanitar Erlan Qiyasov öñirdegi «jağday baqılauda jäne qalıptı» dep sanaydı. Onıñ aytuınşa, bwl şekteu şaralarınıñ nätijesi, eger karantin engizilmegende kemi 2-3 esege joğarı boluı ıqtimal körinedi. Öñir (13 mıñ) virus jwqtırğandar boyınşa Almatı qalası (15 mıñ) men astanadan (15 mıñ) keyingi üştikte twr. Jergilikti atqaruşı bilik ökilderi mwnıñ sebebin sanitarlıq talaptardıñ tiisinşe saqtalmauımen jäne şekaralıq aymaq boluımen baylanıstıradı. Halqı jağınan özge aymaqtarğa qarağanda aytarlıqtay az ŞQO-dağı jwqtırğandar sanı qaraşa ayı bastalğalı 3876-ğa östi.

Ekinşi qatarda Pavlodar (812), keyin Qostanay (730) oblıstarı ornalasqan. Äzirge jağday twraqtı öñirler – Qızılorda (7), Mañğıstau (13), Türkistan (26) oblıstarı. Mwnıñ barlığı qaraşa ayındağı resmi jiıntıq esep boyınşa. Şıntuaytında qalay ekeni belgisiz. Sebebi koronavirustan bölek "jwmbağı şeşilmegen" koronavirus pnevmoniyasınıñ aymaqtarğa taralu körsetkişi kündelikti berilmeydi. Ayına üş märte ğana.

Epidemiya jağdayınıñ deñgeyine baylanıstı Pavlodar, Qostanay, Şığıs jäne Batıs oblıstarı qızıl, astana, Almatı qalası men Aqmola oblısı sarı, qalğan öñirler jasıl aumaqqa jatatını habarlandı.

DenMin-niñ resmi mälimetinşe, emdelip jatqan 9319 nauqastıñ 3126-sı auruhanada. Tağı 6193 adam ambulatorlıq terapiyada. Olardıñ arasında 456 bala emdelip jatır.

Ahualı naşar 220 nauqastıñ arasında 21 adamnıñ jağdayı qattı qiındağan. Jäne 23 sırqat ökpeni jasandı jeldetu apparatımen tınıstap jatır.

Respublika boyınşa barlığı 121 mıñnan astam adam koronavirus infekciyasın jwqtırsa, emdelip jazılğandarı – 110 mıñnan asqan. Bwl jalpı nauqastardıñ 95%-dan astamı. Qazan ayınıñ alğaşqı aptasınan bastap elde koronavirus qayta köbeygen.

#Koronavirus_pnevmoniyası Sonımen qosa, koronavirus pnevmoniyasına şaldıqqan 23 adam tirkelgen. Tağı 54 adam ayığıp şıqqan, bir adam ömirden ötken. Biraq olardıñ qanşası qay aymaqtan ekeni belgisiz. PTR testi teris qorıtındı körsetkenimen, koronavirus saldarınan qabınğan aqökpe auruınıñ aymaqtarğa taralu deregin twraqtı türde jariyalauğa uäde etken ministr Aleksey Coy da, onıñ kömekşisi, vedomstvonıñ sol kezdegi resmi ökili Bağdat Qojahmetov te sözin bwrmalap, är on kün sayın jariyalauğa köşken. Koronavirus pnevmoniyasınıñ öñirlerdegi kündelikti dinamikası belgisiz. Pnevmoniyağa şaldıqqan 40 mıñ adamnıñ 29,5 mıñı jazılıp şıqqan. Keybir derekközderge, anığıraq aytqanda DenMin ökiliniñ aytuına qarağanda, düysenbi jäne seysenbi künderi demalıs küngi, yağni senbi men jeksenbidegi mälimet beriledi. Koronavirus jağdayın ötken täuliktiñ erteñine jüyelep jariyalau jolğa qoyılğanımen, koronavirus pnevmoniyası turalı mälimet eki künge keşigip jinaqtaladı. Düysenbi deregi särsenbide bir-aq beriledi. Sondıqtan «ötken küni» dep jazılatın resmi aqparat kümändi. Eki kün keşikse de vedomstvonıñ baspasöz qızmeti «ötken küngi» derek dep jariyalaydı. Apta sayın eki küngi körsetkiş tömendep sala beredi. Ministrlik mwnı medicina wyımdarı men vedomstvoda demalıs küni boluımen tüsindiredi. DDSW tuıstas derttiñ qaupi birdey ekenine basa nazar audarsa da Qazaqstannıñ Densaulıq saqtau ministrligi koronavirus pen onıñ pnevmoniyalıq türine eki türli közqaraspen qaraydı. Onıñ anıq däleli – KVI+ turalı aqparattıq indikatorlar (aymaqtarğa taraluı, nauqastardıñ ahualı, onıñ işindegi stacionar men ambulatorlıq baqılaudağılar sanı, balalar sanı, ÖJJA-men tınıstap jatqandar, ayıqqandar, jaña keyster, qaytqandar) kündelikti jariyalansa, al KVI- deregi soñğı üş körsetkişten özge mälimet berilmeydi. Al koronavirus pnevmoniyasınıñ aymaqtarğa taraluı jönindegi deregi ministr o basta aytqanday kündelikti ne aptasına emes, endi on künde bir-aq beriletin boldı. Onıñ özinde qwjat formatında saytqa jüktep otıradı, vedomstvo saytında aşıq äri tüsinikti tilde taldap jariyalamaydı.

Qoğamda biılğı 256 mıñ pnevmoniya jağdayın esepke qospay, jalpı statistikanı şildedegi qırğınnan keyin jürgize bastağan Ükimettiñ esebine kümänmen qaraytındar köbeygen.

#Söytse... Qazaqstanda koronavirus ölimi azaymay twr. Qaraşa ayınıñ alğaşqı jartısında 11 493 adam auırğan (9235 adam KVI+, 2258 adam KVI-) jäne 119 adam qaytıs bolğan (100 adam KVI+, 19 adam KVI-). Bwl qazan ayında tirkelgen tolıq jiıntıqtan da köp. Resmi derekke säykes, ötken qazan ayında 9,5 mıñday qazaqstandıq auırdı: koronavirus jwqtırğan 4439 adam anıqtalıp, 118 adam qaytıs bolğan. Däl osı uaqıtta koronavirus pnevmoniyasına 4984 adam şaldığıp, 47 adam qaytqan.

Osılayşa jazğı tolqınnıñ şarıqtau şeginen keyingi tamız ayınan beri Qazaqstanda koronavirus jwqtırğandar 30 mıñnan, al koronavirus pnevmoniyasına şaldıqqandar 40 mıñnan asqan. Ekeuin qosa eseptegende, keyingi üş jarım ayda indetten 1,3 mıñday adam ömirden ötken.

Qazirgi tañda 19,5 mıñğa juıq (KVI+ 9319, KVI- 10 165) adam auırıp jatır.

Pnevmoniyanıñ koronavirustan basqa türlerine şaldıqqandar sanı 358 mıñğa jaqındadı. Jiıntıq esebi, 13 naurızdan beri COVID-19 infekciyasın jwqtırğandar qatarı 121 mıñnan, 1 tamızdan bergi koronavirus pnevmoniyası 40 mıñnan asqan. DDSW mälimetinşe, Qazaqstanda auırğandardıñ sanı 161 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 3082-si (KVI+ / U07.1 – 1952, KVI- / U07.2 – 421, ilespe aurulardan – 709) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 709 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

"The Qazaq Times"