شقو-داعى ىندەت جاعدايى ءورشىپ تۇر. فوتوكوللاج: اشىق دەرەككوز

رەسمي دەرەك بويىنشا، قازاقستاندا 16 قاراشا 602 ادامنان كوروناۆيرۋس، ال جەكسەنبىدە 23 ادامنان كوروناۆيرۋس پنەۆمونياسى انىقتالدى. جاڭا وقۋ جىلى باستالعالى بەرى مىڭنان استام وقۋشىدان كوروناۆيرۋس تابىلعان. ەمدەلىپ جاتقان 19,5 مىڭ قازاقستاندىقتىڭ ءحالى قالاي؟ 

#كوروناۆيرۋس كەشە، قاراشانىڭ 16-سى كوروناۆيرۋس جۇقتىرعان 438 ادام ايىعىپ شىقسا، 7 ادام ومىردەن وتكەن. جاڭادان تىركەلگەن ناۋقاستاردىڭ ەڭ كوبى –  شقو (221) جانە سقو (61), قوستاناي (57), پاۆلودار وبلىسى (50), الماتى قالاسى (36), استانا مەن اقمولا وبلىسىندا (ارقايسىندا 33-تەن). ماڭعىستاۋ وبلىسىندا  ەشقانداي ناۋقاس انىقتالماعان.

ءبىر ايعا جۋىق ناۋقاستار سانى بويىنشا الدا كەلە جاتقان شىعىس قازاقستان وبلىسىنداعى ەپيدەميالىق احۋال ۋشىعىپ، ءوڭىر تولىقتاي وقشاۋلانعان. دەگەنمەن مەملەكەتتىك باس سانيتار ەرلان قياسوۆ وڭىردەگى «جاعداي باقىلاۋدا جانە قالىپتى» دەپ سانايدى. ونىڭ ايتۋىنشا، بۇل شەكتەۋ شارالارىنىڭ ناتيجەسى، ەگەر كارانتين ەنگىزىلمەگەندە كەمى 2-3 ەسەگە جوعارى بولۋى ىقتيمال كورىنەدى. ءوڭىر (13 مىڭ) ۆيرۋس جۇقتىرعاندار بويىنشا الماتى قالاسى (15 مىڭ) مەن استانادان (15 مىڭ) كەيىنگى ۇشتىكتە تۇر. جەرگىلىكتى اتقارۋشى بيلىك وكىلدەرى مۇنىڭ سەبەبىن سانيتارلىق تالاپتاردىڭ تيىسىنشە ساقتالماۋىمەن جانە شەكارالىق ايماق بولۋىمەن بايلانىستىرادى. حالقى جاعىنان وزگە ايماقتارعا قاراعاندا ايتارلىقتاي از شقو-داعى جۇقتىرعاندار سانى قاراشا ايى باستالعالى 3876-عا ءوستى.

ەكىنشى قاتاردا پاۆلودار (812), كەيىن قوستاناي (730) وبلىستارى ورنالاسقان. ازىرگە جاعداي تۇراقتى وڭىرلەر – قىزىلوردا (7), ماڭعىستاۋ (13), تۇركىستان (26) وبلىستارى. مۇنىڭ بارلىعى قاراشا ايىنداعى رەسمي جيىنتىق ەسەپ بويىنشا. شىنتۋايتىندا قالاي ەكەنى بەلگىسىز. سەبەبى كوروناۆيرۋستان بولەك "جۇمباعى شەشىلمەگەن" كوروناۆيرۋس پنەۆمونياسىنىڭ ايماقتارعا تارالۋ كورسەتكىشى كۇندەلىكتى بەرىلمەيدى. ايىنا ءۇش مارتە عانا.

ەپيدەميا جاعدايىنىڭ دەڭگەيىنە بايلانىستى پاۆلودار، قوستاناي، شىعىس جانە باتىس وبلىستارى قىزىل، استانا، الماتى قالاسى مەن اقمولا وبلىسى سارى، قالعان وڭىرلەر جاسىل اۋماققا جاتاتىنى حابارلاندى.

دەنمين-ءنىڭ رەسمي مالىمەتىنشە, ەمدەلىپ جاتقان 9319 ناۋقاستىڭ 3126-سى اۋرۋحانادا. تاعى 6193 ادام امبۋلاتورلىق تەراپيادا. ولاردىڭ اراسىندا 456 بالا ەمدەلىپ جاتىر.

احۋالى ناشار 220 ناۋقاستىڭ اراسىندا 21 ادامنىڭ جاعدايى قاتتى قيىنداعان. جانە 23 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

رەسپۋبليكا بويىنشا بارلىعى 121 مىڭنان استام ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 110 مىڭنان اسقان. بۇل جالپى ناۋقاستاردىڭ 95%-دان استامى. قازان ايىنىڭ العاشقى اپتاسىنان باستاپ ەلدە كوروناۆيرۋس قايتا كوبەيگەن.

#كوروناۆيرۋس_پنەۆمونياسى سونىمەن قوسا، كوروناۆيرۋس پنەۆمونياسىنا شالدىققان 23 ادام تىركەلگەن. تاعى 54 ادام ايىعىپ شىققان, ءبىر ادام ومىردەن وتكەن. بىراق ولاردىڭ قانشاسى قاي ايماقتان ەكەنى بەلگىسىز. پتر تەستى تەرىس قورىتىندى كورسەتكەنىمەن، كوروناۆيرۋس سالدارىنان قابىنعان اقوكپە اۋرۋىنىڭ ايماقتارعا تارالۋ دەرەگىن تۇراقتى تۇردە جاريالاۋعا ۋادە ەتكەن مينيستر الەكسەي تسوي دا، ونىڭ كومەكشىسى، ۆەدومستۆونىڭ سول كەزدەگى رەسمي وكىلى باعدات قوجاحمەتوۆ تە ءسوزىن بۇرمالاپ، ءار ون كۇن سايىن جاريالاۋعا كوشكەن. كوروناۆيرۋس پنەۆمونياسىنىڭ وڭىرلەردەگى كۇندەلىكتى ديناميكاسى بەلگىسىز. پنەۆمونياعا شالدىققان 40 مىڭ ادامنىڭ 29,5 مىڭى جازىلىپ شىققان. كەيبىر دەرەككوزدەرگە، انىعىراق ايتقاندا دەنمين وكىلىنىڭ ايتۋىنا قاراعاندا، دۇيسەنبى جانە سەيسەنبى كۇندەرى دەمالىس كۇنگى، ياعني سەنبى مەن جەكسەنبىدەگى مالىمەت بەرىلەدى. كوروناۆيرۋس جاعدايىن وتكەن تاۋلىكتىڭ ەرتەڭىنە جۇيەلەپ جاريالاۋ جولعا قويىلعانىمەن، كوروناۆيرۋس پنەۆمونياسى تۋرالى مالىمەت ەكى كۇنگە كەشىگىپ جيناقتالادى. دۇيسەنبى دەرەگى سارسەنبىدە ءبىر-اق بەرىلەدى. سوندىقتان «وتكەن كۇنى» دەپ جازىلاتىن رەسمي اقپارات كۇماندى. ەكى كۇن كەشىكسە دە ۆەدومستۆونىڭ ءباسپاسوز قىزمەتى «وتكەن كۇنگى» دەرەك دەپ جاريالايدى. اپتا سايىن ەكى كۇنگى كورسەتكىش تومەندەپ سالا بەرەدى. مينيسترلىك مۇنى مەديتسينا ۇيىمدارى مەن ۆەدومستۆودا دەمالىس كۇنى بولۋىمەن تۇسىندىرەدى. ددسۇ تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ تۋرالى اقپاراتتىق ينديكاتورلار (ايماقتارعا تارالۋى، ناۋقاستاردىڭ احۋالى، ونىڭ ىشىندەگى ستاتسيونار مەن امبۋلاتورلىق باقىلاۋداعىلار سانى، بالالار سانى، ءوججا-مەن تىنىستاپ جاتقاندار، ايىققاندار، جاڭا كەيستەر، قايتقاندار) كۇندەلىكتى جاريالانسا، ال كۆي- دەرەگى سوڭعى ءۇش كورسەتكىشتەن وزگە مالىمەت بەرىلمەيدى. ال كوروناۆيرۋس پنەۆمونياسىنىڭ ايماقتارعا تارالۋى جونىندەگى دەرەگى مينيستر و باستا ايتقانداي كۇندەلىكتى نە اپتاسىنا ەمەس، ەندى ون كۇندە ءبىر-اق بەرىلەتىن بولدى. ونىڭ وزىندە قۇجات فورماتىندا سايتقا جۇكتەپ وتىرادى، ۆەدومستۆو سايتىندا اشىق ءارى تۇسىنىكتى تىلدە تالداپ جاريالامايدى.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... قازاقستاندا كوروناۆيرۋس ءولىمى ازايماي تۇر. قاراشا ايىنىڭ العاشقى جارتىسىندا 11 493 ادام اۋىرعان (9235 ادام كۆي+, 2258 ادام كۆي-) جانە 119 ادام قايتىس بولعان (100 ادام كۆي+, 19 ادام كۆي-). بۇل قازان ايىندا تىركەلگەن تولىق جيىنتىقتان دا كوپ. رەسمي دەرەككە سايكەس، وتكەن قازان ايىندا 9,5 مىڭداي قازاقستاندىق اۋىردى: كوروناۆيرۋس جۇقتىرعان 4439 ادام انىقتالىپ، 118 ادام قايتىس بولعان. ءدال وسى ۋاقىتتا كوروناۆيرۋس پنەۆمونياسىنا 4984 ادام شالدىعىپ، 47 ادام قايتقان.

وسىلايشا جازعى تولقىننىڭ شارىقتاۋ شەگىنەن كەيىنگى تامىز ايىنان بەرى قازاقستاندا كوروناۆيرۋس جۇقتىرعاندار 30 مىڭنان، ال كوروناۆيرۋس پنەۆمونياسىنا شالدىققاندار 40 مىڭنان اسقان. ەكەۋىن قوسا ەسەپتەگەندە، كەيىنگى ءۇش جارىم ايدا ىندەتتەن 1,3 مىڭداي ادام ومىردەن وتكەن.

قازىرگى تاڭدا 19,5 مىڭعا جۋىق (كۆي+ 9319, كۆي- 10 165) ادام اۋىرىپ جاتىر.

پنەۆمونيانىڭ كوروناۆيرۋستان باسقا تۇرلەرىنە شالدىققاندار سانى 358 مىڭعا جاقىندادى. جيىنتىق ەسەبى، 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 121 مىڭنان، 1 تامىزدان بەرگى كوروناۆيرۋس پنەۆمونياسى 40 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 161 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 3082-ءسى (كۆي+ / U07.1 – 1952, كۆي- / U07.2 – 421, ىلەسپە اۋرۋلاردان – 709) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 709 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"