Foto: https://knews.kg

Qırğızstannıñ Sırtqı ister ministri Ruslan Qazaqbaev Qazaqstannıñ prem'er-ministri Asqar Maminmen jäne SİM Mwhtar Tileuberdimen kezdesip, qarjılay kömek swradı.

Kezdesude taraptar  sayasi-ekonomikalıq ahual, qazaqstandıq investiciyanıñ qauipsizdigin saqtau mäselesin talqıladı. Qırğız ministri eldiñ byudjetin saqtau jäne azıq-tülik qauipsizdigin qamtamasız etu üşin qoldauğa mwqtaj ekenin aytqan.

Qazaqstan – Qırğızstandağı bilik auısqannan keyin Qazaqbaev keletin ekinşi el. Ötken aptada ol Europalıq odaq pen Reseyden qarjılıq kömek swrağan. Biraq Sadır Japarovtıñ «bilik meniñ qolıma ötti» degen mälimdemesinen soñ Mäskeu Bişkekke beremin degen 100 million dollar kömekti toqtatıp tastağan.

QR Sırtqı sayasat vedomstvosınıñ habarlamasında: «Mwhtar Tileuberdi Qırğızstandağı qazaqstandıq käsiporındarğa jasalğan şabuıldarğa alañdauşılıq bildirip, qırğız tarapın Qazaqstan azamattarı men kompaniyalarınıñ qwqıqtıq tärtibi men qauipsizdigin qamtamasız etu boyınşa şaralar qabıldauğa şaqırdı», – delingen

4 qazandağı parlamenttik saylaudan keyin Qırğızstanda iri şeruiler ötti. Narazılar Bişkektegi Aq üy men äkimşilik ğimarattardı basıp aldı. 15 qazanda el prezidenti Sooronbay Jeenbekov öziniñ otstavkasın jariyaladı. Qazir prezidenttiñ mindetin 6 qazanğa qarağan tüni narazılıq bildiruşiler türmeden bosatqan sayasatker Sadır Japarov atqarıp otır. Ol twtqındau üşin tağayındalğan 10 jıldıñ 3,5 jılın türmede ötkizdi.

Qazaqstan Qırğızstandağı dağdarıs kezeñinde eks-prezident Jeenbekovke qoldau bildirdi.

Ayta keteyik, Qazaqstan byudjeti qañtar-qırküyek aralığında koronavirus pandemiyası men onı taratpau maqsatında engizilgen şekteu şaralarınıñ saldarınan şamamen 1,1 trln teñge qarjıdan qağılğan. Käsipkerlik salasındağı salıq alımına baylanıstı naqtı şığın 300 mlrd teñgege jetken.

"The Qazaq Times"