فوتو: https://knews.kg

قىرعىزستاننىڭ سىرتقى ىستەر ءمينيسترى رۋسلان قازاقباەۆ قازاقستاننىڭ پرەمەر-ءمينيسترى اسقار مامينمەن جانە ءسىم مۇحتار تىلەۋبەردىمەن كەزدەسىپ, قارجىلاي كومەك سۇرادى.

كەزدەسۋدە تاراپتار  ساياسي-ەكونوميكالىق احۋال، قازاقستاندىق ينۆەستيتسيانىڭ قاۋىپسىزدىگىن ساقتاۋ ماسەلەسىن تالقىلادى. قىرعىز ءمينيسترى ەلدىڭ بيۋدجەتىن ساقتاۋ جانە ازىق-تۇلىك قاۋىپسىزدىگىن قامتاماسىز ەتۋ ءۇشىن قولداۋعا مۇقتاج ەكەنىن ايتقان.

قازاقستان – قىرعىزستانداعى بيلىك اۋىسقاننان كەيىن قازاقباەۆ كەلەتىن ەكىنشى ەل. وتكەن اپتادا ول ەۋروپالىق وداق پەن رەسەيدەن قارجىلىق كومەك سۇراعان. بىراق سادىر جاپاروۆتىڭ «بيلىك مەنىڭ قولىما ءوتتى» دەگەن مالىمدەمەسىنەن سوڭ ماسكەۋ بىشكەككە بەرەمىن دەگەن 100 ميلليون دوللار كومەكتى توقتاتىپ تاستاعان.

قر سىرتقى ساياسات ۆەدومستۆوسىنىڭ حابارلاماسىندا: «مۇحتار تىلەۋبەردى قىرعىزستانداعى قازاقستاندىق كاسىپورىندارعا جاسالعان شابۋىلدارعا الاڭداۋشىلىق ءبىلدىرىپ، قىرعىز تاراپىن قازاقستان ازاماتتارى مەن كومپانيالارىنىڭ قۇقىقتىق ءتارتىبى مەن قاۋىپسىزدىگىن قامتاماسىز ەتۋ بويىنشا شارالار قابىلداۋعا شاقىردى»، – دەلىنگەن

4 قازانداعى پارلامەنتتىك سايلاۋدان كەيىن قىرعىزستاندا ءىرى شەرۋىلەر ءوتتى. نارازىلار بىشكەكتەگى اق ءۇي مەن اكىمشىلىك عيماراتتاردى باسىپ الدى. 15 قازاندا ەل پرەزيدەنتى سوورونباي جەەنبەكوۆ ءوزىنىڭ وتستاۆكاسىن جاريالادى. قازىر پرەزيدەنتتىڭ مىندەتىن 6 قازانعا قاراعان ءتۇنى نارازىلىق بىلدىرۋشىلەر تۇرمەدەن بوساتقان ساياساتكەر سادىر جاپاروۆ اتقارىپ وتىر. ول تۇتقىنداۋ ءۇشىن تاعايىندالعان 10 جىلدىڭ 3,5 جىلىن تۇرمەدە وتكىزدى.

قازاقستان قىرعىزستانداعى داعدارىس كەزەڭىندە ەكس-پرەزيدەنت جەەنبەكوۆكە قولداۋ ءبىلدىردى.

ايتا كەتەيىك، قازاقستان بيۋدجەتى قاڭتار-قىركۇيەك ارالىعىندا كوروناۆيرۋس پاندەمياسى مەن ونى تاراتپاۋ ماقساتىندا ەنگىزىلگەن شەكتەۋ شارالارىنىڭ سالدارىنان شامامەن 1,1 ترلن تەڭگە قارجىدان قاعىلعان. كاسىپكەرلىك سالاسىنداعى سالىق الىمىنا بايلانىستى ناقتى شىعىن 300 ملرد تەڭگەگە جەتكەن.

"The Qazaq Times"