Wlıbritaniya prem'er-ministri Boris Djonson. Foto: The Guardian

Wlıbritaniya parlamentiniñ partiyaaralıq tobı eldegi saylau procesterine aralasqan Reseyge qarsı şara qoldanbağanı üşin ükimetti sotqa berdi.

Prem'er-ministr Boris Djonson bastağan ministrler kabinetine qarsı sot isin altı parlamentşi: lord Pol Strasburger, leyboristik partiyanıñ deputattarı Ben Bredşou jäne Kris Brayant, Jasıldar partiyasınıñ ökili Karolin Lukas, Şotlandiya wlttıq partiyasınıñ müşesi Alin Smit jäne Baronessa men Djeyn Uitkroft bastağan.

Ükimetti sotqa beruşi taraptar 2014 jılı Şotlandiyada ötken täuelsizdik jäne 2016 jılı Wlıbritaniyanıñ Europalıq odaqtan şığuı turalı referendumdarınıñ nätijelerine ıqpal etu äreketterin tergeuge qwlıq tanıtpauı – korol'diktiñ Europalıq qwqıqtar turalı konvenciyağa No1 hattamağa säykes qabıldağan mindettemelerin bwzu dep sanaydı. Osı qwjattıñ 3-babı «erkin saylau ötkizudi» közdeydi. Parlament müşeleriniñ pikirinşe, bwl erejeni Resey biligi bwzğan.

Özderiniñ ündeuine olar 2010-2012 jj. sayasatker Piter Rikketstiñ kuägerlik mälimdemesin de qostı. Ol – Wlıbritaniyanıñ bwrınğı prem'er-ministri Devid Kemeronnıñ wlttıq qauipsizdik jönindegi keñesşisi bolğan jäne 2000-2001 jıldarı Birlesken barlau komitetiniñ törağası bolğan.

Wlıbritaniya parlamentiniñ «Reseydiñ işi sayasatqa aralasuı» turalı esebi

21 şildede Wlıbritaniya parlamentiniñ barlau jäne qauipsizdik komiteti Resey biliginiñ işki sayasatqa aralasuına qatıstı esep jariyaladı. Qwjatta «Reseydiñ Wlıbritaniyadağı ıqpalı qalıptı jağdayğa aynalğan. Sebebi birneşe mañızdı sayasi oqiğalarğa Mäskeudiñ tikeley qatısı bar. Bwğan Wlıbritaniya ükimeti tiisti şara qoldanuı tiis», – delingen.

Parlamentşiler Resey wyımdasqan qılmıstıq toptardı är memleketke arnayı tapsırmamen jiberip, «kiberkeñistiktegi ziyandı äreketterdi» jüzege asıradı dep sanaydı. Sonımen qatar, komitet «Mäskeu Şotlandiyanıñ täuelsizdigi turalı 2014 jılğı referendumğa jäne 2016 jılğı Brexit referendumına ıqpal etpek» degen şağım jasadı.

Al Resey biligi Mäskeudiñ Wlıbritaniyadağı saylauğa aralaspağanın mälimdedi. Resey Sırtqı ister ministrliginiñ resmi ökili Mariya Zaharova Birikken Korol'dik parlamenttik komitetiniñ esebin «rusofobiya» dep bağalağan.

"The Qazaq Times"