Foto: eadaily.com

Britaniyanıñ Halıqaralıq sıbaylas jemqorlıqqa qarsı wyımı Reseydiñ on tört azamatına sankciya engizu turalı şeşim şığardı. Bwğan deyin osı azamattar AQŞ-tağı antireseylik «Magitskiy tizimine» de engizilgen.

Mälimetter boyınşa, atalğan twlğalarğa qatıstı şekteu şaraları «2007 jılı jüzege asırılğan salıqtı qaytarudıñ alayaqtıq sheması arqılı Resey memlekettik qarajatına 230 million dollarğa balama somanı wrlağanı üşin» engizilgen. Bwl qarajattıñ bir böligi şetelge şığarılğan. Sonımen qatar, qara tizimge Gvatemala kongresi törağasınıñ birinşi orınbasarı (eldiñ bir palatalı Parlamenti) Felipe Alehos Lorensana jäne Albanisa kompaniyasınıñ vice-prezidenti jäne Nikaragua wlttıq azattıq Sandinista maydanınıñ bwrınğı qazınaşısı Hose Fransisko Lopes Senteno kirdi. Olardıñ Wlıbritaniyadağı aktivteri tabılğan jağdayda bwğattalıp, patşalıqqa kiruge tıyım salınadı.

Resey azamattarına engizilgen sankciyalıq tizimde:

  • jemqorlıqpen küres basqarması basşısınıñ orınbasarı Artem Kuznecov;
  • tergeu departamentiniñ bwrınğı tergeuşisi Pavel Karpov;
  • tergeuşiler Stanislav Gordievskiy men Oleg Urjumcev;
  • salıq inspekciyalarınıñ basşıları Ol'ga Stepanova, onıñ küyeui Vladlen Stepanov jäne Elena Himina;
  • zañgerler Andrey Pavlov jäne YUliya Mayorova;
  • «Grand-Aktiv» bas direktorı Aleksey Şeşenya;
  • käsipkerler Vyaçeslav Hlebnikov jäne Viktor Markelov;
  • «Ämbebap jinaq bankiniñ» birlesken ieleri Dmitriy Klyuev pen Gennadiy Plaksin bar.

Wlıbritaniyanıñ Sırtqı ister ministri Dominik Raab sankciya engizudiñ bastı maqsatı «älemdegi auqımdı sıbaylas jemqorlıqtıñ aldın alu jäne onımen küresu; jemqorlıqpen baylanısı bar jeke twlğalardıñ nemese wyımdardıñ aktivterin toqtatu, sonday-aq Birikken Korol'dikke kiruge tıyım salu» dep mälimdedi.

Magnitskiy isi

2008 jıldıñ 24 qaraşasında Firestone Duncan auditorlıq kompaniyasınıñ 37 jastağı basqaruşı seriktesi, Hermitage Capital qorınıñ auditorı Sergey Magnitskiy salıq töleuden jaltarğanı üşin wstaldı. 26 qaraşada Mäskeudiñ Tver' sotınıñ şeşimimen ol qamauğa alındı.

2009 jılı qazanda qordıñ negizin qalauşı Uil'yam Brauderge 522 million rubl'den astam salıq töleuden jaltarğanı üşin ayıp tağıldı. «Butırka» tergeu izolyatorında 11 ay qamauda bolğannan keyin, ol 2009 jıldıñ 16 qaraşasında «Matrosskaya Tişina» tergeu izolyatorınıñ reanimaciya böliminde qaytıs boldı. Magnitskiyge qatıstı qılmıstıq is sol jıldıñ 30 qaraşasında toqtatıldı.

"The Qazaq Times"