ۇلىبريتانيا پرەمەر-ءمينيسترى بوريس دجونسون. فوتو: The Guardian

ۇلىبريتانيا پارلامەنتىنىڭ پارتياارالىق توبى ەلدەگى سايلاۋ پروتسەستەرىنە ارالاسقان رەسەيگە قارسى شارا قولدانباعانى ءۇشىن ۇكىمەتتى سوتقا بەردى.

پرەمەر-مينيستر بوريس دجونسون باستاعان مينيسترلەر كابينەتىنە قارسى سوت ءىسىن التى پارلامەنتشى: لورد پول ستراسبۋرگەر، لەيبوريستىك پارتيانىڭ دەپۋتاتتارى بەن برەدشوۋ جانە كريس برايانت، جاسىلدار پارتياسىنىڭ وكىلى كارولين لۋكاس، شوتلانديا ۇلتتىق پارتياسىنىڭ مۇشەسى الين سميت جانە بارونەسسا مەن دجەين ۋيتكروفت باستاعان.

ۇكىمەتتى سوتقا بەرۋشى تاراپتار 2014 جىلى شوتلانديادا وتكەن تاۋەلسىزدىك جانە 2016 جىلى ۇلىبريتانيانىڭ ەۋروپالىق وداقتان شىعۋى تۋرالى رەفەرەندۋمدارىنىڭ ناتيجەلەرىنە ىقپال ەتۋ ارەكەتتەرىن تەرگەۋگە قۇلىق تانىتپاۋى – كورولدىكتىڭ ەۋروپالىق قۇقىقتار تۋرالى كونۆەنتسياعا No1 حاتتاماعا سايكەس قابىلداعان مىندەتتەمەلەرىن بۇزۋ دەپ سانايدى. وسى قۇجاتتىڭ 3-بابى «ەركىن سايلاۋ وتكىزۋدى» كوزدەيدى. پارلامەنت مۇشەلەرىنىڭ پىكىرىنشە، بۇل ەرەجەنى رەسەي بيلىگى بۇزعان.

وزدەرىنىڭ ۇندەۋىنە ولار 2010-2012 جج. ساياساتكەر پيتەر ريككەتستىڭ كۋاگەرلىك مالىمدەمەسىن دە قوستى. ول – ۇلىبريتانيانىڭ بۇرىنعى پرەمەر-ءمينيسترى دەۆيد كەمەروننىڭ ۇلتتىق قاۋىپسىزدىك جونىندەگى كەڭەسشىسى بولعان جانە 2000-2001 جىلدارى بىرلەسكەن بارلاۋ كوميتەتىنىڭ توراعاسى بولعان.

ۇلىبريتانيا پارلامەنتىنىڭ «رەسەيدىڭ ءىشى ساياساتقا ارالاسۋى» تۋرالى ەسەبى

21 شىلدەدە ۇلىبريتانيا پارلامەنتىنىڭ بارلاۋ جانە قاۋىپسىزدىك كوميتەتى رەسەي بيلىگىنىڭ ىشكى ساياساتقا ارالاسۋىنا قاتىستى ەسەپ جاريالادى. قۇجاتتا «رەسەيدىڭ ۇلىبريتانياداعى ىقپالى قالىپتى جاعدايعا اينالعان. سەبەبى بىرنەشە ماڭىزدى ساياسي وقيعالارعا ماسكەۋدىڭ تىكەلەي قاتىسى بار. بۇعان ۇلىبريتانيا ۇكىمەتى ءتيىستى شارا قولدانۋى ءتيىس»، – دەلىنگەن.

پارلامەنتشىلەر رەسەي ۇيىمداسقان قىلمىستىق توپتاردى ءار مەملەكەتكە ارنايى تاپسىرمامەن جىبەرىپ، «كيبەركەڭىستىكتەگى زياندى ارەكەتتەردى» جۇزەگە اسىرادى دەپ سانايدى. سونىمەن قاتار، كوميتەت «ماسكەۋ شوتلانديانىڭ تاۋەلسىزدىگى تۋرالى 2014 جىلعى رەفەرەندۋمعا جانە 2016 جىلعى Brexit رەفەرەندۋمىنا ىقپال ەتپەك» دەگەن شاعىم جاسادى.

ال رەسەي بيلىگى ماسكەۋدىڭ ۇلىبريتانياداعى سايلاۋعا ارالاسپاعانىن مالىمدەدى. رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا بىرىككەن كورولدىك پارلامەنتتىك كوميتەتىنىڭ ەسەبىن «رۋسوفوبيا» دەپ باعالاعان.

"The Qazaq Times"