Körneki suret. Foto: aşıq derekköz

7 qazan, särsenbi küni prezident Toqaev Aqordada pandemiyanıñ küzgi tolqınına dayındıqtı pısıqtauğa arnalğan jiın ötkizdi. Ol indet saldarınan qaytıs bolğan därigerlerdiñ otbasına ötemaqı töleu barısın sınadı. Prezidenttiñ sözine qarağanda, bwl salada «byurokratiyalıq tosqauıldar» köp.

«Men bergen tapsırma boyınşa ekinşi jartı jıldıqta 150 milliard teñgeden astam qarjı bölingen. Alayda üstemaqı men saqtandıru tölemderin alu kezinde äli künge deyin byurokratiyalıq tosqauıldar bar» dedi Toqaev.

Prezidenttiñ aytuınşa, keybir jerlerde qızmetkerler «sanmen oynap», üstemaqı ülestiru isin aşıq jürgizbegen. Keybir mekemelerde bas därigerler medicina qızmetkerleriniñ jwmıs uaqıtın dwrıs eseptemegen.

«Medicina qızmetkerleri özine tiesili aqşanı ötinip swramauı tiis», – dedi ol. Degenmen ötinip swramasqa şara joq. Qwqıqtıq talap boyınşa nauqastan medqızmetker auırğanın däleldeuge keminde 40 qwjat jinauı qajet. Jergilikti komissiyalardıñ jwmısı bayau.

30 qırküyek küngi resmi mälimet boyınşa, Qazaqstanda 182 medicina qızmetkeri koronavirustan qaytıs bolğan. Toqaevtıñ aytuınşa, tek 37 otbasığa ğana ötemaqı tölengen. Al eñbek ministrliginiñ bügingi deregine qarağanda, virustan qaytqan 45 därigerdiñ tuıstarına tiisti qarjı berilgen. Prezident pen ministrliktiñ sözindegi qayşılıq ne bir otbasıdan birneşe däriger köz jwmğan ba degen küdik tuadı.

«Medqızmetkerler öliminiñ sebebin anıqtau türli qiındıq tuğızadı, keybiri etikamen de baylanıstı. Osığan oray ükimetke qaytıs bolğan barlıq medicina qızmetkeriniñ otbasına ötemaqı töleudi tapsıramın» dedi ol.

Prezident sonımen birge käsibi mindetin atqaru kezinde koronavirus jwqtırğan därigerlerge de ötemaqını keşiktirmey töleudi tapsırğan.

Ükimette aytılğan mälimetke sensek, elde 12 830 medicina qızmetkeri koronavirusqa şaldıqqan. Onıñ 8 mıñnan astamı virustı qızmet barısında jwqtırğanı anıqtalğan.

Eki ministrliktiñ eki türli deregi: 88 mln teñge qayda?

Eñbek jäne halıqtı äleumettik qorğau ministrligi bügin pandemiya kezinde koronavirus pen onıñ pnevmoniya türin jwqtırğan 4494 mıñğa juıq medicina qızmetkerine jäne qaytıs bolğan 45 kadrdıñ tuıstarına memleket tarapınan ötemaqı tölengenin habarlağan. Osı twsta eki ministrliktiñ ortasında tağı bir kerağar derekti bayqauğa boladı. Sebebi tap osı küni, 7 qazan OKQ alañında ötken brifingte Tauarlar men qızmetterdiñ sapası men qauipsizdigin baqılau komitetiniñ törağası Timur Swltanğaziev 4450 medicina qızmetkerine tölem jasalğanın mälimdegen. Sağat 9:00-16:20 aralığında ministrlik 44 adamğa ötemaqı berip ülgergen bolsa, onda derektiñ esebi dwrıs şığadı.

Eñbek ministrligi: 7 qazan sağat 9.00-degi jağday boyınşa MÄSQ COVID-19 nemese virustıq pnevmoniya jwqtırğan 4494 medicina qızmetkeriniñ ötinişi boyınşa jäne aurudıñ saldarınan qaytıs bolğan 45 medicina qızmetkerine qatıstı aqşalay qarajattı tağayındau men töleudi jüzege asırdı [habarlama 7 qazan sağat 10:20-da jariyalanğan]

Densaulıq saqtau ministrligi: 7 qazanda auru jwqtırğan 4450 medicina qızmetkerine 2 mln. teñge köleminde tölem jasalğan. 8442 medicina qızmetkeri jwmısta jürip Covid-19  jwqtırğan. Sonımen qatar, qaytıs bolğan 45 medicina qızmetkeriniñ otbasına 10 mln.teñgeden tölendi [mälimdeme 7 qazan sağat 16:20-da jasalğan]

Zañ boyınşa, koronavirus nemese koronavirus pnevmoniyasın jwqtırğan medicina qızmetkerine – 2 mln teñge, koronavirustan qaytıs bolğan medicina qızmetkeriniñ otbasına 10 mln teñge köleminde ötemaqı beriledi.

Ükimet basşısı Asqar Maminniñ 4 qazanda wsınğan mälimetinşe, qazirgi tañda epidemiyağa qarsı 46 mıñnan astam medicina qızmetkeri tartılğan. Ükimettiñ jauaptı vedomstvoları – DenMin men EñbekMin qırküyek ayınıñ ayağına deyin ötinimdi tirkeu jäne tölem tağayındau jwmısında sılbırlıq tanıtıp, sozbwydağa salğandıqtan ötken aptada parlament deputattarı jäne qoğam tarapınan sınğa wşırağan.

"The Qazaq Times"