7 قازان، سارسەنبى كۇنى پرەزيدەنت توقاەۆ اقوردادا پاندەميانىڭ كۇزگى تولقىنىنا دايىندىقتى پىسىقتاۋعا ارنالعان جيىن وتكىزدى. ول ىندەت سالدارىنان قايتىس بولعان دارىگەرلەردىڭ وتباسىنا وتەماقى تولەۋ بارىسىن سىنادى. پرەزيدەنتتىڭ سوزىنە قاراعاندا، بۇل سالادا «بيۋروكراتيالىق توسقاۋىلدار» كوپ.

«مەن بەرگەن تاپسىرما بويىنشا ەكىنشى جارتى جىلدىقتا 150 ميلليارد تەڭگەدەن استام قارجى بولىنگەن. الايدا ۇستەماقى مەن ساقتاندىرۋ تولەمدەرىن الۋ كەزىندە ءالى كۇنگە دەيىن بيۋروكراتيالىق توسقاۋىلدار بار» دەدى توقاەۆ.

پرەزيدەنتتىڭ ايتۋىنشا، كەيبىر جەرلەردە قىزمەتكەرلەر «سانمەن ويناپ»، ۇستەماقى ۇلەستىرۋ ءىسىن اشىق جۇرگىزبەگەن. كەيبىر مەكەمەلەردە باس دارىگەرلەر مەديتسينا قىزمەتكەرلەرىنىڭ جۇمىس ۋاقىتىن دۇرىس ەسەپتەمەگەن.

«مەديتسينا قىزمەتكەرلەرى وزىنە تيەسىلى اقشانى ءوتىنىپ سۇراماۋى ءتيىس»، – دەدى ول. دەگەنمەن ءوتىنىپ سۇراماسقا شارا جوق. قۇقىقتىق تالاپ بويىنشا ناۋقاستان مەدقىزمەتكەر اۋىرعانىن دالەلدەۋگە كەمىندە 40 قۇجات جيناۋى قاجەت. جەرگىلىكتى كوميسسيالاردىڭ جۇمىسى باياۋ.

30 قىركۇيەك كۇنگى رەسمي مالىمەت بويىنشا، قازاقستاندا 182 مەديتسينا قىزمەتكەرى كوروناۆيرۋستان قايتىس بولعان. توقاەۆتىڭ ايتۋىنشا، تەك 37 وتباسىعا عانا وتەماقى تولەنگەن. ال ەڭبەك مينيسترلىگىنىڭ بۇگىنگى دەرەگىنە قاراعاندا، ۆيرۋستان قايتقان 45 دارىگەردىڭ تۋىستارىنا ءتيىستى قارجى بەرىلگەن. پرەزيدەنت پەن مينيسترلىكتىڭ سوزىندەگى قايشىلىق نە ءبىر وتباسىدان بىرنەشە دارىگەر كوز جۇمعان با دەگەن كۇدىك تۋادى.

«مەدقىزمەتكەرلەر ءولىمىنىڭ سەبەبىن انىقتاۋ ءتۇرلى قيىندىق تۋعىزادى، كەيبىرى ەتيكامەن دە بايلانىستى. وسىعان وراي ۇكىمەتكە قايتىس بولعان بارلىق مەديتسينا قىزمەتكەرىنىڭ وتباسىنا وتەماقى تولەۋدى تاپسىرامىن» دەدى ول.

پرەزيدەنت سونىمەن بىرگە كاسىبي مىندەتىن اتقارۋ كەزىندە كوروناۆيرۋس جۇقتىرعان دارىگەرلەرگە دە وتەماقىنى كەشىكتىرمەي تولەۋدى تاپسىرعان.

ۇكىمەتتە ايتىلعان مالىمەتكە سەنسەك، ەلدە 12 830 مەديتسينا قىزمەتكەرى كوروناۆيرۋسقا شالدىققان. ونىڭ 8 مىڭنان استامى ۆيرۋستى قىزمەت بارىسىندا جۇقتىرعانى انىقتالعان.

ەكى مينيسترلىكتىڭ ەكى ءتۇرلى دەرەگى: 88 ملن تەڭگە قايدا؟

ەڭبەك جانە حالىقتى الەۋمەتتىك قورعاۋ مينيسترلىگى بۇگىن پاندەميا كەزىندە كوروناۆيرۋس پەن ونىڭ پنەۆمونيا ءتۇرىن جۇقتىرعان 4494 مىڭعا جۋىق مەديتسينا قىزمەتكەرىنە جانە قايتىس بولعان 45 كادردىڭ تۋىستارىنا مەملەكەت تاراپىنان وتەماقى تولەنگەنىن حابارلاعان. وسى تۇستا ەكى مينيسترلىكتىڭ ورتاسىندا تاعى ءبىر كەراعار دەرەكتى بايقاۋعا بولادى. سەبەبى تاپ وسى كۇنى، 7 قازان وكق الاڭىندا وتكەن بريفينگتە تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ توراعاسى تيمۋر سۇلتانعازيەۆ 4450 مەديتسينا قىزمەتكەرىنە تولەم جاسالعانىن مالىمدەگەن. ساعات 9:00-16:20 ارالىعىندا مينيسترلىك 44 ادامعا وتەماقى بەرىپ ۇلگەرگەن بولسا، وندا دەرەكتىڭ ەسەبى دۇرىس شىعادى.

ەڭبەك مينيسترلىگى: 7 قازان ساعات 9.00-دەگى جاعداي بويىنشا ماسق COVID-19 نەمەسە ۆيرۋستىق پنەۆمونيا جۇقتىرعان 4494 مەديتسينا قىزمەتكەرىنىڭ ءوتىنىشى بويىنشا جانە اۋرۋدىڭ سالدارىنان قايتىس بولعان 45 مەديتسينا قىزمەتكەرىنە قاتىستى اقشالاي قاراجاتتى تاعايىنداۋ مەن تولەۋدى جۇزەگە اسىردى [حابارلاما 7 قازان ساعات 10:20-دا جاريالانعان]

دەنساۋلىق ساقتاۋ مينيسترلىگى: 7 قازاندا اۋرۋ جۇقتىرعان 4450 مەديتسينا قىزمەتكەرىنە 2 ملن. تەڭگە كولەمىندە تولەم جاسالعان. 8442 مەديتسينا قىزمەتكەرى جۇمىستا ءجۇرىپ Covid-19  جۇقتىرعان. سونىمەن قاتار، قايتىس بولعان 45 مەديتسينا قىزمەتكەرىنىڭ وتباسىنا 10 ملن.تەڭگەدەن تولەندى [مالىمدەمە 7 قازان ساعات 16:20-دا جاسالعان]

زاڭ بويىنشا، كوروناۆيرۋس نەمەسە كوروناۆيرۋس پنەۆمونياسىن جۇقتىرعان مەديتسينا قىزمەتكەرىنە – 2 ملن تەڭگە، كوروناۆيرۋستان قايتىس بولعان مەديتسينا قىزمەتكەرىنىڭ وتباسىنا 10 ملن تەڭگە كولەمىندە وتەماقى بەرىلەدى.

ۇكىمەت باسشىسى اسقار ءماميننىڭ 4 قازاندا ۇسىنعان مالىمەتىنشە، قازىرگى تاڭدا ەپيدەمياعا قارسى 46 مىڭنان استام مەديتسينا قىزمەتكەرى تارتىلعان. ۇكىمەتتىڭ جاۋاپتى ۆەدومستۆولارى – دەنمين مەن ەڭبەكمين قىركۇيەك ايىنىڭ اياعىنا دەيىن ءوتىنىمدى تىركەۋ جانە تولەم تاعايىنداۋ جۇمىسىندا سىلبىرلىق تانىتىپ، سوزبۇيداعا سالعاندىقتان وتكەن اپتادا پارلامەنت دەپۋتاتتارى جانە قوعام تاراپىنان سىنعا ۇشىراعان.

"The Qazaq Times"