Qazaqstan kartasındağı ŞQO. Foto: Wikimedia

Şığıs Qazaqstan oblısınıñ işki sayasat basqarmasınıñ basşısı Irina Smit QT redakciyasınıñ saualına bergen jauabında öñirde «infekciya oşaqtarı äli joyılmauı jäne karantin şaralarınıñ saqtalmauı» sebepti koronavirus boyınşa alda kele jatqanın rastadı.

Oblıs aumağında barlığı 8769 adamnan (1 qazandağı derek) koronavirus, 4776 adamnan (30 qırküyektegi derek) koronavirus pnevmoniyası  anıqtalğan. Onıñ 5 mıñnan astamı sipmtomdı, al qalğan 3,7 mıñdayı simptomsız jağday. Qazirgi tañda 8385 adam ayığıp şıqqan. Biraq äkimdik koronavirus pnevmoniyası, nauqastardıñ ahualı jäne ortaşa jası, jınısı turalı tolıq aqparat bermegen.

Bügingi tañda oblıs boyınşa jwqpalı aurularğa şaldıqqan nauqastardı qabıldauğa arnalğan, sıyımdılığı 813 tösek-orın bolatın 29 stacionarlıq medicinalıq mekeme jwmıs atqarıp jatır. Äkimdik basqarmasınıñ basşısı ıqtimal küzgi tolqınğa dayındıq jasalıp jatqanın aytadı.

– Qajet bolğan jağdayda tösek-orın qorı oblıs boyınşa 5910 tösekke deyin wlğaytıluı mümkin. Bwdan basqa, jedel järdem qızmetin kütu uaqıtı men jüktemeni azaytu maqsatında avtoparktegi kölikter sanın 216-ğa köbeytip jatırmız. Onıñ 100-i – byudjet esebinen jäne 116-sı – BRK lizing arqılı. Qazir aymaqta 120 jedel järdem brigadası bar. Oğan qosımşa 377 mobil'di top qwrıldı (114-i qalalarda, 263-i audandarda), – deydi Smit.

Resmi ökildiñ aytuınşa, «qazir tösek-orın qorın qajetti jabdıqtarmen jabdıqtau jäne pacientterdi ottek terapiyasımen tolıq qamtu etu üşin barlıq infekciyalıq jäne köpbeyindi stacionarlarğa ortalıqtandırılğan medicinalıq gaz beru boyınşa jwmıs jürip jatır».

ŞQO-da 931 medicina qızmetkeri auırğan. Onıñ 874-i koronavirusqa, 57-si koronavirus pnevmoniyasına şaldıqqan. 8 qızmetker qaytıs bolğan, ekeui Öskemen qalasınan. Biraq jüzdegen medqızmetkerdiñ nebäri 137-sine ğana ötemaqı tölengen.

Şığıs Qazaqstan oblısınıñ Tauarlar men körsetiletin qızmetterdiñ sapası men qauipsizdigin baqılau departamenti bastığınıñ mindetin atqaruşı Gülayım Tağaeva (Gulyaim Tagaeva) qırküyekte koronavirustıñ 100 mıñ twrğınğa şaqqanda sırqattanuşılıq körsetkişi 36,1-ge jetkenin habarladı.

Departament basşısınıñ sözinşe, «auruşandıq barlıq audandar boyınşa barlıq jerde birkelki».

– Tamız ayınan bastap oblıs boyınşa sırqattanuşılıq tömendey bastadı, 27 qırküyekte 3,7 esege tömendegeni bayqaladı. Qırküyek ayında ösim twraqtı türde 0,2%-da bolğan (tamız ayında ortaşa 0,8%), – deydi Tağaeva.

Qırküyek ayında COVID-19 keysiniñ basqa öñirlermen salıstırğanda köptep tirkeluin «oblıs boyınşa mamır ayınan bastap, karantin ayaqtalğannan keyin, halıq şekteu şaraların saqtaudı toqtatqan kezde aurudıñ köbeyuimen» tüsindiredi.

Ötken aydıñ basınan beri Qazaqstanda koronavirus auruınıñ täuliktik jäne aptalıq körsetkişi boyınşa Şığıs Qazaqstan öñiri birinşi orında keledi. Qazaqstanda nauqastanğandardıñ resmi esebi 141 mıñnan asqan. Pandemiya bastalğalı jalpı jiını virus jwqqandardıñ 2670-i (KVI+ / U07.1 – 1 737, KVI- / U07.2 – 357, ilespe aurulardan – 576) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 576 adamdı jalpı statistikağa qosıp eseptemeydi.

“The Qazaq Times”