شىعىس قازاقستان وبلىسىندا ىندەت نەگە ءورشىپ تۇر؟

شىعىس قازاقستان وبلىسىنىڭ ىشكى ساياسات باسقارماسىنىڭ باسشىسى يرينا سميت QT رەداكتسياسىنىڭ ساۋالىنا بەرگەن جاۋابىندا وڭىردە «ينفەكتسيا وشاقتارى ءالى جويىلماۋى جانە كارانتين شارالارىنىڭ ساقتالماۋى» سەبەپتى كوروناۆيرۋس بويىنشا الدا كەلە جاتقانىن راستادى.

وبلىس اۋماعىندا بارلىعى 8769 ادامنان (1 قازانداعى دەرەك) كوروناۆيرۋس، 4776 ادامنان (30 قىركۇيەكتەگى دەرەك) كوروناۆيرۋس پنەۆمونياسى  انىقتالعان. ونىڭ 5 مىڭنان استامى سيپمتومدى، ال قالعان 3,7 مىڭدايى سيمپتومسىز جاعداي. قازىرگى تاڭدا 8385 ادام ايىعىپ شىققان. بىراق اكىمدىك كوروناۆيرۋس پنەۆمونياسى، ناۋقاستاردىڭ احۋالى جانە ورتاشا جاسى، جىنىسى تۋرالى تولىق اقپارات بەرمەگەن.

بۇگىنگى تاڭدا وبلىس بويىنشا جۇقپالى اۋرۋلارعا شالدىققان ناۋقاستاردى قابىلداۋعا ارنالعان، سىيىمدىلىعى 813 توسەك-ورىن بولاتىن 29 ستاتسيونارلىق مەديتسينالىق مەكەمە جۇمىس اتقارىپ جاتىر. اكىمدىك باسقارماسىنىڭ باسشىسى ىقتيمال كۇزگى تولقىنعا دايىندىق جاسالىپ جاتقانىن ايتادى.

– قاجەت بولعان جاعدايدا توسەك-ورىن قورى وبلىس بويىنشا 5910 توسەككە دەيىن ۇلعايتىلۋى مۇمكىن. بۇدان باسقا، جەدەل جاردەم قىزمەتىن كۇتۋ ۋاقىتى مەن جۇكتەمەنى ازايتۋ ماقساتىندا اۆتوپاركتەگى كولىكتەر سانىن 216-عا كوبەيتىپ جاتىرمىز. ونىڭ 100-ءى – بيۋدجەت ەسەبىنەن جانە 116-سى – برك ليزينگ ارقىلى. قازىر ايماقتا 120 جەدەل جاردەم بريگاداسى بار. وعان قوسىمشا 377 ءموبيلدى توپ قۇرىلدى (114-ءى قالالاردا، 263-ءى اۋدانداردا), – دەيدى سميت.

رەسمي وكىلدىڭ ايتۋىنشا، «قازىر توسەك-ورىن قورىن قاجەتتى جابدىقتارمەن جابدىقتاۋ جانە پاتسيەنتتەردى وتتەك تەراپياسىمەن تولىق قامتۋ ەتۋ ءۇشىن بارلىق ينفەكتسيالىق جانە كوپبەيىندى ستاتسيونارلارعا ورتالىقتاندىرىلعان مەديتسينالىق گاز بەرۋ بويىنشا جۇمىس ءجۇرىپ جاتىر».

شقو-دا 931 مەديتسينا قىزمەتكەرى اۋىرعان. ونىڭ 874-ءى كوروناۆيرۋسقا، 57-ءسى كوروناۆيرۋس پنەۆمونياسىنا شالدىققان. 8 قىزمەتكەر قايتىس بولعان، ەكەۋى وسكەمەن قالاسىنان. بىراق جۇزدەگەن مەدقىزمەتكەردىڭ نەبارى 137-سىنە عانا وتەماقى تولەنگەن.

شىعىس قازاقستان وبلىسىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باستىعىنىڭ مىندەتىن اتقارۋشى گۇلايىم تاعاەۆا (گۋليايم تاگاەۆا) قىركۇيەكتە كوروناۆيرۋستىڭ 100 مىڭ تۇرعىنعا شاققاندا سىرقاتتانۋشىلىق كورسەتكىشى 36,1-گە جەتكەنىن حابارلادى.

دەپارتامەنت باسشىسىنىڭ سوزىنشە، «اۋرۋشاندىق بارلىق اۋداندار بويىنشا بارلىق جەردە بىركەلكى».

– تامىز ايىنان باستاپ وبلىس بويىنشا سىرقاتتانۋشىلىق تومەندەي باستادى، 27 قىركۇيەكتە 3,7 ەسەگە تومەندەگەنى بايقالادى. قىركۇيەك ايىندا ءوسىم تۇراقتى تۇردە 0,2%-دا بولعان (تامىز ايىندا ورتاشا 0,8%), – دەيدى تاعاەۆا.

قىركۇيەك ايىندا COVID-19 كەيسىنىڭ باسقا وڭىرلەرمەن سالىستىرعاندا كوپتەپ تىركەلۋىن «وبلىس بويىنشا مامىر ايىنان باستاپ، كارانتين اياقتالعاننان كەيىن، حالىق شەكتەۋ شارالارىن ساقتاۋدى توقتاتقان كەزدە اۋرۋدىڭ كوبەيۋىمەن» تۇسىندىرەدى.

وتكەن ايدىڭ باسىنان بەرى قازاقستاندا كوروناۆيرۋس اۋرۋىنىڭ تاۋلىكتىك جانە اپتالىق كورسەتكىشى بويىنشا شىعىس قازاقستان ءوڭىرى ءبىرىنشى ورىندا كەلەدى. قازاقستاندا ناۋقاستانعانداردىڭ رەسمي ەسەبى 141 مىڭنان اسقان. پاندەميا باستالعالى جالپى جيىنى ۆيرۋس جۇققانداردىڭ 2670-ءى (كۆي+ / U07.1 – 1 737, كۆي- / U07.2 – 357, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى.

“The Qazaq Times”