Körneki suret. Foto: temofeev.ru

Ötken küni, 23 qırküyekte Qazaqstanda 79 adamnan koronavirus, 228 koronavirus pnevmoniyası anıqtaldı. Sonday-aq, ekeuin qosqanda (U07.1-4, U07.2-1 ölim jağdayı) 5 qazaqstandıq qaytıs bolğanı habarlandı.

Särsenbide tirkelgen 79 adamnıñ eñ köbi ädettegidey ŞQO (21, jartı aydan beri birinşi qatardan körinude) men astanadan (16).  Olar PTR arqılı auruı rastalğandar. Al Aqtöbe, Mañğıstau jäne Jambıl oblıstarında eşbir koronavirus jağdayı tabılmağan.

Biıl jazda «mausım-şilde qırğınına» jol berip alğan Ükimettiñ dereginşe, qazirgi tañda kovid jwqtırğan 3 495 adam (1 810 – auruhanada, 1685 – ambulatorlıq baqılauda) emdelip jatır. Olardıñ 36-sı jasöspirim-bala. Jağdayı naşarlağan 95 nauqastı 15-iniñ ahualı tım auır. 23 nauqas ökpeni jasandı jeldetu apparatımen tınıstap jatır. Vedomstvo aqparatına säykes, keşe 104 adam ayığıp, üyine jiberilgen.

Qazaqstan PTR sınaması körsetpeytin, ökpege ötip ketken koronavirus pnevmoniyasın 1 tamızdan beri bölek esepteydi. Oğan deyingi jıl basınan bergi 256 mıñ pnevmoniya jağdayın jalpı statistikağa qospağan. Biliktiñ bwl qadamın sarapşılar men mamandar, qoğam belsendileri «sayasi manipulyaciya» dep bağalaydı.

Ötken täulikte U07.2 nemese KVI- dep belgilenetin koronavirus pnevmoniyasına şaldıqqan 228 adam jalpı esepke alınğan. Biraq nauqastardıñ ahualı jaylı mälimet belgisiz äri berilmeydi.

1 tamızdan beri koronavirus pnevmoniyasına şaldıqqandar 32 mıñğa juıqtasa,  13 naurızdan beri bilik moyındağan COVID-19 infekciyasın jwqtırğandar qatarı 107 mıñnan asqan.

DDSW mälimetinşe, Qazaqstanda auırğandardıñ sanı 138 542-ge jetken. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı jiını virus jwqqandardıñ 2,6 mıñnan köbi (KVI+ / U07.1 – 1 711, KVI- / U07.2 – 346, ilespe aurulardan – 576) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 576 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

"The Qazaq Times"