وتكەن كۇنى، 23 قىركۇيەكتە قازاقستاندا 79 ادامنان كوروناۆيرۋس، 228 كوروناۆيرۋس پنەۆمونياسى انىقتالدى. سونداي-اق، ەكەۋىن قوسقاندا (U07.1-4, U07.2-1 ءولىم جاعدايى) 5 قازاقستاندىق قايتىس بولعانى حابارلاندى.

سارسەنبىدە تىركەلگەن 79 ادامنىڭ ەڭ كوبى ادەتتەگىدەي شقو (21, جارتى ايدان بەرى ءبىرىنشى قاتاردان كورىنۋدە) مەن استانادان (16).  ولار پتر ارقىلى اۋرۋى راستالعاندار. ال اقتوبە، ماڭعىستاۋ جانە جامبىل وبلىستارىندا ەشبىر كوروناۆيرۋس جاعدايى تابىلماعان.

بيىل جازدا «ماۋسىم-شىلدە قىرعىنىنا» جول بەرىپ العان ۇكىمەتتىڭ دەرەگىنشە، قازىرگى تاڭدا كوۆيد جۇقتىرعان 3 495 ادام (1 810 – اۋرۋحانادا، 1685 – امبۋلاتورلىق باقىلاۋدا) ەمدەلىپ جاتىر. ولاردىڭ 36-سى ءجاسوسپىرىم-بالا. جاعدايى ناشارلاعان 95 ناۋقاستى 15-ءىنىڭ احۋالى تىم اۋىر. 23 ناۋقاس وكپەنى جاساندى جەلدەتۋ اپپاراتىمەن تىنىستاپ جاتىر. ۆەدومستۆو اقپاراتىنا سايكەس، كەشە 104 ادام ايىعىپ، ۇيىنە جىبەرىلگەن.

قازاقستان پتر سىناماسى كورسەتپەيتىن، وكپەگە ءوتىپ كەتكەن كوروناۆيرۋس پنەۆمونياسىن 1 تامىزدان بەرى بولەك ەسەپتەيدى. وعان دەيىنگى جىل باسىنان بەرگى 256 مىڭ پنەۆمونيا جاعدايىن جالپى ستاتيستيكاعا قوسپاعان. بيلىكتىڭ بۇل قادامىن ساراپشىلار مەن ماماندار، قوعام بەلسەندىلەرى «ساياسي مانيپۋلياتسيا» دەپ باعالايدى.

وتكەن تاۋلىكتە U07.2 نەمەسە كۆي- دەپ بەلگىلەنەتىن كوروناۆيرۋس پنەۆمونياسىنا شالدىققان 228 ادام جالپى ەسەپكە الىنعان. بىراق ناۋقاستاردىڭ احۋالى جايلى مالىمەت بەلگىسىز ءارى بەرىلمەيدى.

1 تامىزدان بەرى كوروناۆيرۋس پنەۆمونياسىنا شالدىققاندار 32 مىڭعا جۋىقتاسا،  13 ناۋرىزدان بەرى بيلىك مويىنداعان COVID-19 ينفەكتسياسىن جۇقتىرعاندار قاتارى 107 مىڭنان اسقان.

ددسۇ مالىمەتىنشە، قازاقستاندا اۋىرعانداردىڭ سانى 138 542-گە جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى جيىنى ۆيرۋس جۇققانداردىڭ 2,6 مىڭنان كوبى (كۆي+ / U07.1 – 1 711, كۆي- / U07.2 – 346, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"