Soltüstik öñirlerde qws twmauı kürt köbeydi. Foto: Auıl şaruaşılığı ministrliginiñ baspasöz qızmeti

Düysenbi küni Ortalıq kommunikaciyalar qızmeti alañında ötken brifingte auıl şaruaşılığı vice-ministri Gülmira Isaeva bes öñirdegi 47 eldi mekende 54 mıñ qws qırılğanın mälimdedi.  

Soltüstik Qazaqstan, Aqmola, Pavlodar, Qostanay jäne Qarağandı oblıstarında qws twmauı örşip twr.

«Osı uaqıtqa deyin 47 eldi mekende qws qırıldı. Mwnıñ barlığı bes oblıstıñ 26 audanında bolğan. Jalpı, jeke üylerde ölgen qwstıñ sanı 12 926 basqa jetti. Bwdan bölek, Soltüstik Qazaqstandağı qws fabrikasında 41 mıñ qws qırılıp qaldı. Epizootiyalıq taldau körsetkendey, aurudıñ taraluı soltüstikten oñtüstikke qonıs audaratın jabayı qwstıñ öliminen bastalğan. Birlesken su qoymaların paydalanu arqılı jwqqan. Zerthanalıq zertteulerdiñ nätijeleri boyınşa «joğarı patogendi qws twmauı» diagnozı qoyılğannan keyin respublikalıq qordan vakcina bölindi», – dedi Isaeva ortalıq kommunikaciyalar qızmetinde ötken onlayn brifingte.

Vice-ministrdiñ aytuınşa, Soltüstik Qazaqstan oblısında 27 auılda qws qırılsa da, qauipti virus tağı 23 auılda anıqtalğan. Osığan baylanıstı 17 qırküyekten bastap 7 audanda qws önimderin şığaruğa äzirge şekteu engizildi. Olar:

  • Timiryazev audanı;
  • Jambıl audanı;
  • Qızıljar audanı;
  • Tayınşa audanı;
  • Şal aqın audanı;
  • Ğabit Müsirepov audanı;
  • Mağjan Jwmabaev audanı.

Sonımen qosa, Ayırtau audanınıñ Qaraqamıs auılında şekteuler engizildi. Äzirge Aqmola oblısında Şoyındıköl, Pavlodar oblısında Eñbekşi, Aqtau jäne Trofimovka, Qostanay oblısında Sokol, Mayak jäne Krasnaya Presnya auıldarı qws önimderin şığara almaydı.

Aram ölgen qwstarğa ötemaqı töleudi jüzege asıratın resmi wyım Respublikalıq epizootiyağa qarsı jasaq (REJ) şığınğa wşırağan şarualarğa 390 mln teñge berilmek. Vice-ministrdiñ aytuınşa, eger qwjattar dwrıs räsimdelse, tölem üş künge jetpey beriledi.

Bwğan deyin respublika qorınan 4,7 mln qwsqa 1,4 mln vakcina dozası bölingen. Jaqında tağı 3,5 mln qwsqa 1 mln dozası satıp alınadı. Veterinariyalıq baqılau jäne qadağalau komiteti jıl basında aymaqtarğa 11,8 mln qwstı vakcinaciyalauğa 3,4 mln ekpe wlestirgen. Ministrlik ökili qazirgi tañda 46,7 mln qwstıñ 14,7 mln danası jeke menşik üy aulalarında ösiriletinin aytadı. Onıñ sözinşe,  arnayı jasaqtan qwrılğan komissiyalar öñirlerde indet oşaqtarın zalalsızdandırumen aynalısıp jatır.

«Qwstardıñ öleksesin tazalau, dezinfekciya şaraları meyilinşe qısqa uaqıtta jüzege asırıladı. Bwl qauipti indettiñ özge öñirlerge jayıluına jol bermeude negizgi mäsele», – dedi ministr orınbasarı.

Qws twmauınıñ oşaqtarında bolğan 400-dey adam arnayı medicinalıq baqılauğa alınğan. DenMinge qarastı Tauarlar men körsetiletin qızmetterdiñ sapası men qauipsizdigin baqılau komitetiniñ törağası Timur Swltanğaziev qws eti men jwmırtqa arqılı nemese basqalay kez kelgen jolmen adamğa jwqpaytının habarladı. Sonday-aq, osı uaqıtqa deyin qws twmauına şaldıqqan jağday tirkelmegen.

«Adamnıñ qws twmauın jwqtıruı öte sirek kezdesedi. Sonıñ özinde tiri nemese öli qwspen tikeley baylanıs boluı qajet. Al et nemese jwmırtqa siyaqtı qws önimderi arqılı virustıñ taralu jağdayları tirkelmegen. Büginde qws twmauın jwqtırğan adamdar da joq», – dedi Swltanğaziev.

"The Qazaq Times"