Körneki suret.

21-26 qırküyek aralığında Soltüstik Qazaqstan oblısı Mağjan Jwmabaev audanı Lebyaj'e auılındağı jeti qojalıqta barlığı mıñnan asa qws twmaudan qırılğan. Bwl turalı Azattıq radiosı habarladı.

Basılımnıñ jazuınşa, qırılğan qwstıñ 130-ı tauıq, 290-ğa juığı qaz, 582-si üyrek bolğan. Osıdan keyin Lebyaj'e auılında karantin şaraları qabıldanğan. Endi auıl twrğındar karantin ayaqtalğanşa, qwstarın sata almaydı, etke ötkize almaydı.

"Astanadağı veterinariya boyınşa wlttıq referenttik ortalıqtan kelgen sınaq hattamasına säykes, qws twmauınıñ diagnozi rastaldı. Zertteu jürgizildi. Üy qwstarınıñ twmaudı suda jüzetin jabayı qwstardan jwqtırıp alğanı anıqtaldı" dedi oblıstıq veterinariya basqarmasınıñ bas mamanı Nariman Tasbolatov Azattıq tilşisine.

Tasbolatovtıñ sözinşe, körşi auıldarda da zertteu jwmıstarı jürip jatır, äzirge ol jaqta qwstar arasında twmau tirkelmegen.

Biıl qws twmauımen küres ayasında oblısqa respublikalıq qordan 1 million 242 mıñ 200 doza vakcina bölingen. Twmau anıqtalğan auılda 1584 qwsqa vakcina salınğan. Qws twmauı Soltüstik Qazaqstan oblısınan bıltır da anıqtalğan. Ol kezde aurudan 1,5 million qws qırılıp qalğan.

The Qazaq Times