سولتۇستىك وڭىرلەردە قۇس تۇماۋى كۇرت كوبەيدى. فوتو: اۋىل شارۋاشىلىعى مينيسترلىگىنىڭ ءباسپاسوز قىزمەتى

دۇيسەنبى كۇنى ورتالىق كوممۋنيكاتسيالار قىزمەتى الاڭىندا وتكەن بريفينگتە اۋىل شارۋاشىلىعى ۆيتسە-ءمينيسترى گۇلميرا يساەۆا بەس وڭىردەگى 47 ەلدى مەكەندە 54 مىڭ قۇس قىرىلعانىن مالىمدەدى.  

سولتۇستىك قازاقستان، اقمولا، پاۆلودار، قوستاناي جانە قاراعاندى وبلىستارىندا قۇس تۇماۋى ءورشىپ تۇر.

«وسى ۋاقىتقا دەيىن 47 ەلدى مەكەندە قۇس قىرىلدى. مۇنىڭ بارلىعى بەس وبلىستىڭ 26 اۋدانىندا بولعان. جالپى، جەكە ۇيلەردە ولگەن قۇستىڭ سانى 12 926 باسقا جەتتى. بۇدان بولەك، سولتۇستىك قازاقستانداعى قۇس فابريكاسىندا 41 مىڭ قۇس قىرىلىپ قالدى. ەپيزووتيالىق تالداۋ كورسەتكەندەي، اۋرۋدىڭ تارالۋى سولتۇستىكتەن وڭتۇستىككە قونىس اۋداراتىن جابايى قۇستىڭ ولىمىنەن باستالعان. بىرلەسكەن سۋ قويمالارىن پايدالانۋ ارقىلى جۇققان. زەرتحانالىق زەرتتەۋلەردىڭ ناتيجەلەرى بويىنشا «جوعارى پاتوگەندى قۇس تۇماۋى» دياگنوزى قويىلعاننان كەيىن رەسپۋبليكالىق قوردان ۆاكتسينا ءبولىندى»، – دەدى يساەۆا ورتالىق كوممۋنيكاتسيالار قىزمەتىندە وتكەن ونلاين بريفينگتە.

ۆيتسە-ءمينيستردىڭ ايتۋىنشا، سولتۇستىك قازاقستان وبلىسىندا 27 اۋىلدا قۇس قىرىلسا دا، قاۋىپتى ۆيرۋس تاعى 23 اۋىلدا انىقتالعان. وسىعان بايلانىستى 17 قىركۇيەكتەن باستاپ 7 اۋداندا قۇس ونىمدەرىن شىعارۋعا ازىرگە شەكتەۋ ەنگىزىلدى. ولار:

  • تيميريازەۆ اۋدانى;
  • جامبىل اۋدانى;
  • قىزىلجار اۋدانى;
  • تايىنشا اۋدانى;
  • شال اقىن اۋدانى;
  • عابيت مۇسىرەپوۆ اۋدانى;
  • ماعجان جۇماباەۆ اۋدانى.

سونىمەن قوسا، ايىرتاۋ اۋدانىنىڭ قاراقامىس اۋىلىندا شەكتەۋلەر ەنگىزىلدى. ازىرگە اقمولا وبلىسىندا شويىندىكول، پاۆلودار وبلىسىندا ەڭبەكشى، اقتاۋ جانە تروفيموۆكا، قوستاناي وبلىسىندا سوكول، ماياك جانە كراسنايا پرەسنيا اۋىلدارى قۇس ونىمدەرىن شىعارا المايدى.

ارام ولگەن قۇستارعا وتەماقى تولەۋدى جۇزەگە اسىراتىن رەسمي ۇيىم رەسپۋبليكالىق ەپيزووتياعا قارسى جاساق (رەج) شىعىنعا ۇشىراعان شارۋالارعا 390 ملن تەڭگە بەرىلمەك. ۆيتسە-ءمينيستردىڭ ايتۋىنشا، ەگەر قۇجاتتار دۇرىس راسىمدەلسە، تولەم ءۇش كۇنگە جەتپەي بەرىلەدى.

بۇعان دەيىن رەسپۋبليكا قورىنان 4,7 ملن قۇسقا 1,4 ملن ۆاكتسينا دوزاسى بولىنگەن. جاقىندا تاعى 3,5 ملن قۇسقا 1 ملن دوزاسى ساتىپ الىنادى. ۆەتەريناريالىق باقىلاۋ جانە قاداعالاۋ كوميتەتى جىل باسىندا ايماقتارعا 11,8 ملن قۇستى ۆاكتسيناتسيالاۋعا 3,4 ملن ەكپە ۇلەستىرگەن. مينيسترلىك وكىلى قازىرگى تاڭدا 46,7 ملن قۇستىڭ 14,7 ملن داناسى جەكە مەنشىك ءۇي اۋلالارىندا وسىرىلەتىنىن ايتادى. ونىڭ سوزىنشە،  ارنايى جاساقتان قۇرىلعان كوميسسيالار وڭىرلەردە ىندەت وشاقتارىن زالالسىزداندىرۋمەن اينالىسىپ جاتىر.

«قۇستاردىڭ ولەكسەسىن تازالاۋ، دەزينفەكتسيا شارالارى مەيىلىنشە قىسقا ۋاقىتتا جۇزەگە اسىرىلادى. بۇل قاۋىپتى ىندەتتىڭ وزگە وڭىرلەرگە جايىلۋىنا جول بەرمەۋدە نەگىزگى ماسەلە»، – دەدى مينيستر ورىنباسارى.

قۇس تۇماۋىنىڭ وشاقتارىندا بولعان 400-دەي ادام ارنايى مەديتسينالىق باقىلاۋعا الىنعان. دەنمينگە قاراستى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ توراعاسى تيمۋر سۇلتانعازيەۆ قۇس ەتى مەن جۇمىرتقا ارقىلى نەمەسە باسقالاي كەز كەلگەن جولمەن ادامعا جۇقپايتىنىن حابارلادى. سونداي-اق، وسى ۋاقىتقا دەيىن قۇس تۇماۋىنا شالدىققان جاعداي تىركەلمەگەن.

«ادامنىڭ قۇس تۇماۋىن جۇقتىرۋى وتە سيرەك كەزدەسەدى. سونىڭ وزىندە ءتىرى نەمەسە ءولى قۇسپەن تىكەلەي بايلانىس بولۋى قاجەت. ال ەت نەمەسە جۇمىرتقا سياقتى قۇس ونىمدەرى ارقىلى ۆيرۋستىڭ تارالۋ جاعدايلارى تىركەلمەگەن. بۇگىندە قۇس تۇماۋىن جۇقتىرعان ادامدار دا جوق»، – دەدى سۇلتانعازيەۆ.

"The Qazaq Times"