BWW-nıñ habarlauınşa, Soltüstik Koreya yadrolıq qaru öndirudi toqatqan joq. Phen'yan ballistikalıq zımırandarğa ornatatın şağın yadrolıq qaru türin şığardı degen boljam bar.

Ötken aptada Kim Çen In endi yadrolıq qarudıñ arqasında elde soğıs bastalu qaupi joq ekenin mälimdedi. Biraq şeteldik basılımdar Soltüstik Koreyanıñ bwğan deyin altı yadrolıq qaru şığarğanın jäne onıñ qaupin jazğan.

Soltüstik Koreya 2006 jıldan beri ballistikalıq zımıran jäne yadrolıq qaru şığaradı degen ayıppen BWW sankciyasına ilikken. 2018 jılı The Washington Post gazeti Soltüstik Koreya qarulı küşteri el astanası Phen'yan qalası janındağı zauıttardıñ birinde AQŞ aumağına deyin jete alatın zımırandarın qwrastırıp jatır dep jazğan bolatın. AQŞ barlau qızmetiniñ sputnik arqılı tüsirgen suretterinde KHDR-nıñ birneşe qwrlıqaralıq zımıran qwrastırıp jatqandığı anıq beynelengen. Biraq resmi Uaşington atalğan mäselege baylanıstı eşqanday resmi mälimdeme jasamağan.

Bwğan deyin Halıqaralıq strategiyalıq zertteuler institutı (International Institute for Strategic Studies) Soltüstik Koreyanıñ soñğı zımıran sınaqtarına paydalanılğan qozğaltqış Keñes odağında jobalanğan raketalıq qozğaltqıştarğa wqsaytının aytqan bolatın. Al KHDR zañsız joldarmen Resey nemese Ukraina elderinen zımıran qozğaltqıştarın jetkizgen boluı mümkin degen qorıtındı şığarğan edi.

"The Qazaq Times"