بۇۇ-نىڭ حابارلاۋىنشا، سولتۇستىك كورەيا يادرولىق قارۋ ءوندىرۋدى توقاتقان جوق. پحەنيان بالليستيكالىق زىمىراندارعا ورناتاتىن شاعىن يادرولىق قارۋ ءتۇرىن شىعاردى دەگەن بولجام بار.

وتكەن اپتادا كيم چەن ىن ەندى يادرولىق قارۋدىڭ ارقاسىندا ەلدە سوعىس باستالۋ قاۋپى جوق ەكەنىن مالىمدەدى. بىراق شەتەلدىك باسىلىمدار سولتۇستىك كورەيانىڭ بۇعان دەيىن التى يادرولىق قارۋ شىعارعانىن جانە ونىڭ قاۋپىن جازعان.

سولتۇستىك كورەيا 2006 جىلدان بەرى بالليستيكالىق زىمىران جانە يادرولىق قارۋ شىعارادى دەگەن ايىپپەن بۇۇ سانكتسياسىنا ىلىككەن. 2018 جىلى The Washington Post گازەتى سولتۇستىك كورەيا قارۋلى كۇشتەرى ەل استاناسى پحەنيان قالاسى جانىنداعى زاۋىتتاردىڭ بىرىندە اقش اۋماعىنا دەيىن جەتە الاتىن زىمىراندارىن قۇراستىرىپ جاتىر دەپ جازعان بولاتىن. اقش بارلاۋ قىزمەتىنىڭ سپۋتنيك ارقىلى تۇسىرگەن سۋرەتتەرىندە كحدر-نىڭ بىرنەشە قۇرلىقارالىق زىمىران قۇراستىرىپ جاتقاندىعى انىق بەينەلەنگەن. بىراق رەسمي ۋاشينگتون اتالعان ماسەلەگە بايلانىستى ەشقانداي رەسمي مالىمدەمە جاساماعان.

بۇعان دەيىن حالىقارالىق ستراتەگيالىق زەرتتەۋلەر ينستيتۋتى (International Institute for Strategic Studies) سولتۇستىك كورەيانىڭ سوڭعى زىمىران سىناقتارىنا پايدالانىلعان قوزعالتقىش كەڭەس وداعىندا جوبالانعان راكەتالىق قوزعالتقىشتارعا ۇقسايتىنىن ايتقان بولاتىن. ال كحدر زاڭسىز جولدارمەن رەسەي نەمەسە ۋكراينا ەلدەرىنەن زىمىران قوزعالتقىشتارىن جەتكىزگەن بولۋى مۇمكىن دەگەن قورىتىندى شىعارعان ەدى.

"The Qazaq Times"