Sätbaevtağı zorlau oqiğası: Er adam ömir boyına, äyeli 22 jılğa sottaldı

Bıltır şildede Sätbaevtağı jappay tärtipsizdikke türtki bolğan "bes jasar qız balanı zorlau oqiğası" boyınşa ayıptalğan erli-zayıptılarğa sot ükimi şıqtı. Sot alqası olardıñ birin ömir boyına, endi birin 22 jılğa türmege qamauğa ükim etti. Bwl turalı Azattıq radiosı habarladı.

Azattıqtıñ jazuınşa, sot otırısı jabıq ötken. Sot alqası erli-zayıptını "adam zorladı", kişkentay qızğa "jınıstıq sipattağı zorlıq jasadı" jäne "densaulığına auır zaqım keltirdi" dep taptı. Sottalğandardıñ atı-jöni aytılmadı.

Er adam ömir boyına, äyeli 22 jılğa sottaldı. Ekeui de ömir boyı balalarğa sabaq oqıta almaydı. Sottıñ mälimetinşe, zañ boyınşa äyel adamdarğa ömir boyına türme jazası berilmeydi.

Ayıptau aktisine say, 2020 jılı 23 şildede er adam (tergeu kezinde özine qol salıp qaytıs bolğan – red.) mas küyinde pod'ezd aldında kişkentay qızdı wstap, päterine alıp barğan. Keyin körşisin şaqırıp, qız balanı zorlaudı wsınğan. Körşisi bwl wsınısqa kelisken. Ekeui äyeldi şaqırıp, ol balağa "belgisiz bir därini ekken". Osıdan soñ qız bala esinen tanıp qalğan, al eki erkek qızdı zorlağan.

Osı is boyınşa negizgi ayıptaluşı – 62 jastağı er adam sotqa jetpey köz jwmğan. Ol tergeu izolyatorında öli küyi tabılğan edi. Policiya onıñ suicid jasağanın habarlağan. Basında İİM tek bir adamnıñ wstalğanın aytqan. Keyin erli-zayıptınıñ da qamauğa alınğanı mälim boldı.

Joğalğan kişkentay qız 62 jastağı er adamnıñ päterinen tabılğan soñ Sätbaevta jüzdegen adam osı üydiñ mañına jinalıp, erkekti jauapqa tartpaq bolğan. Birneşe adam küdikti men körşileriniñ päterin qiratqan. Keyin jinalğandar küdiktini policeyler jasırın türde bölimşege alıp ketti degendi estip, policiyağa barğan. Sol jerde policiya ğimaratın qiratıp, 16 kölikti örtegen. Resmi derek boyınşa, 14 twrğın men 50 policey zardap şekken.

Osı tärtipsizdik boyınşa qılmıstıq is qozğalıp, toğız adam üş jılğa türmege qamaldı. 44 adam tört jıl, eki adam bir jarım jıl şarttı jaza aldı. Tört adam "jappay tärtipsizdik wyımdastırdı", eki adam "tärtipsizdikke şaqırdı", 51 adam "tärtipsizdikke aralastı" dep ayıptalğan. 42 ayıptaluşığa "bilik ökiline küş qoldandı" degen de ayıp tağılğan. Ayıptaluşılardıñ barlığı prokurormen processual'dı kelisim jasasqan. Osı is boyınşa eki adamğa izdeu jariyalanğan.

"The Qazaq Times"