Azamattıq belsendi Esjan Kümisbekteginiñ kezekti şerude wstalğan säti. 7 şilde 2019 jıl. Almatı qalası. Foto: QT

Qazaqstannıñ densaulıq saqtau ministri Eljan Birtanov jäne bas prokurorınıñ orınbasarı Bolat Dembaev rwqsat etilmegen miting qarsañında ädettegidey eskertu mänindegi ündeu jariyaladı.

Azamattıq qoğam ökilderi Dempartiya men elde qızmetine sot şeşimimen tıyım salınğan oppoziciyalıq QDT jetekşileri şeru josparlağan kün, yağni 6 mausımnan bastap halıqaralıq  wyımdar, qwqıq qorğauşılar  qarsılıq bildirilgen «Beybit jinalıstar wyımdastıru  jäne ötkizu tärtibi turalı» zañ küşine enbek.

Prokuratura ündeuinde habarlama jasau arqılı ötkizuge bolatın jiınğa deyin on jwmıs küni bwrın jergilikti atqaruşı organğa ötinim beru qajettigi aytılğan. Zañğa säykes äkimdik jeti jwmıs kün işinde jauap beruge mindetti.

Bas prokurordıñ orınbasarı Dembaev beysenbi küngi densaulıq saqtau ministri Birtanovtiñ karantin kezinde köpşilik bolıp jinaluğa, miting ötkizuge tıyım salınğanı jönindegi ündeuin negiz ete söyledi.

Qazaqstandıq jäne halıqaralıq täuelsiz qwqıq qorğauşılar tarapınan köp sınğa wşırağan «sırtı jaña, işi eski» zañ talaptarın alğa tartqan prokuratura «äkimşilik jäne qılmıstıq jauaptılıq közdelgen» deydi.

«Jañadan belgilengen tärtipti bwza otırıp ötkiziletin jinalıstardı wyımdastıru jäne olarğa qatısu zañsız bolıp tabıladı jäne Äkimşilik qwqıq bwzuşılıq turalı kodekstiñ 488-babı boyınşa äkimşilik jauaptılıqqa äkep soqtıradı (tipti 15 täulikke qamauğa aluğa deyin)», – delingen organ ündeuinde.

Sonımen qosa densaulıq saqtau ministri Eljan Birtanov 4 mausımda ötken onlayn brifingte jwrttı virustıñ ekinşi tolqını jürip jatqanda, karantin kezinde mitingige şıqpauğa şaqırğan.

«Karantin kezinde jwrt köp jinalatın şaralarğa tıyım salınadı. Bwl adamdar üşin qauipti. Zañdı saqtau kerek. Pandemiya kezinde, epidemiya kezinde bas sanitarlıq därigerdiñ qaulısın saqtau kerek. Miting wyımdastıruşılarğa aytarım, mwnday şaralardı keyinge şegere twrğan dwrıs. Miting virustıñ jappay tarauına äser etedi. Biz bwğan qarsımız» dedi bas däriger.

Keyingi birneşe jıldan beri el biliginiñ qate qadamdarın jii sınauşı, şetelde twratın oppoziciyalıq sayasatker, «Qazaqstannıñ demokratiyalıq tañdauı» qozğalısınıñ jetekşisi Mwhtar Äblyazov pen «Qazaqstannıñ demokratiyalıq partiyasın» qwrğısı keletin bastamaşıl toptıñ jetekşisi, sayasatker Janbolat Mamay jwrttı 6 mausımğa bilikke qarsı şeruge şaqırğan. Eki jaqtıñ talabı da ärtürli. Biri jüyeni jañartu kerek dese, ekinşisi «jalpıhalıqtıq nesie amnistiyasın jariyalaudı, jerdi satpaq tügili jalğa beruge bolmaytını» turalı talap bildirudi josparlağan.

Boluı ıqtimal miting qarsañında ädettegidey belsendiler ärtürli sebeppen qamaladı. Policiya «basqaşa oylaytın, potencialı bar» belsendilerdi üyinen ne joldan küştep alıp ketetini jasırın emes. Sonıñ biri Şımkent qalasında sayasi közqarası üşin keminde altı ret sottalğan Nwrjan Mwhamedovti ötken ayda ortalıq alañğa şığıp, karantindi toqtatu turalı talabı üşin 3 mausım küni küşpen wstap äketken. Birneşe sağattıñ işinde sot onı 6 künge qamauğa ükim şığarğan. Mwnday mısaldar köp.

«Estitin äri halıq ünine qwlaq türetin memleket» twjırımdamasın wsınğan prezident Toqaevtıñ twsında da mitingiler men piketter ötkizu is jüzinde qiındağan. Öz pikirin aşıq aytqısı kelgen ne aytqan azamattar jii isti bolıp jatadı.

"The Qazaq Times"