6 ماۋسىم: مينيسترلىك پەن پروكۋراتۋرا ميتينگكە قاتىسپاۋعا شاقىردى

قازاقستاننىڭ دەنساۋلىق ساقتاۋ ءمينيسترى ەلجان ءبىرتانوۆ جانە باس پروكۋرورىنىڭ ورىنباسارى بولات دەمباەۆ رۇقسات ەتىلمەگەن ميتينگ قارساڭىندا ادەتتەگىدەي ەسكەرتۋ مانىندەگى ۇندەۋ جاريالادى.

ازاماتتىق قوعام وكىلدەرى دەمپارتيا مەن ەلدە قىزمەتىنە سوت شەشىمىمەن تىيىم سالىنعان وپپوزيتسيالىق قدت جەتەكشىلەرى شەرۋ جوسپارلاعان كۇن، ياعني 6 ماۋسىمنان باستاپ حالىقارالىق  ۇيىمدار، قۇقىق قورعاۋشىلار  قارسىلىق بىلدىرىلگەن «بەيبىت جينالىستار ۇيىمداستىرۋ  جانە وتكىزۋ ءتارتىبى تۋرالى» زاڭ كۇشىنە ەنبەك.

پروكۋراتۋرا ۇندەۋىندە حابارلاما جاساۋ ارقىلى وتكىزۋگە بولاتىن جيىنعا دەيىن ون جۇمىس كۇنى بۇرىن جەرگىلىكتى اتقارۋشى ورگانعا ءوتىنىم بەرۋ قاجەتتىگى ايتىلعان. زاڭعا سايكەس اكىمدىك جەتى جۇمىس كۇن ىشىندە جاۋاپ بەرۋگە مىندەتتى.

باس پروكۋروردىڭ ورىنباسارى دەمباەۆ بەيسەنبى كۇنگى دەنساۋلىق ساقتاۋ ءمينيسترى ءبىرتانوۆتىڭ كارانتين كەزىندە كوپشىلىك بولىپ جينالۋعا، ميتينگ وتكىزۋگە تىيىم سالىنعانى جونىندەگى ۇندەۋىن نەگىز ەتە سويلەدى.

قازاقستاندىق جانە حالىقارالىق تاۋەلسىز قۇقىق قورعاۋشىلار تاراپىنان كوپ سىنعا ۇشىراعان «سىرتى جاڭا، ءىشى ەسكى» زاڭ تالاپتارىن العا تارتقان پروكۋراتۋرا «اكىمشىلىك جانە قىلمىستىق جاۋاپتىلىق كوزدەلگەن» دەيدى.

«جاڭادان بەلگىلەنگەن ءتارتىپتى بۇزا وتىرىپ وتكىزىلەتىن جينالىستاردى ۇيىمداستىرۋ جانە ولارعا قاتىسۋ زاڭسىز بولىپ تابىلادى جانە اكىمشىلىك قۇقىق بۇزۋشىلىق تۋرالى كودەكستىڭ 488-بابى بويىنشا اكىمشىلىك جاۋاپتىلىققا اكەپ سوقتىرادى ء(تىپتى 15 تاۋلىككە قاماۋعا الۋعا دەيىن)»، – دەلىنگەن ورگان ۇندەۋىندە.

سونىمەن قوسا دەنساۋلىق ساقتاۋ ءمينيسترى ەلجان ءبىرتانوۆ 4 ماۋسىمدا وتكەن ونلاين بريفينگتە جۇرتتى ۆيرۋستىڭ ەكىنشى تولقىنى ءجۇرىپ جاتقاندا، كارانتين كەزىندە ميتينگىگە شىقپاۋعا شاقىرعان.

«كارانتين كەزىندە جۇرت كوپ جينالاتىن شارالارعا تىيىم سالىنادى. بۇل ادامدار ءۇشىن قاۋىپتى. زاڭدى ساقتاۋ كەرەك. پاندەميا كەزىندە، ەپيدەميا كەزىندە باس سانيتارلىق دارىگەردىڭ قاۋلىسىن ساقتاۋ كەرەك. ميتينگ ۇيىمداستىرۋشىلارعا ايتارىم، مۇنداي شارالاردى كەيىنگە شەگەرە تۇرعان دۇرىس. ميتينگ ۆيرۋستىڭ جاپپاي تاراۋىنا اسەر ەتەدى. ءبىز بۇعان قارسىمىز» دەدى باس دارىگەر.

كەيىنگى بىرنەشە جىلدان بەرى ەل بيلىگىنىڭ قاتە قادامدارىن ءجيى سىناۋشى، شەتەلدە تۇراتىن وپپوزيتسيالىق ساياساتكەر، «قازاقستاننىڭ دەموكراتيالىق تاڭداۋى» قوزعالىسىنىڭ جەتەكشىسى مۇحتار ءابليازوۆ پەن «قازاقستاننىڭ دەموكراتيالىق پارتياسىن» قۇرعىسى كەلەتىن باستاماشىل توپتىڭ جەتەكشىسى، ساياساتكەر جانبولات ماماي جۇرتتى 6 ماۋسىمعا بيلىككە قارسى شەرۋگە شاقىرعان. ەكى جاقتىڭ تالابى دا ءارتۇرلى. ءبىرى جۇيەنى جاڭارتۋ كەرەك دەسە، ەكىنشىسى «جالپىحالىقتىق نەسيە امنيستياسىن جاريالاۋدى، جەردى ساتپاق تۇگىلى جالعا بەرۋگە بولمايتىنى» تۋرالى تالاپ ءبىلدىرۋدى جوسپارلاعان.

بولۋى ىقتيمال ميتينگ قارساڭىندا ادەتتەگىدەي بەلسەندىلەر ءارتۇرلى سەبەپپەن قامالادى. پوليتسيا «باسقاشا ويلايتىن، پوتەنتسيالى بار» بەلسەندىلەردى ۇيىنەن نە جولدان كۇشتەپ الىپ كەتەتىنى جاسىرىن ەمەس. سونىڭ ءبىرى شىمكەنت قالاسىندا ساياسي كوزقاراسى ءۇشىن كەمىندە التى رەت سوتتالعان نۇرجان مۇحامەدوۆتى وتكەن ايدا ورتالىق الاڭعا شىعىپ، كارانتيندى توقتاتۋ تۋرالى تالابى ءۇشىن 3 ماۋسىم كۇنى كۇشپەن ۇستاپ اكەتكەن. بىرنەشە ساعاتتىڭ ىشىندە سوت ونى 6 كۇنگە قاماۋعا ۇكىم شىعارعان. مۇنداي مىسالدار كوپ.

«ەستيتىن ءارى حالىق ۇنىنە قۇلاق تۇرەتىن مەملەكەت» تۇجىرىمداماسىن ۇسىنعان پرەزيدەنت توقاەۆتىڭ تۇسىندا دا ميتينگىلەر مەن پيكەتتەر وتكىزۋ ءىس جۇزىندە قيىنداعان. ءوز پىكىرىن اشىق ايتقىسى كەلگەن نە ايتقان ازاماتتار ءجيى ءىستى بولىپ جاتادى.

"The Qazaq Times"