Azamattıq belsendi Dulat Ağadil "öliminiñ sayasi sipatı bar" dep sanaytın Gülbaraş Jolmwhambetova prezident Toqaevpen kezdesudi swraydı. Foto: aşıq derekköz

Türmede belgisiz jağdayda qaza bolğan azamattıq belsendi Dulat Ağadildiñ öliminen üş ay ötti. Mausımnıñ 1-i marqwmnıñ anası jäne bir top belsendi prezident äkimşiligi men prokuraturağa barıp, «negizsiz toqtağan isti qayta tergeu» turalı talap-arız ötkizdi.

Ölimi qoğamdıq rezonans tudırğan Dulattıñ anası Gülbaraş Jolmwhambetova Azattıqqa prezident Toqaevtıñ äkimşilik keñsesine ündeui men qabıldauın swrağan hatın resmi türde tapsırğanın aytqan.

– Men prezident Qasım-Jomart Toqaev balamnıñ ölimine qatıstı aldın ala pikir aytu arqılı tergeudi basqa jaqqa bwrdı dep sanaymın. Bwl oyımdı 31 mamır sayasi qwğın-sürgin qwrbandarı künine aşıq hat etip äleumettik jelide arnayı jariyaladım. Sebebi wlım Dulat Ağadildi de sol sayasi quğınnıñ qwrbanı dep esepteymin. Sondıqtan prezidentpen jüzdeskim keledi, – deydi artında altı balası qalğan belsendiniñ anası.

Bwdan bölek ol wlınıñ öler aldındağı säti beynelegen türmedegi videosın berudi jäne «onıñ ölimine kinäli sanaytın qwqıq qorğau organdarı qızmetkerlerin jauap alıp, prokuraturanıñ äreketsizdigine şara qoldanudı swrağan» arız ötkizdi.

Perzentiniñ qwnın daulağan Jolmwhambetova advokatı Ğalım Nwrpeyisovpen birge astana prokuraturası «qılmıs qwramı joq» sanap toqtatqan isti qayta aşudı talap etip, prokuratura şeşimine şağımdanatının da ayttı. Sonday-aq eldegi azamattıq qoğam belsendileri de izolyatorğa ayaqtay kirip, kebinmen şıqqan Ağadildiñ öliminde «sayasi astar bar» dep sanap, ädil şeşim jolında kürese beretinin jetkizdi. Al bas prokuratura bwğan qatıstı eşqanday jauap bermedi.

Bwğan deyin 24 aqpan keşkisin sağat 20:48-de formasız kelgen bir top policey «sotqa til tigizdi» degen ayıppen  Dulat Ağadildi «eşqayda ketpeu» şarası retinde üyinen alıp ketken edi. Biraq nebäri 30 şaqırımğa jeter-jetpes qaşıqtıqtağı izolyatorğa tüngi sağat 00:00 şamasında jetkizilip, erteñine, yağni aqpannıñ 25-i küni qaytıs bolğan. Qwzırlı organdar sol küni-aq azamattıq qwqıq pen demokratiyalıq qwndılıqtardıñ orındaluın talap etip, birneşe ret sottalğan belsendiniñ ölim sebebin «jürek qan tamırlarınıñ jetispeuşiligi» dep atağan.

Äleumettik jeli qoldanuşıları men Dulat Ağadildiñ qazasın aza twtqan astana, Almatı, Şımkent, Aqtöbe, Oral, Taraz qalalarına jinalğan belsendiler onı jürekten qayttı degen «resmi nwsqağa» senbeytinin, bwrın-soñdı densaulığına qatıstı şağımı bolmağanın aytıp edi. Ağadildiñ ruhın joqtağan, istiñ ädil äri aşıq jüruin talap etken jwrt birneşe kün boyı jinalıp prezident Toqaevtıñ, işki ister ministri Twrğımbaevtıñ atına talap-arız joldağan. Alayda eşqanday resmi jauap berilmedi.

Dulat Ağadildiñ «...sottaluğa da dayınmın. Öltirip te, wrıp ta, pışaqtap ta ketui mümkin. Mwnı istese, arnayı qızmetter ğana isteydi. Köşedegi bireu istemeydi. Öytkeni men köşede betaldı jürmeymin, araq işpeymin, temeki şekpeymin, basqa bireudiñ ala jibin attağan emespin, wrlıq jasmaymın. Sondıqtan mwnday äñgimeler bolıp jatsa, sabırlıq saqtap senbeñizder» dep biliktiñ arnayı küştik qwrılımınan seziktenetin äri qastandıq jasaluı ıqtimal ekenin aytqan beyneündeui internette tarağan.

Artında 6 birdey balası qalğan Dulat Ağadil – äleumettik problemalar jäne azamattıq qwqıqtı saqtau mäselesin köterip jürgen belsendi. Biıl tamız ayınan beri birneşe äkimşilik jazağa tartılıp, kem degende 60 täulik qamauda otırğan.

Belsendiniñ qazasına baylanıstı AQŞ memlekettik departamentiniñ ökili, Wlıbritaniya elşiligi jäne Europadağı qauipsizdik pen ıntımaqtastıq wyımı Qazaqstan biligin  tergeudi aşıq äri ädil jürgizuge şaqırğan. Qazaqstandıq qwqıq qorğauşılar da Dulat Ağadildiñ qazasın «sayasi sipatı bar» dep sanaytının aytqan.

Degenmen ötken beysenbide, 28 mamır küni astana prokuraturası azamattıq belsendi Dulat Ağadildiñ ölimine qatıstı is toqtağanın habarlağan.

"The Qazaq Times"