Körneki suret. Foto: VVS suretşisi Çarli N'yulendanıñ illyustraciyası.

Eldiñ 13 öñirinde 211 medicina qızmetkeri koronavirus infekciyasın qaydan qalay jwqtırıp jür? 

Densaulıq saqtau ministrligine qaraytın Tauarlar men körsetiletin qızmetterdiñ sapası men qauipsizdigin baqılau komitetiniñ törağası Lyudmila Byurabekova eldegi är bes nauqastıñ bireui medqızmetker ekenin mälimdedi.

Därigerlerdiñ sırqattanuınıñ negizgi sebepteri:

  • jeke qorğanış zattarımen, dezinfekciyalau qwraldarımen qamtamasız etilmegen, medicinalıq mekeme basşıları twraqtı nwsqaulıq jürgizbeydi;
  • nısandardıñ tehnikalıq jay-küyi köbinese qajetti talaptarğa säykes kelmeydi – taza jäne las aymaqtarğa naqtı bölinbegen;
  • eñbek rejiminiñ bwzıluı: stacionarda täulik boyı bolu, merzimnen tıs artıq jwmıs isteu.

Komitet törağası:

– Medicina qızmetkerleriniñ arasında Covid-19 indetine nemqwraylı qaraytındarı bar. Mısalı, elimizdiñ bas sanitarlıq därigeri Ayjan Serikbayqızı bügin Temirtau jwqpalı aurular auruhanasında bolıp, ondağı qızmetkerlerdiñ koronavirustıq infekciyasına wqsas belgileri bar şağımdanuşılardı eş saqtıq şaraların qoldanbastan, baqılausız därigerge jiberip otırğanın körgen, – dedi Lyudmila Byurabekova.

Tipti tauarlar men körsetiletin qızmetterdiñ sapası men qauipsizdigin baqılau komitetiniñ SEQ 21 mamanı dertke şaldıqqan. Virustı jwqtırğandardıñ köbi astanalıq SEQ qızmetinen – 11 adam, Almatıdan – 7 adam.  Sonday-aq 74 medicina qızmetkeri COVID-19 virusın beyindi stacionarlarda em qabıldap jatqan nauqastardan jwqtırğan. Qazir olardıñ 20-sı karatin ortalığında, 10-ı provizorlıq stacionarda, 44-i jwqpalı aurular auruhanasında jatır.

Şwğıl ştabtıñ mälimeti boyınşa, jwqpalı dert jwqtırğandar sanı mıñğa tayadı. 110 adam sauığıp şıqsa, qaytıs bolğandar 12-ge jetti. Älemdegi keyster sanı jağınan Qazaqstan äzirge 72-orınğa twraqtadı. Keşe, bir künniñ özinde 86 nauqas anıqtaldı. Al bügin 2 adam qaytıs boldı. Nauqastardıñ eñ köbi astanada (257 keys), ekinşi indet oşağı – Almatıda 172, Qızılorda oblısında 119, Qarağandı oblısında 76 jäne Aqmola oblısında 71 nauqas tirkeldi.  Sonday-aq basqa öñirlerden:

  • Atırau oblısı – 59;
  • Jambıl oblısı – 46;
  • Türkistan oblısı – 43;
  • Şımkent qalası – 38;
  • Soltüstik Qazaqstan oblısı – 26;
  • Almatı oblısı – 21;
  • Aqtöbe oblısı – 11;
  • Mañğıstau oblısı – 10;
  • Pavlodar oblısı – 10;
  • Batıs Qazaqstan oblısı – 9;
  • Şığıs Qazaqstan oblısı – 8;
  • Qostanay oblısı – 3 nauqas anıqtaldı.

Qazaqstanda dert jwğımdalğan 972 nauqastıñ 20,5%-ı medqızmetkerlerdiñ boluı qoğam alañdauşılığın tudırıp otır. Äleumettik jeli qoldanuşıları naurızdan beri BAQ betterinde "bärine dayınbız, qamdandıq" dep jii atqan densaulıq saqtau ministrliginiñ ökilderiniñ sözin sınğa alıp jatır.

“The Qazaq Times”