قازاقستانداعى ناۋقاستاردىڭ بەستەن ءبىر بولىگى – مەدقىزمەتكەرلەر

ەلدىڭ 13 وڭىرىندە 211 مەديتسينا قىزمەتكەرى كوروناۆيرۋس ينفەكتسياسىن قايدان قالاي جۇقتىرىپ ءجۇر؟ 

دەنساۋلىق ساقتاۋ مينيسترلىگىنە قارايتىن تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ توراعاسى ليۋدميلا بيۋرابەكوۆا ەلدەگى ءار بەس ناۋقاستىڭ بىرەۋى مەدقىزمەتكەر ەكەنىن مالىمدەدى.

دارىگەرلەردىڭ سىرقاتتانۋىنىڭ نەگىزگى سەبەپتەرى:

• جەكە قورعانىش زاتتارىمەن، دەزينفەكتسيالاۋ قۇرالدارىمەن قامتاماسىز ەتىلمەگەن، مەديتسينالىق مەكەمە باسشىلارى تۇراقتى نۇسقاۋلىق جۇرگىزبەيدى;
• نىسانداردىڭ تەحنيكالىق جاي-كۇيى كوبىنەسە قاجەتتى تالاپتارعا سايكەس كەلمەيدى – تازا جانە لاس ايماقتارعا ناقتى بولىنبەگەن;
• ەڭبەك رەجيمىنىڭ بۇزىلۋى: ستاتسيوناردا تاۋلىك بويى بولۋ، مەرزىمنەن تىس ارتىق جۇمىس ىستەۋ.

كوميتەت توراعاسى:

– مەديتسينا قىزمەتكەرلەرىنىڭ اراسىندا Covid-19 ىندەتىنە نەمقۇرايلى قارايتىندارى بار. مىسالى، ەلىمىزدىڭ باس سانيتارلىق دارىگەرى ايجان سەرىكبايقىزى بۇگىن تەمىرتاۋ جۇقپالى اۋرۋلار اۋرۋحاناسىندا بولىپ، ونداعى قىزمەتكەرلەردىڭ كوروناۆيرۋستىق ينفەكتسياسىنا ۇقساس بەلگىلەرى بار شاعىمدانۋشىلاردى ەش ساقتىق شارالارىن قولدانباستان، باقىلاۋسىز دارىگەرگە جىبەرىپ وتىرعانىن كورگەن، – دەدى ليۋدميلا بيۋرابەكوۆا.

ءتىپتى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ سەق 21 مامانى دەرتكە شالدىققان. ۆيرۋستى جۇقتىرعانداردىڭ كوبى استانالىق سەق قىزمەتىنەن – 11 ادام، الماتىدان – 7 ادام.  سونداي-اق 74 مەديتسينا قىزمەتكەرى COVID-19 ۆيرۋسىن بەيىندى ستاتسيونارلاردا ەم قابىلداپ جاتقان ناۋقاستاردان جۇقتىرعان. قازىر ولاردىڭ 20-سى كاراتين ورتالىعىندا، 10-ى پروۆيزورلىق ستاتسيوناردا، 44-ءى جۇقپالى اۋرۋلار اۋرۋحاناسىندا جاتىر.

شۇعىل شتابتىڭ مالىمەتى بويىنشا، جۇقپالى دەرت جۇقتىرعاندار سانى مىڭعا تايادى. 110 ادام ساۋىعىپ شىقسا، قايتىس بولعاندار 12-گە جەتتى. الەمدەگى كەيستەر سانى جاعىنان قازاقستان ازىرگە 72-ورىنعا تۇراقتادى. كەشە، ءبىر كۇننىڭ وزىندە 86 ناۋقاس انىقتالدى. ال بۇگىن 2 ادام قايتىس بولدى. ناۋقاستاردىڭ ەڭ كوبى استانادا (257 كەيس), ەكىنشى ىندەت وشاعى – الماتىدا 172, قىزىلوردا وبلىسىندا 119, قاراعاندى وبلىسىندا 76 جانە اقمولا وبلىسىندا 71 ناۋقاس تىركەلدى.  سونداي-اق باسقا وڭىرلەردەن:

• اتىراۋ وبلىسى – 59;
• جامبىل وبلىسى – 46;
• تۇركىستان وبلىسى – 43;
• شىمكەنت قالاسى – 38;
• سولتۇستىك قازاقستان وبلىسى – 26;
• الماتى وبلىسى – 21;
• اقتوبە وبلىسى – 11;
• ماڭعىستاۋ وبلىسى – 10;
• پاۆلودار وبلىسى – 10;
• باتىس قازاقستان وبلىسى – 9;
• شىعىس قازاقستان وبلىسى – 8;
• قوستاناي وبلىسى – 3 ناۋقاس انىقتالدى.

قازاقستاندا دەرت جۇعىمدالعان 972 ناۋقاستىڭ 20,5%-ى مەدقىزمەتكەرلەردىڭ بولۋى قوعام الاڭداۋشىلىعىن تۋدىرىپ وتىر. الەۋمەتتىك جەلى قولدانۋشىلارى ناۋرىزدان بەرى باق بەتتەرىندە "بارىنە دايىنبىز، قامداندىق" دەپ ءجيى اتقان دەنساۋلىق ساقتاۋ مينيسترلىگىنىڭ وكىلدەرىنىڭ ءسوزىن سىنعا الىپ جاتىر.

“The Qazaq Times”