AQŞ-tağı dükender de bos qaldı. Foto: BBC.

Bükil älemge tarap jatqan indetke baylanıstı elimizde 30 jıldan beri alğaş ret twtas el kölemindegi tötenşe jağday jariyalandı. Sol-aq eken äsirese qala twrğındarı jappay azıq-tülik dükenderine ağılıp, işpek-jemekterin tolıqtauğa kiristi. Tipti keybir azıq-tülik dükenderiniñ söreleri qañırap bos qaldı. Ükimet adamdarı jwrttı sabırğa şaqırğanımen, abdırağan jwrttıñ ekpini basılğan joq.

Degenmen, bwnday jağday tek bizdiñ elde ğana bolıp jatqan joq. Jaña koronavirus taralıp, köptegen elde tötenşe jağday jariyalanğannan beri äleumettik jelilerde azıq-tülik tügendep wzınnan wzaq kezekke twrğan jwrttardıñ sureti köptep jariyalanuda. Tipti, halıqtıñ jappay zat satıp aluı keybir elderde azıq-tüliktiñ jetispeuşiligin tudırdı. Onıñ qatarında, Australiya, AQŞ, Britaniya, Oñtüstik Afrika jäne Resey de bar. Atalğan el ükimetteri elde azıq-tüliktiñ jetispey jatqanın mälimdeude.

Mel'burındağı düken. 17 naurız.

Köptegen elde jetispey jatqan zattar ortaq, aytalıq:

  • Antibakteriyalıq zattar jäne qol juuğa arnalğan sabındar;
  • Därethana qağazdarı jäne qağaz sülgiler (salfetka);
  • Wzaq uaqıtqa deyin saqtauğa bolatın süt önimderi;
  • Makaron;
  • Jemis-jidekter men kökönister;
  • Küriş;
  • Däri-därmekter.

Ükimetter halıqtı dürbeleñge tüspeuge qanşa şaqırğanımen onıñ önimi az bolıp jatır. Australiya prem'eri resmi mälimdeme arqılı el azamattarın dükenderge ağıluın toqtatuğa tırıstı. «Toqtatıñdar, bwl aqılsızdıq. Eşqanday kömegi bolmaydı», – dedi prem'er-ministri Skott Morrison.

Tek Australiya ğana emes, özge memleketterdiñ biligi de bwl dürbeleñge qarsı ayrıqşa şaralar qoldanuğa köşti.

Psihologtar bwnday jappay alañdauşılıqtı toqtatudıñ qiın ekenin aytuda. Älemnıñ barlıq aqparat qwraldarı arqılı tarap jatqan indet jayındağı aqparattardan keyin köpşilik jwrt öz sabırın tauısıp jatqanın alğa tartadı.

“The Qazaq Times”