اقش-تاعى دۇكەندەر دە بوس قالدى. فوتو: BBC.

بۇكىل الەمگە تاراپ جاتقان ىندەتكە بايلانىستى ەلىمىزدە 30 جىلدان بەرى العاش رەت تۇتاس ەل كولەمىندەگى توتەنشە جاعداي جاريالاندى. سول-اق ەكەن اسىرەسە قالا تۇرعىندارى جاپپاي ازىق-تۇلىك دۇكەندەرىنە اعىلىپ، ىشپەك-جەمەكتەرىن تولىقتاۋعا كىرىستى. ءتىپتى كەيبىر ازىق-تۇلىك دۇكەندەرىنىڭ سورەلەرى قاڭىراپ بوس قالدى. ۇكىمەت ادامدارى جۇرتتى سابىرعا شاقىرعانىمەن، ابدىراعان جۇرتتىڭ ەكپىنى باسىلعان جوق.

دەگەنمەن، بۇنداي جاعداي تەك ءبىزدىڭ ەلدە عانا بولىپ جاتقان جوق. جاڭا كوروناۆيرۋس تارالىپ، كوپتەگەن ەلدە توتەنشە جاعداي جاريالانعاننان بەرى الەۋمەتتىك جەلىلەردە ازىق-تۇلىك تۇگەندەپ ۇزىننان ۇزاق كەزەككە تۇرعان جۇرتتاردىڭ سۋرەتى كوپتەپ جاريالانۋدا. ءتىپتى، حالىقتىڭ جاپپاي زات ساتىپ الۋى كەيبىر ەلدەردە ازىق-تۇلىكتىڭ جەتىسپەۋشىلىگىن تۋدىردى. ونىڭ قاتارىندا، اۋستراليا، اقش، بريتانيا، وڭتۇستىك افريكا جانە رەسەي دە بار. اتالعان ەل ۇكىمەتتەرى ەلدە ازىق-تۇلىكتىڭ جەتىسپەي جاتقانىن مالىمدەۋدە.

مەلبۋرىنداعى دۇكەن. 17 ناۋرىز.

كوپتەگەن ەلدە جەتىسپەي جاتقان زاتتار ورتاق، ايتالىق:

  • انتيباكتەريالىق زاتتار جانە قول جۋعا ارنالعان سابىندار;
  • دارەتحانا قاعازدارى جانە قاعاز سۇلگىلەر (سالفەتكا);
  • ۇزاق ۋاقىتقا دەيىن ساقتاۋعا بولاتىن ءسۇت ونىمدەرى;
  • ماكارون;
  • جەمىس-جيدەكتەر مەن كوكونىستەر;
  • كۇرىش;
  • ءدارى-دارمەكتەر.

ۇكىمەتتەر حالىقتى دۇربەلەڭگە تۇسپەۋگە قانشا شاقىرعانىمەن ونىڭ ءونىمى از بولىپ جاتىر. اۋستراليا پرەمەرى رەسمي مالىمدەمە ارقىلى ەل ازاماتتارىن دۇكەندەرگە اعىلۋىن توقتاتۋعا تىرىستى. «توقتاتىڭدار، بۇل اقىلسىزدىق. ەشقانداي كومەگى بولمايدى»، – دەدى پرەمەر-ءمينيسترى سكوتت مورريسون.

تەك اۋستراليا عانا ەمەس، وزگە مەملەكەتتەردىڭ بيلىگى دە بۇل دۇربەلەڭگە قارسى ايرىقشا شارالار قولدانۋعا كوشتى.

پسيحولوگتار بۇنداي جاپپاي الاڭداۋشىلىقتى توقتاتۋدىڭ قيىن ەكەنىن ايتۋدا. الەمنىڭ بارلىق اقپارات قۇرالدارى ارقىلى تاراپ جاتقان ىندەت جايىنداعى اقپاراتتاردان كەيىن كوپشىلىك جۇرت ءوز سابىرىن تاۋىسىپ جاتقانىن العا تارتادى.

“The Qazaq Times”