TJ kezindegi tekseris. Foto: Reuters / Yonhap

Prezident Qasım-Jomart Toqaev koronavirus indetiniñ örşuine baylanıstı Qazaqstan aumağında tötenşe jağday jariyaladı.

Prezident şaşqan №285 jarlıqta «Düniejüzilik densaulıq saqtau wyımınıñ jaña COVID-19 koronavirusın pandemiya dep jariyalauına baylanıstı azamattardıñ ömiri men densaulığın qorğau maqsatında Qazaqstannıñ barlıq aumağında 2020 jıldıñ 16 naurız sağat 8.00-den bastap, 2020 jıldıñ 15 säuir sağat 7.00-ne deyin tötenşe jağday engizilsin» delingen.

Aqordadan kelgen pärmen boyınşa prezidenti janındağı Tötenşe jağday rejimin qamtamasız etu jönindegi memlekettik komissiyanıñ qwramı bekitildi. Oğan ükimet bastığı törağalıq etedi. Komissiya qwramına PÄ basşısınıñ orınbasarı M.Mırzalin, bas prokuror Ğ.Nwrdäuletov, WQK törağası K.Mäsimov, parlament orınbasarları A.Şäkirov pen V.Bojko, işki ister ministri E.Twrğımbaev, qorğanıs ministri N.Ermekbaev, aqparat ministri D.Abaev t.b. ükimet müşeleri kirgen.

Äzirge 31 künge sozılatın tötenşe jağday kezinde birqatar şekteuler engizilmek:

  • qoğamdıq tärtiptiñ saqtaluı, asa mañızdı memlekettik jäne strategiyalıq nısandardıñ küzeti küşeyedi;
  • iri sauda nısandarınıñ jwmıs isteuine şekteu qoyıladı;
  • sauda oyın-sauıq ortalığı, kinoteatr, teatr, körmeniñ jäne kisi köp jinalatın basqa da orındardıñ qızmeti toqtaydı;
  • karantin engizsin, sanitariyalıq-epidemiyağa qarsı auqımdı is-amaldar atqarıladı;
  • oyın-sauıq,  sporttıq  jäne basqa da bwqaralıq, otbasılıq,  salt-dästür jiın-jobalar ötkizuge tıyım salınadı;
  • keybir erekşe sanattağı ökilderdi qospağanda, el aumağına köliktiñ barlıq türimen kiruge, sonday-aq onıñ aumağınan şığuğa şekteu qoyıladı.

Jeksenbi küngi tüstegi resmi mälimet boyınşa, Qazaqstanda 8 adam koronavirusqa şaldıqqan.

"The Qazaq Times"