COVID-19 jaña koronavirusı tirkelgen elder sanı 105-ke, key derkterde 119-ğa jetken. Älem boyınşa virustı 118226 adam jwqtırıp, 4238 adam ajal qwşqan. Düniejüzilik densaulıq saqtau wyımı atalğan virus pandemiyağa aynaluı bek mümkin dep dabıl qağıp otır. Jahanğa tarağan qauipti indettiñ soñğı derekteri men bügingi hal-ahualğa zer salsaq.

Koronaviruske qarsı saqtıq şaraların küşeytu üşin Europalıq odaq 25 mlrd euro köleminde investiciyalıq qor qwratını mälim boldı. Osığan baylanıstı odaqqa müşe elder Italiya men Bel'giyada indetten zardap şekken biznes-kompaniyalarğa ötemaqı töleu jağın qarastırıp jatır. Sonımen qatar, ğılımi zertteuge 100 million euro bölinetin boldı.

Eurokomissiya basşısı Ursula fon der Lyayen: «Koronaviruspen küresu üşin investiciyalıq qor qwrmaqpız. Ol densaulıq saqtau salası men şağın jäne orta käsiporındardı, sonday-aq eñbek narığın qoldauğa negizdeledi. Jalpı bwl qorğa 25 milliard euro qwyu közdelgen. Bastapqıda oğan 7,5 milliard euro bölinedi», – deydi.

Europada koronavirustı jwqtırudıñ eñ köp oqiğası Italiyada tirkeldi: 10149 adam virus jwqtırsa, 631 adam qaytıs bolğan. Osı aptada Italiyanıñ soltüstigindegi 15 aymaq tolıq karantinge jabıldı. Säuirge deyin barlıq şaralar toqtatıldı. Elde qazir viruspen küresu üşin zeynetke şığıp ketken därigerler qayta jwmısqa oralıp jatır. Osığan deyin Düniejüzilik densaulıq saqtau wyımı Italiya biligin viruspen küresudi küşeytuge şaqırğan. Eldegi ahual kün öte naşarlap, Oñtüstik Europanıñ jüregine aynalğan memleket qañırap bos qalğan.

Franciya men Germaniyada auruğa şaldıqqandar sanı mıñnan asqan. Franciya prezidnti Emmanuel' Makron: «Memleket ülken epidemiya aldında twr. Koronavirus örşip keledi. Biz saqtıq şaraların barınşa qarastırdıq. Halıqqa jetkiziñizder, mamandar şaldıqqandardıñ 85%-ñ auruı jeñil türde ötedi deydi. Sondıqtan azamattar üreyge boy aldırmay, barınşa sabır saqtasın», – dedi.

Austriya biligi Italiyadan kelgen azamattardı elge kirgizbeu turalı şeşim qabıldadı. Austriya kancleri Sebast'yan Kurc: «Biz qazir Italiyada jürgen Austriya azamattarın şwğıl türde evakuaciyalau mäselesimen aynalısıp jatırmız. Olardıñ barlığı elge oralğannan keyin 14 kün üyde karantinde boladı», – deydi. Qazirgi uaqıtta elde 182 adam karantinde jatır. Al Grekiya biligi indetti tejeu üşin barlıq balabaqşalar men mektepterdi jäne oqu orındarın japtı. Ükimet arnayı şaralar dayındap jatqanın mälimdedi. Qazir bwl elde virustı jwqtırğandardıñ sanı 89-ğa jetken.

Wlıbritaniyanıñ densaulıq saqtau ministri, deputat-konservator Nadin Dorris ta koronavirus jwqtırğan. Soñğı derekterde, Birikken Korol'dikte virus jwqtırğandar sanı 373 adamğa jetken: Angliyada 324 adam, Şotlandiyada 27, Soltüstik Irlandiyada 16 jäne Uel'ste 15 adam. Altı adam dertten köz jwmğan.

Ispaniyada soñğı bir aptada körsetkiş 10 esege ösip, dertke şaldıqqandar 1700-ge juıqtadı. Aurudan 35 nauqas qaytıs bolğan. Elde virustıñ taraluına tosqauıl qoyu üşin qosımşa şaralar engizilip jatır. Madrid aymağı men Vitoriya jäne Labastida qalasında mektepter men oqu orındarı jabıldı

Kanadada 93 adam därigerlerdiñ qatañ baqılauına alınıp, bir adam dertten ölim qwştı. Al jer-jerde saylaualdı dayındıqtı qızu jürgizip jatqan AQŞ-ta 961 adam koronaviruske şaldıqqan. Qaytıs bolğandar sanı – 29.

Virus taralu qaupi joğarı deñgeydegi elder tiziminde Iran, Oñtüstik Koreya, Japoniya twr. Iranda 8042, Oñtüstik Koreyada 7755, Japoniyada 568 adamnan virus anıqtalğan. Şeteldik BAq-ta biıl tamızğa josparlanğan Tokioda ötetin jazğı Olimpiada bir-eki jılğa keyinge şegerilui mümkin degen habar taradı. «Wall Streat Journal» gazetine japondıq wyımdastıru komitetiniñ müşesi Haruyuki Takahaşi: «Olimpiadanı mülde ötkizbey tastau mümkin emes dep oylaymın, tek uaqıtın auıstıruğa boladı», – dedi. Onıñ aytuınşa, Olimpiadanı auıstıru aldağı jılğa basqa sporttıq is-şaralardıñ uaqıtı belgilenip qoyuına baylanıstı qiındıqtar tudıruı mümkin. Sondıqtan 2 jılğa keyinge qaldıru jeñilirek bolmaq.

Bügin Türkiyada koronavirustıñ jaña türin (COVID-19) jwqtırğan alğaşqı jağday tirkeldi. Virus jwqtırğan er adam jaqında ğana Europadan sayahattan oralğan. Onıñ densaulıq jağdayı qanağattanarlıq deñgeyde dep bağalanğan. Qazirgi uaqıtta pacient karantinde. Sonımen qatar, nauqastıñ otbası müşeleri, sonday-aq onımen baylanısta bolğan adamdar baqılauğa alındı.

Reseyde – 20, Gruziyada – 15, Äzirbayjanda – 6, Armeniya, Ukraina men Moñğoliyada bir adamnan virus deregi anıqtalğan. Al qauipti indettiñ negizgi oşağı sanalatın Qıtayda 80778 adam auruğa şaldıqsa, 3158 adam ajal qwşqan.

Körşiles memleketterdiñ basım böliginen tabılğan virus deregi resmi mälimetter boyınşa Qazaqstanda tirkelgen joq. Bwğan deyin «Jambıl oblısına virus jwqtırğan 150 adam bar», «Oñtüstik Koreyadağı qazaqstandıq nauqas auruhanadan qaşıp ketti» degen aqparattıñ barlığın Densaulıq saqtau ministrligi joqqa şığardı.

Degenmen tayauda Qazaqstanda şamamen 4 mıñğa juıq adamnıñ baqılauğa alınğanı mälim boldı. Resmi vedomstvo taratqan mälimdemede: «4650 adamğa monitoring jürgizildi, onıñ işinde 1 «a» sanatı boyınşa – 1217, 1 «b» sanatı boyınşa – 189, 2 sanat boyınşa – 3244 adam medicinalıq baqılauda boldı. Barlığı 676 adam baqılaudan alındı. 11 naurızdağı jağday boyınşa barlığı 3974 adam baqılauda twr», – delingen. 10 naurızda Ortalıq kommunikaciyalar qızmetinde ötken brifingte bas sanitar däriger Jandarbek Bekşin aldağı 5-6 kün işinde elde koronavirus diagnozı tirkelui mümkin ekenin ayttı.

"The Qazaq Times"