COVID-19 جاڭا كوروناۆيرۋسى تىركەلگەن ەلدەر سانى 105-كە، كەي دەركتەردە 119-عا جەتكەن. الەم بويىنشا ۆيرۋستى 118226 ادام جۇقتىرىپ، 4238 ادام اجال قۇشقان. دۇنيەجۇزىلىك دەنساۋلىق ساقتاۋ ۇيىمى اتالعان ۆيرۋس پاندەمياعا اينالۋى بەك مۇمكىن دەپ دابىل قاعىپ وتىر. جاھانعا تاراعان قاۋىپتى ىندەتتىڭ سوڭعى دەرەكتەرى مەن بۇگىنگى حال-احۋالعا زەر سالساق.

كوروناۆيرۋسكە قارسى ساقتىق شارالارىن كۇشەيتۋ ءۇشىن ەۋروپالىق وداق 25 ملرد ەۋرو كولەمىندە ينۆەستيتسيالىق قور قۇراتىنى ءمالىم بولدى. وسىعان بايلانىستى وداققا مۇشە ەلدەر يتاليا مەن بەلگيادا ىندەتتەن زارداپ شەككەن بيزنەس-كومپانيالارعا وتەماقى تولەۋ جاعىن قاراستىرىپ جاتىر. سونىمەن قاتار، عىلىمي زەرتتەۋگە 100 ميلليون ەۋرو بولىنەتىن بولدى.

ەۋروكوميسسيا باسشىسى ۋرسۋلا فون دەر ليايەن: «كوروناۆيرۋسپەن كۇرەسۋ ءۇشىن ينۆەستيتسيالىق قور قۇرماقپىز. ول دەنساۋلىق ساقتاۋ سالاسى مەن شاعىن جانە ورتا كاسىپورىنداردى، سونداي-اق ەڭبەك نارىعىن قولداۋعا نەگىزدەلەدى. جالپى بۇل قورعا 25 ميلليارد ەۋرو قۇيۋ كوزدەلگەن. باستاپقىدا وعان 7,5 ميلليارد ەۋرو بولىنەدى»، – دەيدى.

ەۋروپادا كوروناۆيرۋستى جۇقتىرۋدىڭ ەڭ كوپ وقيعاسى يتاليادا تىركەلدى: 10149 ادام ۆيرۋس جۇقتىرسا، 631 ادام قايتىس بولعان. وسى اپتادا يتاليانىڭ سولتۇستىگىندەگى 15 ايماق تولىق كارانتينگە جابىلدى. ساۋىرگە دەيىن بارلىق شارالار توقتاتىلدى. ەلدە قازىر ۆيرۋسپەن كۇرەسۋ ءۇشىن زەينەتكە شىعىپ كەتكەن دارىگەرلەر قايتا جۇمىسقا ورالىپ جاتىر. وسىعان دەيىن دۇنيەجۇزىلىك دەنساۋلىق ساقتاۋ ۇيىمى يتاليا بيلىگىن ۆيرۋسپەن كۇرەسۋدى كۇشەيتۋگە شاقىرعان. ەلدەگى احۋال كۇن وتە ناشارلاپ، وڭتۇستىك ەۋروپانىڭ جۇرەگىنە اينالعان مەملەكەت قاڭىراپ بوس قالعان.

فرانتسيا مەن گەرمانيادا اۋرۋعا شالدىققاندار سانى مىڭنان اسقان. فرانتسيا پرەزيدنتى ەممانۋەل ماكرون: «مەملەكەت ۇلكەن ەپيدەميا الدىندا تۇر. كوروناۆيرۋس ءورشىپ كەلەدى. ءبىز ساقتىق شارالارىن بارىنشا قاراستىردىق. حالىققا جەتكىزىڭىزدەر، ماماندار شالدىققانداردىڭ 85%-ڭ اۋرۋى جەڭىل تۇردە وتەدى دەيدى. سوندىقتان ازاماتتار ۇرەيگە بوي الدىرماي، بارىنشا سابىر ساقتاسىن»، – دەدى.

اۋستريا بيلىگى يتاليادان كەلگەن ازاماتتاردى ەلگە كىرگىزبەۋ تۋرالى شەشىم قابىلدادى. اۋستريا كانتسلەرى سەباستيان كۋرتس: «ءبىز قازىر يتاليادا جۇرگەن اۋستريا ازاماتتارىن شۇعىل تۇردە ەۆاكۋاتسيالاۋ ماسەلەسىمەن اينالىسىپ جاتىرمىز. ولاردىڭ بارلىعى ەلگە ورالعاننان كەيىن 14 كۇن ۇيدە كارانتيندە بولادى»، – دەيدى. قازىرگى ۋاقىتتا ەلدە 182 ادام كارانتيندە جاتىر. ال گرەكيا بيلىگى ىندەتتى تەجەۋ ءۇشىن بارلىق بالاباقشالار مەن مەكتەپتەردى جانە وقۋ ورىندارىن جاپتى. ۇكىمەت ارنايى شارالار دايىنداپ جاتقانىن مالىمدەدى. قازىر بۇل ەلدە ۆيرۋستى جۇقتىرعانداردىڭ سانى 89-عا جەتكەن.

ۇلىبريتانيانىڭ دەنساۋلىق ساقتاۋ ءمينيسترى، دەپۋتات-كونسەرۆاتور نادين دورريس تا كوروناۆيرۋس جۇقتىرعان. سوڭعى دەرەكتەردە، بىرىككەن كورولدىكتە ۆيرۋس جۇقتىرعاندار سانى 373 ادامعا جەتكەن: انگليادا 324 ادام، شوتلانديادا 27, سولتۇستىك يرلانديادا 16 جانە ۋەلستە 15 ادام. التى ادام دەرتتەن كوز جۇمعان.

يسپانيادا سوڭعى ءبىر اپتادا كورسەتكىش 10 ەسەگە ءوسىپ، دەرتكە شالدىققاندار 1700-گە جۋىقتادى. اۋرۋدان 35 ناۋقاس قايتىس بولعان. ەلدە ۆيرۋستىڭ تارالۋىنا توسقاۋىل قويۋ ءۇشىن قوسىمشا شارالار ەنگىزىلىپ جاتىر. مادريد ايماعى مەن ۆيتوريا جانە لاباستيدا قالاسىندا مەكتەپتەر مەن وقۋ ورىندارى جابىلدى

كانادادا 93 ادام دارىگەرلەردىڭ قاتاڭ باقىلاۋىنا الىنىپ، ءبىر ادام دەرتتەن ءولىم قۇشتى. ال جەر-جەردە سايلاۋالدى دايىندىقتى قىزۋ جۇرگىزىپ جاتقان اقش-تا 961 ادام كوروناۆيرۋسكە شالدىققان. قايتىس بولعاندار سانى – 29.

ۆيرۋس تارالۋ قاۋپى جوعارى دەڭگەيدەگى ەلدەر تىزىمىندە يران، وڭتۇستىك كورەيا، جاپونيا تۇر. يراندا 8042, وڭتۇستىك كورەيادا 7755, جاپونيادا 568 ادامنان ۆيرۋس انىقتالعان. شەتەلدىك باق-تا بيىل تامىزعا جوسپارلانعان توكيودا وتەتىن جازعى وليمپيادا ءبىر-ەكى جىلعا كەيىنگە شەگەرىلۋى مۇمكىن دەگەن حابار تارادى. «Wall Streat Journal» گازەتىنە جاپوندىق ۇيىمداستىرۋ كوميتەتىنىڭ مۇشەسى حارۋيۋكي تاكاحاشي: «وليمپيادانى مۇلدە وتكىزبەي تاستاۋ مۇمكىن ەمەس دەپ ويلايمىن، تەك ۋاقىتىن اۋىستىرۋعا بولادى»، – دەدى. ونىڭ ايتۋىنشا، وليمپيادانى اۋىستىرۋ الداعى جىلعا باسقا سپورتتىق ءىس-شارالاردىڭ ۋاقىتى بەلگىلەنىپ قويۋىنا بايلانىستى قيىندىقتار تۋدىرۋى مۇمكىن. سوندىقتان 2 جىلعا كەيىنگە قالدىرۋ جەڭىلىرەك بولماق.

بۇگىن تۇركيادا كوروناۆيرۋستىڭ جاڭا ءتۇرىن (COVID-19) جۇقتىرعان العاشقى جاعداي تىركەلدى. ۆيرۋس جۇقتىرعان ەر ادام جاقىندا عانا ەۋروپادان ساياحاتتان ورالعان. ونىڭ دەنساۋلىق جاعدايى قاناعاتتانارلىق دەڭگەيدە دەپ باعالانعان. قازىرگى ۋاقىتتا پاتسيەنت كارانتيندە. سونىمەن قاتار، ناۋقاستىڭ وتباسى مۇشەلەرى، سونداي-اق ونىمەن بايلانىستا بولعان ادامدار باقىلاۋعا الىندى.

رەسەيدە – 20, گرۋزيادا – 15, ءازىربايجاندا – 6, ارمەنيا، ۋكراينا مەن موڭعوليادا ءبىر ادامنان ۆيرۋس دەرەگى انىقتالعان. ال قاۋىپتى ىندەتتىڭ نەگىزگى وشاعى سانالاتىن قىتايدا 80778 ادام اۋرۋعا شالدىقسا، 3158 ادام اجال قۇشقان.

كورشىلەس مەملەكەتتەردىڭ باسىم بولىگىنەن تابىلعان ۆيرۋس دەرەگى رەسمي مالىمەتتەر بويىنشا قازاقستاندا تىركەلگەن جوق. بۇعان دەيىن «جامبىل وبلىسىنا ۆيرۋس جۇقتىرعان 150 ادام بار»، «وڭتۇستىك كورەياداعى قازاقستاندىق ناۋقاس اۋرۋحانادان قاشىپ كەتتى» دەگەن اقپاراتتىڭ بارلىعىن دەنساۋلىق ساقتاۋ مينيسترلىگى جوققا شىعاردى.

دەگەنمەن تاياۋدا قازاقستاندا شامامەن 4 مىڭعا جۋىق ادامنىڭ باقىلاۋعا الىنعانى ءمالىم بولدى. رەسمي ۆەدومستۆو تاراتقان مالىمدەمەدە: «4650 ادامعا مونيتورينگ جۇرگىزىلدى، ونىڭ ىشىندە 1 «ا» ساناتى بويىنشا – 1217, 1 «ب» ساناتى بويىنشا – 189, 2 سانات بويىنشا – 3244 ادام مەديتسينالىق باقىلاۋدا بولدى. بارلىعى 676 ادام باقىلاۋدان الىندى. 11 ناۋرىزداعى جاعداي بويىنشا بارلىعى 3974 ادام باقىلاۋدا تۇر»، – دەلىنگەن. 10 ناۋرىزدا ورتالىق كوممۋنيكاتسيالار قىزمەتىندە وتكەن بريفينگتە باس سانيتار دارىگەر جانداربەك بەكشين الداعى 5-6 كۇن ىشىندە ەلدە كوروناۆيرۋس دياگنوزى تىركەلۋى مۇمكىن ەكەنىن ايتتى.

"The Qazaq Times"