Beyjiñ Auğanstan mäselesine basa nazar audarıp otır. Foto: The Diplomat.

Keşe Qıtay Sırtqı ister ministrligi baspasöz jinalısın ötkizip, resmi Beyjiñniñ AQŞ pen «Taliban» arasındağı beybitşilik kelisimin qoldaytının jetkizdi.

Qıtay SİM ökili Jau Lijiyan sözinde: «Qıtay tarabı AQŞ pen «Taliban» wyımınıñ beybit kelisimge qol qoyuın qalaydı. Bwl Auğanstan mäselesiniñ sayasi şeşimin alğa ilgeriletedi», – degen. Onıñ aytuınşa, beybitşilik kelisimi öñirdegi dağdarıstıñ erterek retteluine, beybitşiliktiñ ornığuına äser etedi. Sonday-aq, Qıtay tarabı kelisimnen keyin auğan jerindegi şeteldik äskeri küşterdiñ öñirdegi qauipsizdikke degen jauapkerşiligi tipti de küşti boluı kerek dep qaraydı. Beyjiñ terrorlıq küşterdiñ Auğanstandağı jağdaydı paydalanıp ketpeuin qadağalaudı talap etedi.

Auğanstan Qıtaydıñ Şınjañ jerimen şektesip jatır. Sondıqtan da, Qıtay biligi auğan jerindegi terrorlıq toptardıñ küş aluınan jäne onıñ jaqın twrğan Şınjañ jerine ıqpal etuinen qattı alañdaydı. Şınjañdağı jergilikti halıqtardıñ narazılığınıñ küşeyuine baylanıstı Qıtaydıñ Şınjañ sayasatı qatañ küyinde twr. Soñğı jıldarı Şınjañ sırtqı älemge mülde jabıq.

Şınjañ mäselesinen tıs Qıtay ükimeti Auğanstanğa qoldau körsetu arqılı ondağı tau-ken baylıqtarın aşıp paydalanuğa qol jetkizuge dämeli. Äsirese, auğan jerindegi mıs ken baylığı Qıtay öndirisi üşin irgedegi taptırmas baylıq bolıp sanaladı.

Biraq, bwl Qıtay üşin oñay qolğa kele qoymaq emes. Sebebi, Auğnastanda tüyisken derjavalar müddesiniñ oyını asa näzik jürip jatır. Qıtay ükimeti beybitşilik procesin qolday otırıp, terrorizmniñ jayılıp ketuinen de alañdaydı. Sondıqtan da Beyjiñ Kabul biligimen qosa täliptermen de tığız baylanıs ornatuğa tırısıp jatır.

 

“The Qazaq Times”