Qazaqstannıñ koronavirustan saqtanu şaraları qanday?

Bügin astanada ötken ükimet otırısında koronavirustan saqtanu şaraları  talqılanıp, «Jambıl oblısında 150 adam kovid-9 virusın jwqtırdı» degen aqparattıñ jalğan ekeni aytıldı.

Jiında prem'er-ministr Asqar Mamin, densaulıq saqtau ministri E.Birtanov, sırtqı ister ministri M.Tileuberdi, industriya jäne infraqwrılımdıq damu ministriniñ orınbasarı B.Qamaliev, prem'er-ministriniñ orınbasarı E.Toğjanov qazirgi jağday men atqarılıp jatqan jwmıstar turalı bayandadı.

Densaulıq saqtau ministrligi osı jıldıñ 6 qañtarınan bastap koronavirustıq infekciyanıñ äkelinui men taraluınıñ aldın alu boyınşa küşeytudiñ 3 kezeñin iske asırğan. 1 naurızdan bastap sol elderden kelgen twlğalarğa karantindik is-şaralar qoldanılatın elderdiñ tizbesin keñeytetin küşeytudiñ 4-kezeñi engizildi. Azamattardıñ densaulığın qorğau boyınşa tübegeyli şaralar qabıldau maqsatında ükimet elde koronavirustıq infekciyanı anıqtau jäne taratu kezindegi İs-qimıl algoritmin äzirlegen.

Prem'er-ministr sözinde: «Industriya jäne infraqwrılımdıq damu ministrligi koronarovirus belsendi türde taralıp jatqan elderge twraqtı reysterdi şektesin. Sonday-aq, bizdiñ farmacevtikalıq käsiporındarda medicinalıq maskalar men basqa da qorğanıs qwraldarı öndirisin arttırudı qamtamasız etudi tapsıramın»,– dedi. Sonımen qatar, äkimdikter men Eñbek jäne halıqtı äleumettik qorğau ministrligine koronavirustıq infekciyanıñ taralu deñgeyi qolaysız elderdiñ azamattarı üşin şeteldik jwmıs küşin tartuğa rwqsat berudi toqtatu turalı bwyrıq berildi.

Ükimettiñ baspasöz ortalığında ötken brifingte Densaulıq saqtau ministri Eljan Birtanov: «Eñ bastısı – elimizde koronavirus infekciyasın jwqtırğan adam anıqtalğan jağdayğa dayın bolu. Ol twrğıda bizde «B» josparı bar. Ol jospar äzirlenip, barlıq memlekettik organmen maqwldandı. Bwl jospardıñ negizi – Qazaqstan aumağında infekciyanıñ taraluın barınşa şekteu. Qazirgi uaqıtta barlıq memlekettik organmen, äkimdikpen tiisti jwmıstar jürgizilip jatır», – dedi.

Ministr Qıtay men Irannan kelgen azamattar mindetti türde 14 kündik karantinge jatqızılatının, auruhanadan şıqqannan keyin qosımşa 10 kün işinde medicinalıq baqılauda bolatının mälimdedi. «Birinşi sanatta elderden kelgen azamattar 14 künge twrğılıqtı jeri boyınşa karantinge ornalastırıladı. Biraq sanitarlıq qızmettiñ şeşimi boyınşa bwl adamdar medicinalıq wyımdağı karantinge auıstırıluı mümkin», – dedi.

1 naurızdan bastap Densaulıq saqtau ministrligi sanitarlıq-epidemiologiyalıq baqılaudı küşeytudiñ 4-şi satısın engizdi. Birinşi sanattağı elder qatarına Qıtay Halıq Respublikası, sonıñ işinde Gonkong, Tayvan', Makao jäne Iran, Oñtüstik Koreya, Japoniya, Italiya jatadı.

Ayta keteyik, oşağı Qıtaydıñ Hubey provinciyasınan bastalıp, 65 memleketke tarap ülgergen kovid-9 virusı pandemiyağa aynaluı mümkin. Qazirgi uaqıtta älem boyınşa 88437 adam kovid-9 jwqtırıp, 3039 adam qaytıs bolğan. Virus jwqtıru qaupi joğarı birinşi sanattağı elder qatarında Qıtaydan keyin Oñtüstik Koreya, Japoniya, Gonkong, Tayuan', Makao, Italiya jäne Iran twr. Öñdelgen derekter boyınşa, atalğan dert Franciya, Australiya, Filippin, Belarus', Latviya, Germaniya jäne AQŞ-ta tirkeldi. Sonımen qatar, Resey, Ukraina, Armeniya, Qırğızstanda da virusqa şaldıqqandar karantinde jatır. Olar Diamond Princess kemesinde bolğan. Al Belarus' pen Latviyada irandıq studentterden koronavirus tabıldı.

"The Qazaq Times"