Sarapşılardıñ köbi "biliktiñ kinäsinen boldı" dep sanaytın Qordaydağı qandı oqiğadan keyingi körinis. Foto: aşıq derekköz / Bauırjan Juasbaev

İşki ister ministriniñ birinşi orınbasarı Marat Qojaev Qorday qaqtığısı boyınşa qozğalğan isterdiñ türleri men sanı turalı mälimdeme jasadı.

«Büginde jüzdegen adamnan jauap alındı, processualdı is-qimıldar, qajetti saraptamalar jürgizilude. Barlıq processualdı dälelder alınğannan keyin, kinäliler jauapkerşilikke tartıladı», – dedi vice-ministr parlament mäjilisinde tilşilerge bergen jauabında.

Onıñ sözinşe, kün sanap qılmıstıq isterdiñ tigindisi qalıñdap jatqan körinedi. Adam öltiru, jappay tärtipsizdik, wrlıq, qaraqşılıq, tonau faktileri turalı qılmıstıq is qozğalıptı. Ärtürli epizodtar boyınşa äzirge jalpı jiını 90-ğa tarta qılmıstıq is tirkelgen eken.

Degenmen ol tergeu amaldarınıñ qaşan ayaqtalatını turalı naqtı jauap bermedi.

«Uaqıt körsetedi. Tergeudiñ jalpı merzimi qılmıstıq-processualdıq zañnama boyınşa eki ay. Eger de qosımşa zertteuler qajet bolsa, qajetti saraptamalar tağayındau qajettigi tuındasa, onda bwl merzim zañnamağa säykes wzartıluı ıqtimal», – dedi Marat Qojaev.

Bwğan deyin aqpannıñ 11-i atalğan qandı oqiğağa qatıstı 25 qılmıstıq is aşılğanı habarlanğan edi.

"The Qazaq Times"