ساراپشىلاردىڭ كوبى "بيلىكتىڭ كىناسىنەن بولدى" دەپ سانايتىن قوردايداعى قاندى وقيعادان كەيىنگى كورىنىس. فوتو: اشىق دەرەككوز / باۋىرجان جۋاسباەۆ

ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ قورداي قاقتىعىسى بويىنشا قوزعالعان ىستەرءدىڭ تۇرلەرى مەن سانى تۋرالى مالىمدەمە جاسادى.

«بۇگىندە جۇزدەگەن ادامنان جاۋاپ الىندى، پروتسەسسۋالدى ءىس-قيمىلدار، قاجەتتى ساراپتامالار جۇرگىزىلۋدە. بارلىق پروتسەسسۋالدى دالەلدەر الىنعاننان كەيىن، كىنالىلەر جاۋاپكەرشىلىككە تارتىلادى»، – دەدى ۆيتسە-مينيستر پارلامەنت ماجىلىسىندە تىلشىلەرگە بەرگەن جاۋابىندا.

ونىڭ سوزىنشە، كۇن ساناپ قىلمىستىق ىستەردىڭ تىگىندىسى قالىڭداپ جاتقان كورىنەدى. ادام ءولتىرۋ، جاپپاي تارتىپسىزدىك، ۇرلىق، قاراقشىلىق، توناۋ فاكتىلەرى تۋرالى قىلمىستىق ءىس قوزعالىپتى. ءارتۇرلى ەپيزودتار بويىنشا ازىرگە جالپى جيىنى 90-عا تارتا قىلمىستىق ءىس تىركەلگەن ەكەن.

دەگەنمەن ول تەرگەۋ امالدارىنىڭ قاشان اياقتالاتىنى تۋرالى ناقتى جاۋاپ بەرمەدى.

«ۋاقىت كورسەتەدى. تەرگەۋدىڭ جالپى مەرزىمى قىلمىستىق-پروتسەسسۋالدىق زاڭناما بويىنشا ەكى اي. ەگەر دە قوسىمشا زەرتتەۋلەر قاجەت بولسا، قاجەتتى ساراپتامالار تاعايىنداۋ قاجەتتىگى تۋىنداسا، وندا بۇل مەرزىم زاڭناماعا سايكەس ۇزارتىلۋى ىقتيمال»، – دەدى مارات قوجاەۆ.

بۇعان دەيىن اقپاننىڭ 11-ءى اتالعان قاندى وقيعاعا قاتىستى 25 قىلمىستىق ءىس اشىلعانى حابارلانعان ەدى.

"The Qazaq Times"