Körneki suret. Foto: QT

Teñizşevroyl kompaniyasınıñ dereginşe, bıltır Teñiz mwnay ken ornında 29 mln 790 mıñ tonna mwnay öndirilipti. Ekologiya ministri paydalı qazbalar qorı sarqılıp jatqanın habarladı. 

«Teñizşevroyl» JŞS-niñ baspasöz bölimi taratqan aqparat boyınşa: «Atırau oblısındağı Teñiz ken ornında öndirilgen mwnay kölemi 29,79 million tonna nemese 237,7 million barrel'di qwradı. Bwl 2018 jılmen salıstırğanda joğarı körsetkiş. 2018-de 28,6 mln tonna nemese 228,2 mln barrel' mwnay öndirilgen. Tabıstıñ wlğayuına şiki gazdı aydau jobası äser etip, mwnay öndirudiñ täuliktik mölşeri 75 000 tonnağa deyin jetken (600 000 barrel')».

Kompaniyanıñ resmi ökili Teñiz ken ornınıñ öndiristik quatın arttırudıñ kelesi kezeñi jüzege asıp jatqanın atap ötti. Ol ayaqtalğan soñ öndiris kölemi jılına 12 mln tonnağa artıp, 39 mln tonnağa jetetin körinedi.

Atalğan kompaniya qwralpılas özge de şikizat öndiruşi köptegen kommerciyalıq wyımdardıñ tabısı men tölengen salıq, özge de alımnıñ byudjetke qwyıluı, onıñ jwmsaluı jöninde möldir aqparat jüyesi joq.

Sonday-aq bügin Ükimet otırısında ekologiya, geologiya jäne tabiği resurstar ministri Mağzwm Mırzağaliev Qızılorda oblısında jıl sayın mwnay öndiru kölemi 1 mln tonnağa deyin tömendep jatqanın jetkizdi.

– Osı mäsele tayau arada Aqtöbe men Mañğıstau oblıstarında da boljanuda. Soñğı on jıldıqta Şığıs Qazaqstandağı monoqalalarğa jaqın ornalasqan – Şemonaiha, YUbileyno-Snegirihinskoe, Zıryanovskoe iri qorğasın-mırış ken orındarınıñ qorı tügeldey tausılıp, jabıldı. 2025-2040 jıldarğa taman Orlovskoe, Maleevskoe, Tişinskoe, Ridder-Sokol'noe siyaqtı ken orındarında da paydalı qazba qorlarınıñ tolıqtay sarqıluı kütilude, – dedi ministr.

Resmi derek boyınşa, elimizde jalpı jiını 8 mıñğa juıq ken ornı bar. Onıñ işinde 317 kömirsutek, yağni mwnay, gaz, kondensat ken orındarı jwmıs isteydi. Bwdan bölek, 910 qattı paydalı qazbalar ken ornı bolsa, 3 mıñnan astamı keñ taralğan paydalı qazbalarğa tiesili. Sonımen qatar 4 mıñğa juığı jerastı suları qaynarı bar desedi.

"The Qazaq Times"