كورنەكى سۋرەت. فوتو: QT

تەڭىزشەۆرويل كومپانياسىنىڭ دەرەگىنشە، بىلتىر تەڭىز مۇناي كەن ورنىندا 29 ملن 790 مىڭ توننا مۇناي ءوندىرىلىپتى. ەكولوگيا ءمينيسترى پايدالى قازبالار قورى سارقىلىپ جاتقانىن حابارلادى. 

«تەڭىزشەۆرويل» جشس-ءنىڭ ءباسپاسوز ءبولىمى تاراتقان اقپارات بويىنشا: «اتىراۋ وبلىسىنداعى تەڭىز كەن ورنىندا وندىرىلگەن مۇناي كولەمى 29,79 ميلليون توننا نەمەسە 237,7 ميلليون باررەلدى قۇرادى. بۇل 2018 جىلمەن سالىستىرعاندا جوعارى كورسەتكىش. 2018-دە 28,6 ملن توننا نەمەسە 228,2 ملن باررەل مۇناي وندىرىلگەن. تابىستىڭ ۇلعايۋىنا شيكى گازدى ايداۋ جوباسى اسەر ەتىپ، مۇناي ءوندىرۋدىڭ تاۋلىكتىك مولشەرى 75 000 تونناعا دەيىن جەتكەن (600 000 باررەل)».

كومپانيانىڭ رەسمي وكىلى تەڭىز كەن ورنىنىڭ وندىرىستىك قۋاتىن ارتتىرۋدىڭ كەلەسى كەزەڭى جۇزەگە اسىپ جاتقانىن اتاپ ءوتتى. ول اياقتالعان سوڭ ءوندىرىس كولەمى جىلىنا 12 ملن تونناعا ارتىپ، 39 ملن تونناعا جەتەتىن كورىنەدى.

اتالعان كومپانيا قۇرالپىلاس وزگە دە شيكىزات ءوندىرۋشى كوپتەگەن كوممەرتسيالىق ۇيىمداردىڭ تابىسى مەن تولەنگەن سالىق، وزگە دە الىمنىڭ بيۋدجەتكە قۇيىلۋى، ونىڭ جۇمسالۋى جونىندە ءمولدىر اقپارات جۇيەسى جوق.

سونداي-اق بۇگىن ۇكىمەت وتىرىسىندا ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ قىزىلوردا وبلىسىندا جىل سايىن مۇناي ءوندىرۋ كولەمى 1 ملن تونناعا دەيىن تومەندەپ جاتقانىن جەتكىزدى.

– وسى ماسەلە تاياۋ ارادا اقتوبە مەن ماڭعىستاۋ وبلىستارىندا دا بولجانۋدا. سوڭعى ون جىلدىقتا شىعىس قازاقستانداعى مونوقالالارعا جاقىن ورنالاسقان – شەمونايحا، يۋبيلەينو-سنەگيريحينسكوە، زىريانوۆسكوە ءىرى قورعاسىن-مىرىش كەن ورىندارىنىڭ قورى تۇگەلدەي تاۋسىلىپ، جابىلدى. 2025-2040 جىلدارعا تامان ورلوۆسكوە، مالەەۆسكوە، تيشينسكوە، ريددەر-سوكولنوە سياقتى كەن ورىندارىندا دا پايدالى قازبا قورلارىنىڭ تولىقتاي سارقىلۋى كۇتىلۋدە، – دەدى مينيستر.

رەسمي دەرەك بويىنشا، ەلىمىزدە جالپى جيىنى 8 مىڭعا جۋىق كەن ورنى بار. ونىڭ ىشىندە 317 كومىرسۋتەك، ياعني مۇناي، گاز، كوندەنسات كەن ورىندارى جۇمىس ىستەيدى. بۇدان بولەك، 910 قاتتى پايدالى قازبالار كەن ورنى بولسا، 3 مىڭنان استامى كەڭ تارالعان پايدالى قازبالارعا تيەسىلى. سونىمەن قاتار 4 مىڭعا جۋىعى جەراستى سۋلارى قاينارى بار دەسەدى.

"The Qazaq Times"