Almatıda Altınbek Särsenbaywlı eske alındı. Foto: QT,

«Altınbek Särsenbaywlınıñ ölimine qatıstı qılmıstıq isti qayta tekserip, tapsırıs beruşilerdiñ kim ekenin aşıp körsetu kerek!» Bügin, 11 aqpan küni Almatıda ötken memleket jäne qoğam qayratkeri Altınbek Särsenbaywlın eske aluğa arnalğan şarada osınday talaptar qoyıldı. «Astana» qonaq üyinde ötken şaranı A.Särsenbaywlınıñ qaza bolğan künine oray «Altınbek Särsenbaywlı qorı» jäne jañadan qwrılğan «Demokratiyalıq partiya» tarabınan wyımdastırılğan.

Birqatar sayasatkerler men qoğam qayratkerleri, ziyalı qauım ökilderi jäne azamattıq belsendiler qatısqan jiında Altınbek Särsenbaywlınıñ ağası, qoğam belsendisi, jurnalist Irısbek Särsenbaywlı arnayı bayandama jasadı. Ol «Sayasi terrordıñ qalay jasalğanın jäne tapsırıs beruşiniñ kimder ekenin aşıp aytatın kez keldi» degen taqırıptağı bayandamasında Altınbek Särsenbaywlınıñ ölimine qatıstı birqatar tüytkildi mäselelerdi ortağa saldı jäne qazirgi bilikten Altınbek Särsenbaywlına jasalğan qastandıqtı aşıp tekserudi talap etti.

Irısbek Särsenbaywlı inisin Altınbek pen Zamanbek Nwrqadilovti sayasi terrorlıq qwrbanı dep sanaydı jäne Z. Nwrqadilovtiñ jerlesi, Altınbek Särsenbaywlınıñ ağası retinde zañ boyınşa jäbirlenuşi ekenin alğa tarta otırıp, attarı atalğan memleket jäne qoğam qayratkerlerine, Bauırjan Baybosın men Vasiliy Juravlevke oq atqızğandardı, oq atqandardı anıqtaudı, qılmıstıq jazağa tartudı talap etetinin bildirdi.

«Bwrınğı prezident N.Nazarbaevtı 2005 jılğı 13 qaraşadağı, 2006 jılğı 11 aqpandağı qılmıstıq isterge qatısı bar dep esepteymin! Qazirgi senat törağası Dariğa Nazarbaevanı R.Äliev pen Ä.Musaevqa qatıstı qozğalğan №14001901100001 qılmıstıq iske küdikti retinde qosıp, tergeuge aludı talap etemin! Sol eki qandı oqiğanıñ qoğamdağı qaupin eskerip, terrorizm babı boyınşa jañadan is jürgizudi talap etemin!» – dedi Irısbek Särsenbaywlı.

Azamattıq qoğam ökilderi qatısqan jiında Altınbek Särsenbaywlı men Zamanbek Nwrqadilovtiñ ölimi Qazaqstannıñ demokratiyalanuı men qwqıqtıq kemeldenuin keri şegergen tarihi-sayasi oqiğa dep bağalandı.

Irısbek Särsenbaywlı söz soñında: «Prezident Q.Toqaev, parlament mäjilisiniñ törağası N.Nığmatulin qoğamnıñ bwl talabın jedeldetip orındasın! Mine, sonda ğana barlıq azamattardıñ qwqığı teñeledi. Memlekettik bilikti jekeşelendirip alıp, asa auır qılmıs jasauşılardıñ jolı kesiledi. Zañ aldında barlıq adamdardıñ birdey jauaptılığı jänindegi talap sonda ğana iske asadı. Al ol öz kezeginde är deñgeydegi «nazarbaevtardıñ» astamşılığı men zañbwzarlığın toqtatuğa septesedi», – degen uäjin bildirdi.

Bwdan keyin kezegimen söz alğan jiınğa qatısuşılar bügingi Qazaqstan qoğamında Altınbek Särsenbaywlı sındı twlğalardıñ orını oysırap twrğanın ayta kelip, qazirgi biliktiñ Qazaqstannıñ sayasi tarihındağı osığan wqsas isterdiñ aq-qarasın ayırıp, şın mänisindegi azamattardıñ qwqıqtıq teñdigin jüzege asırudı talap etti.

 

“The Qazaq Times”