Bağdat Mänizorov. Fotokollaj: QT

Atışulı şeneuniktiñ biri äri irisi Bağdat Mänizorov Almatı oblısı äkiminiñ orınbasarı qızmetinen bosatıldı.

QazTAG aqparat agenttiginiñ habarlauınşa, «Mänizorov äkim orınbasarı qızmetinen ketedi. Ol arız jazıp qoyğan».

Jergilikti BAQ-tıñ deregine qarağanda, äkim orınbasarınıñ aldağı jaña qızmeti «Samwrıq-Qazına» wlttıq äl-auqat qorı» boluı mümkin. Mänizorovten basqa, äkim apparatınıñ basşısı Temirlan Bektasov ta qızmetinen ketedi. Onıñ ornına Almatı oblısı äkiminiñ bwrınğı orınbasarı Serik Twrdaliev tağayındalatın körinedi.

«Men bügin arız jazamın. Qazir sağat 10-da, älgi jağdaydan keyin tört ay jwmıs jasadım. Özimdi özim körsettim. Prokuraturanıñ qaulısı bar, tazamın. Mwnday şeşimdi özim qabıldadım. Osı qızmetten ketkim keledi, özim üşin ömir sürgim keledi.»,- deydi Bağdat Mänizorov.

Aymaq äkiminiñ orınbasarı qayda jwmısqa baratının aytpağan. Sonday-aq eks-şendi öziniñ bwl şeşimdi qabıldau sebebin tüsindiruge tırısıp baqqan:

«Äzirge bir-eki ay demalamın, arğı jağın uaqıt körsetedi. Sodan keyin aytatınım, mağan eşkim jwmıstan ket dep jatqan joq, men mansapqwmar emespin. Bwl jwmısqa jabısıp twrğan joqpın, özim şeşim qabıldadım, sonı dwrıs tüsiniñizder. Bwl jwmısqa men bir payda tabu üşin nemese jemqorlıqpen aynalısu üşin kelgen joqpın. Bwl jerge jwmıs isteu üşin kelgen edim. Keybir adamdarğa kerek bolsa bwl jwmıstı ötkizip beremin. Özimniñ aynalısatın basqa isterim bar»,- dedi.

Bwğan deyin bıltır 26 qırküyekte Sıbaylas jemqorlıqqa qarsı qızmet Mänizorovti iri kölemdegi alayaqtıq jasadı degen küdikpen wstağan edi. Keyinnen oğan tağılğan ayıp Almatı qalasınıñ memlekettik säulet-qwrılıs baqılau basqarmasına basşılıq etu kezindegi zañ bwzuşılıqtarğa baylanıstı ekeni anıqtalğan bolatın.

Ötken küzdiñ 29 qazanında Bas prokuratura Mänizorovtı qamaudan bosattı. Alayda 31 qazanda Sıbaylas jemqorlıqqa qarsı qızmet qılmıstıq isti toqtatuğa kelispeytinin habarladı.

27 qaraşada QR Sıbaylas jemqorlıqqa qarsı agenttigi törağasınıñ orınbasarı Oljas Bektenov Mänizorovqa qastıstı iste dälelder bar ekenin mälimdegen.

Bağdat Mänizorov är jıldarı Almatı oblısındağı Aqsu jäne Köksu audandarı men Almatıdağı Alatau audanınnıñ äkimi qızmetin atqarğan.

“The Qazaq Times”