باعدات ءمانىزوروۆ. فوتوكوللاج: QT

اتىشۋلى شەنەۋنىكتىڭ ءبىرى ءارى ءىرىسى باعدات ءمانىزوروۆ الماتى وبلىسى اكىمىنىڭ ورىنباسارى قىزمەتىنەن بوساتىلدى.

قازتاگ اقپارات اگەنتتىگىنىڭ حابارلاۋىنشا، «ءمانىزوروۆ اكىم ورىنباسارى قىزمەتىنەن كەتەدى. ول ارىز جازىپ قويعان».

جەرگىلىكتى باق-تىڭ دەرەگىنە قاراعاندا، اكىم ورىنباسارىنىڭ الداعى جاڭا قىزمەتى «سامۇرىق-قازىنا» ۇلتتىق ءال-اۋقات قورى» بولۋى مۇمكىن. مانىزوروۆتەن باسقا، اكىم اپپاراتىنىڭ باسشىسى تەمىرلان بەكتاسوۆ تا قىزمەتىنەن كەتەدى. ونىڭ ورنىنا الماتى وبلىسى اكىمىنىڭ بۇرىنعى ورىنباسارى سەرىك تۇرداليەۆ تاعايىندالاتىن كورىنەدى.

«مەن بۇگىن ارىز جازامىن. قازىر ساعات 10-دا، الگى جاعدايدان كەيىن ءتورت اي جۇمىس جاسادىم. ءوزىمدى ءوزىم كورسەتتىم. پروكۋراتۋرانىڭ قاۋلىسى بار، تازامىن. مۇنداي شەشىمدى ءوزىم قابىلدادىم. وسى قىزمەتتەن كەتكىم كەلەدى، ءوزىم ءۇشىن ءومىر سۇرگىم كەلەدى.»،- دەيدى باعدات ءمانىزوروۆ.

ايماق اكىمىنىڭ ورىنباسارى قايدا جۇمىسقا باراتىنىن ايتپاعان. سونداي-اق ەكس-شەندى ءوزىنىڭ بۇل شەشىمدى قابىلداۋ سەبەبىن تۇسىندىرۋگە تىرىسىپ باققان:

«ازىرگە ءبىر-ەكى اي دەمالامىن، ارعى جاعىن ۋاقىت كورسەتەدى. سودان كەيىن ايتاتىنىم، ماعان ەشكىم جۇمىستان كەت دەپ جاتقان جوق، مەن مانساپقۇمار ەمەسپىن. بۇل جۇمىسقا جابىسىپ تۇرعان جوقپىن، ءوزىم شەشىم قابىلدادىم، سونى دۇرىس تۇسىنىڭىزدەر. بۇل جۇمىسقا مەن ءبىر پايدا تابۋ ءۇشىن نەمەسە جەمقورلىقپەن اينالىسۋ ءۇشىن كەلگەن جوقپىن. بۇل جەرگە جۇمىس ىستەۋ ءۇشىن كەلگەن ەدىم. كەيبىر ادامدارعا كەرەك بولسا بۇل جۇمىستى وتكىزىپ بەرەمىن. ءوزىمنىڭ اينالىساتىن باسقا ىستەرىم بار»،- دەدى.

بۇعان دەيىن بىلتىر 26 قىركۇيەكتە سىبايلاس جەمقورلىققا قارسى قىزمەت ءمانىزوروۆتى ءىرى كولەمدەگى الاياقتىق جاسادى دەگەن كۇدىكپەن ۇستاعان ەدى. كەيىننەن وعان تاعىلعان ايىپ الماتى قالاسىنىڭ مەملەكەتتىك ساۋلەت-قۇرىلىس باقىلاۋ باسقارماسىنا باسشىلىق ەتۋ كەزىندەگى زاڭ بۇزۋشىلىقتارعا بايلانىستى ەكەنى انىقتالعان بولاتىن.

وتكەن كۇزدىڭ 29 قازانىندا باس پروكۋراتۋرا ءمانىزوروۆتى قاماۋدان بوساتتى. الايدا 31 قازاندا سىبايلاس جەمقورلىققا قارسى قىزمەت قىلمىستىق ءىستى توقتاتۋعا كەلىسپەيتىنىن حابارلادى.

27 قاراشادا قر سىبايلاس جەمقورلىققا قارسى اگەنتتىگى توراعاسىنىڭ ورىنباسارى ولجاس بەكتەنوۆ مانىزوروۆقا قاستىستى ىستە دالەلدەر بار ەكەنىن مالىمدەگەن.

باعدات ءمانىزوروۆ ءار جىلدارى الماتى وبلىسىنداعى اقسۋ جانە كوكسۋ اۋداندارى مەن الماتىداعى الاتاۋ اۋدانىننىڭ اكىمى قىزمەتىن اتقارعان.

“The Qazaq Times”