«Qazaq handığı. Altın taq» fil'minen. Foto: aşıq derekköz

Bıltır Qazaqstan rejisserleri tüsirgen men kinematografşılarınıñ qatısuımen 40-tan astam fil'm prokatqa şığıptı. Ädettegidey komediya men romantikalıq melodramanıñ ülesi köp degenimizben, tarihi jäne bayopik kinoğa köbirek köñil böline bastaptı.

Bwl sözimizge bıltır şıqqan «Qazaq handığı. Altın taq», «Baluan Şolaq«, «Kompozitor», «Tomiris», «Bekzat», «Qazbat» siyaqtı kartinalar dälel.

Boks-ofis turalı aytsaq, ösu dinamikası anıq bayqaladı. Biıl alğaş ret milliardtıq meje bağındırıldı. Nwrlan Qoyanbaevtıñ «Qazaqşa biznes Koreyada» komediyası otandıq fil'mder arasında alğaş bolıp milliarder atandı.

2019 jılı prokatta eñ köp tabıs tapqan 10 otandıq fil'm:

  1. Qazaqşa biznes Koreyada(Biznes po-kazahski v Koree) – ₸1 mlrd 107 mln
  2. Äkim (Akim) –  ₸577 mln
  3. Tomiris – ₸588 mln
  4. Offlayn kanikul/ (Kanikulı off-line) – ₸455 mln
  5. Brat ili brak 2 – ₸377 mln
  6. Krasavçiki do naşey erı – ₸287 mln
  7. Off-line kanikul 2 (Kanikulı off-line 2) – ₸250 mln
  8. Anamdı izdeymin 2: Jaña oqiğalar (V poiskah mamı 2: Novıe priklyuçeniya) – ₸166 mln
  9. Ataşka na haype – ₸164 mln
  10. Kelin de adam balası 2 (Kelinka toje çelovek 2) – ₸156 mln

2018 jılmen salıstırğanda kassalıq tüsimniñ öskenin bayqaymız. 2018 jılı üzdik üştiktiñ tabısı 195 mln – 573 mln teñge aralığında edi. Al 2019 jılı üşinşi orındağı «Tomiristiñ» tabısı 2018 jıldıñ birinşi orındağı fil'mnen äldeqaydaköp («Qazaqşa biznes Afrikada»).

Al qazaqstandıq kinojobalardıñ rentabeldik därejesi turalı eşteñe ayta almaymız. Öytkeni şıqqan fil'mderdiñ basım böliginiñ byudjeti belgisiz küyinde qaldı.

Endi Qazaqstan kinonarığındağı şeteldik fil'mder turalı söz etsek. Bwl salada da dinamikanıñ öskeni bayqaladı. Milliarder atanğan jobalar bar. Mısalı, 2018 jılı onday körsetkiş tirkelgen joq (eñ kassalı «Kek aluşılar: Şeksizdik soğısı» – 832 mln ₸).

2019 jılı Qazaqstan prokatında eñ köp tabıs tapqan 10 şeteldik fil'm:

  1. Kek aluşılar: Oyın soñı – ₸1 mlrd 272 mln
  2. Arıstan patşa – ₸1 mlrd 196 mln
  3. Äldekim: Ekinşi tarau – ₸881 mln
  4. Malefisenta: Tünek ämirşisi – ₸837 mln
  5. Mwzdı ölke 2 – ₸776 mln
  6. Djumandji: Kelesi kezeñ – ₸760 mln
  7. Üy januarlarınıñ qwpiya ömiri 2 – ₸610 mln
  8. Kapitan Marvel – ₸597 mln
  9. Aladdin – ₸591 mln
  10. Forsaj wsınadı: Hobbs pen Şou – ₸571 mln

2019 jıldıñ bastı jañalıqtarınıñ biri – «Kinematografiya turalı» zañğa engen özgeris edi. Jaña normağa säykes endi prokatqa şığatın özge tildi fil'mderdiñ barlığı qazaqşağa audarıluı kerek. Ol dublyaj, kadr sırtındağı dıbıstau nemese subtitr boluı mümkin. Bıltırdan bastap fil'mderdiñ barlığı derlik ülken ekranda qazaqşa subtitrmen berilip jür.

Degenmen «Bolaşaq» qauımdastığınıñ bwrınnan kele jatqan bastaması da jalğasın taptı. Osı wyımnıñ wyıtqı boluımen Gollivudtıñ 6 kartinası sapalı qazaqşa dublyajben jarıq kördi:

  1. Dambo / Dumbo – 28 naurız
  2. Aladdin / Aladdin – 23 mamır
  3. Oyınşıqtar hikayası 4 / Istoriya igruşek 4 / Toy Story 4 – 20 mausım
  4. Arıstan patşa / Korol' Lev / The Lion King – 18 şilde
  5. Malefisenta: Tünek ämirşisi / Malefisenta: Vladıçica t'mı / Maleficent: Mistress of Evil – 17 qazan
  6. Mwzdı ölke 2 / Holodnoe serdce 2 / Frozen II – 28 qaraşa

*Kassalıq tüsim turalı derekter Tiketon servisiniñ saytınan alındı

"kinostan.kz"