Täuelsizdik kezeñindegi 4-şi bas müfti Ötpenov Naurızbay Tağanwlı. Foto: Müftiyat

7 aqpan, jwma küni astanada ötken Qazaqstan mwsılmandarı dini basqarmasınıñ kezekten tıs İH qwrıltayında bas müfti qızmetine Naurızbay Tağanwlı saylandı.

QMDB qwrıltayına jinalğan 300 delegat eks-müfti Serikbay Orazdıñ wsınğan kandidaturasına parlament deputattarı tärizdi birauızdan dauıs beru arqılı Naurızbay Tağanwlın sayladı.  Serikbay Orazdıñ qızmetten nege ketkeni aytılmadı. Öziniñ birinşi orınbasarı bolğan su jaña müftige sättilik tilese,  aqparat jäne qoğamdıq damu ministri Däuren Abaev qalıñ säldesin tapsırğan Orazovtıñ 2017-2020 jıldarı atqarğan jwmısına oñ bağa berip, jaña törağanı qwttıqtadı.

Osıdan 30 jıl bwrın, 1990 jılı qwrılğan QMDB institutınıñ alğaşqı müftii Rätbek Nısanbaywlı twsında dästürli dini tanımnıñ renessansı jürgen bolatın. Al 2000 jılı ötken üşinşi qwrıltayda QMDB apparatınıñ atqaruşı organı müftiyat basşılığına 53 jastağı professor Äbsattar Derbisäli keldi.  Onıñ twñğış müşelge teñ merzimdegi qızmeti kezinde Qazaqstanda dini ağımdar köbeyip, wlttıq mädeni mwrağa jauıqqan säläfi ağımı keñinen tamır jaya bastadı. Tipti şarıqtau şegi de, el işindegi dini sananıñ şayılıp, lañdanğanı da sol jıldarı edi. Aytıs-ädebiet salasınıñ ökilderi köptep dini dogmağa arbaldı.

Keyinnen öz kezeginde din men dästürdi qabıstıruda ayrıqşa közge tüsken Mayamerov Erjan Malğajıwlı 2013 jıldıñ 19 aqpanında Qazaqstan mwsılmandarınıñ kezekten tıs ötken VII qwrıltayında bas müfti bolıp saylandı. Al 2017 jıldıñ 8 jeltoqsanındağı VIII qwrıltayda Serikbay Satıbaldıwlı Oraz keldi.

Sarapşılardıñ aytuınşa, täuelsizdik jıldarı QMDB-nıñ ala-qwla dini ağımdarğa zañdıq quatı jetpegendikten, birneşe märte el tarihındağı eñ auır terrorlıq tragediyalar orın alıp otırdı. QMDB institutı äleumettik az qamtılğan azamattarğa ärtürli kömek körsetip keledi. Sonday-aq dini ökildik keyde, äsirese, bilik sınğa wşırağanda nemese sayasi strategiyada azamattıq pikir men erkin sananı şekteuge qatısatın «bilik qolbalası» retinde sınalıp jatadı.

Soñğı kezderi qoğamda dini senimi dau tuğızğan, ekiwştı dini twlğalardıñ sayasi propogandağa boy aldıruı jiilegen şaqta, bwqara men bilik arasında mediator qızmetin moynına alğan imamdardıñ funkciyası memleket isine aralasuı azamattıq qoğamnıñ narazılığına wşıray bastadı.

Oñtüstik jäne tayau şığıs Aziya elderindegi kürdeli dini ahualdı eskeru, Qazaqstandağı radikaldı äleueti «uaqıtşa jasırınğan» qaterli ağımdardıñ jwmısın toqtatu, qoğamdıq dini sananı zayırlı äri wlttıq bağıtta ağartu, din men sayasattıñ äreketi bölek boluına kepildik beru... t.b. mindetteri jaña saylanğan müfti Naurızbay qajı Tağanwlınıñ aldında twr.

 

Ömirderek: Ötpenov Naurızbay Tağanwlı

1977 jıldıñ 13 naurızında düniege kelgen.

Bilimi

1993-1997 jıldarı Taşkenttegi «Imam Äl-Bwhari» atındağı Islam institutında oqıp joğarğı dini bilim alğan.

1999-2001 jıldarı QMDB janındağı Islam institutın oqığan.

2009 jılı Mısır Arab Respublikasında qısqa merzimde dini bilimin jetildirgen.

2010 jılı Abay atındağı Almatı Memlekettik universitetiniñ «Tarih» fakul'tetin sırttay oqıp bitirip joğarğı bilim alğan. 2011-2013 jıldarı atalğan universitettiñ «Dintanu» mamandığı boyınşa magistraturasın bitirgen.

2017 jıldan bastap «Nwr-Mübarak» Egipet islam mädenieti universitetinde «Islamtanu» mamandığı boyınşa PhD doktoranturasında oquda.

Eñbek jolı:

1997-2006 jıldarı Respublikamızdıñ türli meşitterinde imamdıq qızmetterdi atqarumen bastau alğan.

2006-2011 jıldarı QMDB-nıñ Qarağandı öñirindegi ökili, Qarağandı qalalıq №1 ortalıq meşitiniñ Bas imamı.

2011-2013 jıldarı Qazaqstan Respublikası Din isteri agenttiginiñ Dini birlestiktermen baylanıstar jönindegi basqarmasınıñ Bas sarapşısı.

2013-2018 jıldarı QMDB törağasınıñ birinşi orınbasarı, naib müfti, QMDB-nıñ Astana qalası boyınşa ökili, «Nwr Astana» ortalıq meşitiniñ Bas imamı.

2018 jıldıñ şilde-qazan ayları QMDB törağasınıñ birinşi orınbasarı, naib müfti, QMDB-nıñ Türkistan qalasındağı keñse basşısı, Türkistan oblısı boyınşa ökili imamı.

2018 jıldıñ qazan ayınan bastap QMDB törağasınıñ birinşi orınbasarı, naib müfti, QMDB-nıñ Nwr-Swltan qalası boyınşa ökili,  Respublikalıq «Äziret Swltan» meşitiniñ Bas imamı.

Eñbek jolındağı jetistikteri:

Naurızbay Tağanwlınıñ tikeley jetekşiligimen 2002-2005 jıldarı ŞQO, Ayagöz qalasında ortalıq jäne «Jañauıl» meşitteriniñ qwrılısı sätti jürgizilip, iske qosılğan. 2010-2011 jıldarı Qarağandı qalasındağı ortalıq meşittiñ salınuına üles qosqan. Qarağandı oblısında «Swlu älem», «Nwrlı minber», «Jwldızdı gol» attı jobalardı iske asırğan. Respublikalıq BAQ betterinde jariyalanğan köptegen dini, ruhani-tanımdıq maqalalar men «Ümit säulesi», «Mazhabsızben swhbat» attı kitaptardıñ avtorı.

Marapattarı:

«Qwrmet» ordeniniñ iegeri, Ayagöz audanınıñ qwrmetti azamatı, Qazaqtan Täuelsizdiginiñ 20 jıldığı medalimen, Qazaqtan Täuelsizdiginiñ 25 jıldığı medalimen, Qarağandı oblısı äkiminiñ qwrmet gramotasımen, Nwr-Swltan qalası äkimderiniñ alğıs hattarımen marapattalğan.

Jeke ömiri:

Otbasılı, 4 balanıñ äkesi.

“The Qazaq Times”