ادۆوكاتتار «انتيكوررۋپتسيانىڭ ارانداتۋشىلىق ارەكەتىن» اشكەرەلەدى – ابىشەۆ ءىسى

استانادا اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ بۇرىنعى توراعاسى يسلام ابىشەۆ پەن سەرىك تۇكيەۆتىڭ ىسىنە بايلانىستى ادۆوكاتتار ءباسپاسوز ءماسليحاتىن وتكىزدى. ولاردىڭ سوزىنشە، سىبايلاس جەمقورلىققا قارسى ۇلتتىق بيۋرو باستى كۇدىتىلەردىڭ كىناسىزدىگى دالەلدەنگەن سوڭ، ولاردىڭ تۋىستارىنا «جالا جاۋىپ جاتقان» كورىنەدى.

ادۆوكات ابدۋراحمانوۆ ا.، قۇسپان ا.، ەسقاراەۆ م.، ءجۇنىسباي س. ءىستىڭ جاي-جاپسارىن اشىپ ايتتى.

ابزال قۇسپاننىڭ سوزىنشە، يسلام ابىشەۆ كەزىندە وزىنە ۇسىنىلعان 2 ملرد تەڭگە پارادان باس تارتقانىن ايتقان، ال ەندى 60 ملن تەڭگە اقشانى تانىمايتىن بىرەۋدەن الۋعا وقتالدى دەگەن ايىپپەن قازىر تۇرمەدە وتىر. بەلسەندىلەر «سىبايلاس جەمقورلىقپەن كۇرەس ۇلتتىق بيۋروسى يسلام ابىشەۆ پەن سەرىك تۇكيەۆتىڭ ۇستىنەن ءۇش ايدىڭ ۇستىندە جاسىرىن تەرگەۋ امالدارىن جۇرگىزىپ، ابىشەۆتىڭ ەشقانداي پارا الۋ ويى دا، نيەتى دە بولماعانىنا كوزدەرى جەتكەن سوڭ، ول كىسىنى «پارا العىسى كەلدى» دەگەن ايىپپەن قامادى» دەيدى.

– پارا الۋعا وقتالدى دەگەن ايىپتى سوت تەرگەۋىندە كۇل-تالقانىن شىعاردىق. سوت پروتسەسى بارىسىندا ۇلتتىق بيۋرو قىزمەتكەرلەرى زاڭسىز ارالاسىپ، كۋاگەرگە قىسىم كورسەتتى. بۇعان ناقتى دالەل جەتكىلىكتى. ءۇش اي جاسىرىن تەرگەۋ جۇرگىزگەن انتيكوررۋپتسيا قىزمەتى ەشقانداي قىلمىستى انىقتاي الماسا دا،  قارالاۋ ماقساتىندا اقپارات قۇرالدارىنا جالعان بەينەحابار تاراتتى. كتك-دان باستاپ ازاتتىققا دەيىن وسىنى تاراتتى. ...كۇدىكتى رەتىندە تارتىلعان ابىشەۆ پەن تۇكيەۆكە قاتىستى «پارا الۋعا وقتالۋ» دەگەن ايىپ ءوز دالەلىن تاپپاعان سوڭ، ەندى ۇلتتىق بيۋرو قىزمەتكەرلەرى ولاردىڭ تۋعان-تۋىستارىنىڭ (قىزدارى مەن باۋىرلارىنىڭ) ۇستىنەن «پارا بەرۋگە وقتالۋ» دەگەن ايىپپىن ءىس قوزعاپ قويىپتى. وعان نەگىز رەتىندە تەرگەۋ يزولياتورىنداعى ءبىزدىڭ كەيبىر اڭگىمەمىزدى جازىپ العان ەكەن. بىراق وندا ايتىلعان ءسوزدىڭ ەشبىرىندە پارا بەرۋ ارقىلى ءىستى توقتاتۋ تۋرالى شەشىم-توقتام بولماعان،– دەدى ابزال قۇسپان.

دەسە دە قۇقىق قورعاۋ ورگاندارى «قۇپيالىلىعىنا كەپىلدىك» بەرىلۋى ءتيىس كەزدەسۋدەگى ءسوزدىڭ ستەنوگرامماسىن ۇسىنباعان. وسىلايشا، «ۇلتتىق بيۋرو زاڭدى اتتاپ ءوتىپ، ارانداتۋ ادىسىمەن كوپە كورنەۋ، نەگىزسىز ءىس قوزعادى» دەيدى.

قۇقىق قورعاۋشىلار «انتيكوررۋپتسيالىق ۇلتتىق بيۋرو سوت ادىلدىگىن جۇزەگە اسىرۋعا كەدەرگى كەلتىرۋدە» دەپ شاعىندى. ابىشەۆ-تۇكيەۆ جاقتاستارىنىڭ ايتۋىنشا، ۇلتتىق بيۋرو مەن قۇقىق قورعاۋ ورگاندارى قورعاۋشى مەن كۇدىككە تارتىلعان ادامنىڭ يزولياتورداعى قۇپيا ءسوزىن زاڭدى بۇزا وتىرىپ تىڭداعان، ارانداتۋشىلار ادۆوكاتتار مەن قورعالۋشىلاردىڭ ابدەن مازاسىن العان، سوتقا تارتىلعان ازاماتتاردىڭ تۋىسىنا قايسىبىر ءىستى قوزعاۋ ارقىلى قىسىم جاساعان، ولاردىڭ ۇيىنە مەزگىلسىز كەز كەلگەن ۋاقىتتا تەكسەرۋ-ءتىنتۋ جۇرگىزگەن، 30 تومدىق ءىستى ون كۇن ەمەس، ەكى-اق كۇندە سوتقا جولداعان...

سونداي-اق «ەڭ قۋاتتى ورگاننىڭ بەتپەردەسىن اشۋشى» ادۆوكاتتار كۇدىكتىلەر مەن سۋدياعا قىسىم كورسەتىلىپ جاتقانىن حابارلادى. ۇكىم شىعاتىن ساتتە سۋديانىڭ ىستەن شەتتەۋىن قۇقىق قورعاۋشىلار «ارالاسۋىنان» دەپ سانايدى.

قۇقىق قورعاۋشى «ابىشەۆ ءىسىنىڭ باستى فيگۋراسىنىڭ ءبىرى، ارىزدانۋشى ءارى كۋاگەر ازامات شايمەردەنوۆ كۇشتىك قۇرىلىمنىڭ ادامى، بۇرىنعى قارجى سالاسىنا قاتىسى بار تۇلعا. ول ارنايى دايىندالعان پەرسون» دەيدى.

بۇعان دەيىن يسلام ابىشەۆ 2012 جىلى اشم سۋ رەسۋرستارى كوميتەتىنىڭ توراعاسى قىزمەتىنە تاعايىندالدى. 2013 جىلدىڭ شىلدەسىندە قىزمەتىنەن الاستاتىلدى. 2014 جىلدىڭ شىلدەسىندە قايتادان كوميتەت توراعاسى قىزمەتىنە كەلدى. ال 2019 جىلعى 14 ناۋرىزدا ابىشەۆتى سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى تۇتقىندادى.

"The Qazaq Times"