Almatıda «Tranzit kezeñindegi BAQ pen söz bostandığınıñ röli» taqırıbında döñgelek üstel ötti.

Şara halıqaralıq jurnalister federaciyasınıñ Qazaqstandağı müşesi — «Teñ qwqılı jurnalister federaciyası» wyımınıñ bwrınğı prezidenti Rozlana Taukinanıñ qwrmetine arnaldı. Jiınğa qoğam qayratkeri Marjan Aspandiyarova, jurnalist Rısbek Särsenbay, jurnalist Dina Elgezek, Oksana Makuşina, qwqıq qorğauşı Baqıtjan Töreğojina qatıstı.

Tranzit kezeñindegi bwqaralıq aqparat qwraldarınıñ röli, Qazaqstandağı söz bostandığı mäselesin bastı taqırıp etken jiında spikerler diskussiya ötkizdi. Atap aytqanda, KZ.Media tilşisi Oksana Makuşina «Tranzit kezeñindegi äleumettik medianıñ röli», jurnalist Dina Elgezek «Qazaq baspasöziniñ tranzitke ıqpalı», Baqıtjan Töreğojina «Aqparat qwraldarındağı sayasi twtqındar taqırıbı» jöninde bayandama jasadı.

Diskussiya barısında 2019 jıldıñ qañtar-jeltoqsan işinde jurnalisterge jasalğan şabuıl, söz erkindiginiñ bwzıluı turalı resmi statistika wsınıldı. «Ädil söz» wsınğan resmi mälimetterge süyensek, sol aralıqta Qazaqstan boyınşa 46 jurnalist wstalğan, 32 is tirkelgen.

Ayta keteyik, Rozlana Taukina — sanalı ğwmırın söz bostandığı jolındağı küreske arnağan jurnalist, qwqıq qorğauşı. «Maksimum», «Karavan» sındı aqparat qwralına jetekşilik etken. Ol 1990 jıldardıñ basında Qazaqstanda eñ alğaş bolıp täuelsiz «Totem» telearnasın aştı. Alayda telearnanı oppoziciyalıq dep tanığan bilik «tolqın jiiligi jetispey qaldı» degen jeleumen Rozlana Taukina qwrğan «Totemdi» jauıp tastadı.

"The Qazaq Times"