الماتىدا «ترانزيت كەزەڭىندەگى باق پەن ءسوز بوستاندىعىنىڭ ءرولى» تاقىرىبىندا دوڭگەلەك ۇستەل ءوتتى.

شارا حالىقارالىق جۋرناليستەر فەدەراتسياسىنىڭ قازاقستانداعى مۇشەسى — «تەڭ قۇقىلى جۋرناليستەر فەدەراتسياسى» ۇيىمىنىڭ بۇرىنعى پرەزيدەنتى روزلانا تاۋكينانىڭ قۇرمەتىنە ارنالدى. جيىنعا قوعام قايراتكەرى مارجان اسپاندياروۆا، جۋرناليست رىسبەك سارسەنباي، جۋرناليست دينا ەلگەزەك، وكسانا ماكۋشينا، قۇقىق قورعاۋشى باقىتجان تورەعوجينا قاتىستى.

ترانزيت كەزەڭىندەگى بۇقارالىق اقپارات قۇرالدارىنىڭ ءرولى، قازاقستانداعى ءسوز بوستاندىعى ماسەلەسىن باستى تاقىرىپ ەتكەن جيىندا سپيكەرلەر ديسكۋسسيا وتكىزدى. اتاپ ايتقاندا، KZ.Media ءتىلشىسى وكسانا ماكۋشينا «ترانزيت كەزەڭىندەگى الەۋمەتتىك مەديانىڭ ءرولى»، جۋرناليست دينا ەلگەزەك «قازاق ءباسپاسوزىنىڭ ترانزيتكە ىقپالى»، باقىتجان تورەعوجينا «اقپارات قۇرالدارىنداعى ساياسي تۇتقىندار تاقىرىبى» جونىندە بايانداما جاسادى.

ديسكۋسسيا بارىسىندا 2019 جىلدىڭ قاڭتار-جەلتوقسان ىشىندە جۋرناليستەرگە جاسالعان شابۋىل، ءسوز ەركىندىگىنىڭ بۇزىلۋى تۋرالى رەسمي ستاتيستيكا ۇسىنىلدى. «ءادىل ءسوز» ۇسىنعان رەسمي مالىمەتتەرگە سۇيەنسەك، سول ارالىقتا قازاقستان بويىنشا 46 جۋرناليست ۇستالعان، 32 ءىس تىركەلگەن.

ايتا كەتەيىك، روزلانا تاۋكينا — سانالى عۇمىرىن ءسوز بوستاندىعى جولىنداعى كۇرەسكە ارناعان جۋرناليست، قۇقىق قورعاۋشى. «ماكسيمۋم»، «كاراۆان» سىندى اقپارات قۇرالىنا جەتەكشىلىك ەتكەن. ول 1990 جىلداردىڭ باسىندا قازاقستاندا ەڭ العاش بولىپ تاۋەلسىز «توتەم» تەلەارناسىن اشتى. الايدا تەلەارنانى وپپوزيتسيالىق دەپ تانىعان بيلىك «تولقىن جيىلىگى جەتىسپەي قالدى» دەگەن جەلەۋمەن روزلانا تاۋكينا قۇرعان «توتەمدى» جاۋىپ تاستادى.

"The Qazaq Times"