Körneki suret. Foto: aşıq derekköz

Bügin ükimet üyinde densaulıq saqtau ministri Eljan Birtanov Qıtayda tarağan koronavirus infekciyası turalı brifing ötkizdi.

Bas därigerdiñ sözinşe, 6 qañtardan beri QHR aumağınan 25 858 adam Qazaqstan şekarası arqılı ötken. Olardıñ arasında qazaqstandıqtar da, şeteldikter de bar. Bwl jöninde mälimetti Densaulıq saqtau ministrligine şekaralıq baqılau qızmeti bergen.

«Qazir Qıtaydan Qazaqstanğa kelgen azamattardıñ 23-iniñ qızuı köterilgenin anıqtadıq. Olardıñ bäri baqılauda. Tört adam türli infekciyalar jwqtırdı degen küdikpen auruhanağa jatqızıldı. Virustıq infekciyalardıñ bir-birinen naqtı ayırmaşılığı bolmağandıqtan, biz onı ötkir respiratorlıq virustıq infekciya retinde bağalap, adamdardan qan sınamasın aldıq. Üş kün işinde tolıqqandı diagnostika ötkizilip, tiisti em jürgiziledi», – dedi E.Birtanov.

Ministr soñğı 14 künde Qıtaydan kelgen qazaqstandıqtar men şeteldik azamattar dereu jergilikti poliklinikağa barıp, tirkeuge twruın swradı.

Vedomstvo indet profilaktikası retinde nauqastardı ornalastıruğa 4,5 mıñ orın dayındap qoyğan desedi. Düniejüzilik densaulıq saqtau wyımınıñ mälimetinşe, Qıtayda koronovirustan köz jwmğan adamdardıñ sanı 106-ğa jetti. Infekciyanı 30 provinciyada 4515 adam jwqtırğan. Älemniñ 15 elinde 80 nauqas tirkelgen.

"The Qazaq Times"