كورنەكى سۋرەت. فوتو: اشىق دەرەككوز

بۇگىن ۇكىمەت ۇيىندە دەنساۋلىق ساقتاۋ ءمينيسترى ەلجان ءبىرتانوۆ قىتايدا تاراعان كوروناۆيرۋس ينفەكتسياسى تۋرالى بريفينگ وتكىزدى.

باس دارىگەردىڭ سوزىنشە، 6 قاڭتاردان بەرى قحر اۋماعىنان 25 858 ادام قازاقستان شەكاراسى ارقىلى وتكەن. ولاردىڭ اراسىندا قازاقستاندىقتار دا، شەتەلدىكتەر دە بار. بۇل جونىندە مالىمەتتى دەنساۋلىق ساقتاۋ مينيسترلىگىنە شەكارالىق باقىلاۋ قىزمەتى بەرگەن.

«قازىر قىتايدان قازاقستانعا كەلگەن ازاماتتاردىڭ 23-ءىنىڭ قىزۋى كوتەرىلگەنىن انىقتادىق. ولاردىڭ ءبارى باقىلاۋدا. ءتورت ادام ءتۇرلى ينفەكتسيالار جۇقتىردى دەگەن كۇدىكپەن اۋرۋحاناعا جاتقىزىلدى. ۆيرۋستىق ينفەكتسيالاردىڭ ءبىر-بىرىنەن ناقتى ايىرماشىلىعى بولماعاندىقتان، ءبىز ونى وتكىر رەسپيراتورلىق ۆيرۋستىق ينفەكتسيا رەتىندە باعالاپ، ادامداردان قان سىناماسىن الدىق. ءۇش كۇن ىشىندە تولىققاندى دياگنوستيكا وتكىزىلىپ، ءتيىستى ەم جۇرگىزىلەدى»، – دەدى ە.ءبىرتانوۆ.

مينيستر سوڭعى 14 كۇندە قىتايدان كەلگەن قازاقستاندىقتار مەن شەتەلدىك ازاماتتار دەرەۋ جەرگىلىكتى پوليكلينيكاعا بارىپ، تىركەۋگە تۇرۋىن سۇرادى.

ۆەدومستۆو ىندەت پروفيلاكتيكاسى رەتىندە ناۋقاستاردى ورنالاستىرۋعا 4,5 مىڭ ورىن دايىنداپ قويعان دەسەدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، قىتايدا كورونوۆيرۋستان كوز جۇمعان ادامداردىڭ سانى 106-عا جەتتى. ينفەكتسيانى 30 پروۆينتسيادا 4515 ادام جۇقتىرعان. الەمنىڭ 15 ەلىندە 80 ناۋقاس تىركەلگەن.

"The Qazaq Times"