Körneki suret. Foto: QT

Bilim jäne ğılım ministri Ashat Aymağambetov ğılımi kadrlardı dayarlaudı jetildiru jäne akademiyalıq ortanı jaqsartu tetigi jaylı öziniñ facebook  jelisindegi resmi parağında jazba jariyaladı.

Aymağambetovtıñ aytuınşa, jaña qadamdardıñ köbi ministrlik janındağı jas ğalımdar keñesiniñ wsınısı negizinde äzirlengen. Säykesinşe dissertaciyanı qorğau üşin qajetti basılımdarğa qoyılatın talaptardı özgertu boyınşa vedomstvo bwyrığınıñ nobayı dayındaldı.

Ministrliktiñ №127 bwyrığına säykes, doktorantqa qorğauğa joldama alu üşin  mindetti türde jeti maqala jariyalau kerek, bwl rette sapası boyınşa erekşe talaptar qoyılmaydı.

«Büginge deyin bastı nazar tek sandıq körsetkişke audarılıp, maqalalar sapası kümändi jurnaldarda jariyalana bastaydı. Keyin ğalımdarımızdıñ maqalaları halıqaralıq bazalardan şığarılğan belgisiz bir jurnaldarda basılıp şıqqanda tañ qalıp jatamız. Älbette, qalıptasqan bwl dästürdi özgertu kerek. YAğni, swranısqa ie emes «älsiz» jurnaldarda maqalalardıñ köp jariyalanuına qarağanda, bedeldi jurnaldarda sapalı jariyalanımdar az şıqqanı jaqsıraq dep anıq aytuğa boladı», – deydi ol.

Sonımen qatar dissertaciyalıq keñes turalı ülgilik erejege keñes müşelerine qoyılatın talaptardı arttıru jönindegi jaña norma engiziledi. Keñes müşeleriniñ keminde 2/3 böliginde Hirş indeksi men recenziyalanatın halıqaralıq ğılımi jurnaldarda keminde üş jariyalanım boluı tiis. Äleumettik-gumanitarlıq bağıttar üşin bwl körsetkişter tömen boladı.

Sonday-aq magistrlik jäne doktorlıq dissertaciya jetekşilerine qoyılatın talap ta özgeredi.

Aymağambetov öz jazbasında «Mäselen, eger bügingi tañda doktoranttan küşti jurnaldarda jariyalanım talap etilse, onda ğılımi jetekşiniñ de osınday jariyalanımı boluı tiis. Qazirgi uaqıtta is jüzinde tiisti talaptar joq», – deydi.

"The Qazaq Times"